Ana Rema

العفو يا حبيبتي. للأسف حاليًا المتاح دبلومات الترجمة فقط وفيه جامعات في الأقاليم بتقبل طلاب التعليم المفتوح زيهم زي طلاب النظامي في برنامج ماجستير الترجمة لكن المشكلة إن مش كل الناس هتقدر تسافر تدرس في الأقاليم! الموضوع محتاج وقفة جامدة لأن كده مركز التعليم المفتوح غرر بالطلبة وفهمهم إنهم هيتقبلوا في أي كلية وإنهم من حقهم يدرسوا في برامج الدراسات العليا وطبعًا كل ده محصلش وفيه تمييز جامد محتاج مننا وقفة عشان ينتهي!

لأ أعتقد الجامعات الأجنبية والخاصة مفيهاش المشكلة دي.. هي بس المشكلة إنها مش مناسبة لكل الناس من ناحية تكاليف الدراسة. بصي هي جامعة القاهرة بتقبل طلبة التعليم المفتوح عادي في الدبلومة وفي سنة قبلتهم في التمهيدي وزمايلي قدموا وقتها وواحدة بس إللي اتقبلت وده تقريبًا كان سنة 2011/2012.. لكن تقريبًا رجعت تاني متقبلهمش في التمهيدي وده بسبب استياء بعض الدكاترة جوة أقسام اللغة وإللي في نفس الوقت شاغلين مناصب إدارية فبيبقى ليهم سلطة طبعًا على شئون الطلبة وإللي بيقولوه بيتنفذ حتى لو كان يتعارض مع اللوايح! جامعة حلوان بقى على مدار السنين إللي فاتت كانت بتقبل طلبة التعليم المفتوح عادي بس طبعًا كده كده عدد المقبولين هناك لازم يكون 20 بالكتير واختبارات القبول هناك صعبة فعشان كده كان طالب أو اتنين هم إللي بيتقبلوا من كل طلاب التعليم المفتوح إللي بيكونوا مقدمين. بس السنة دي الطالب الوحيد إللي اتقبل وهو مستواه ممتاز أصلاً كانوا عايزين يرجعوله ورقه بس لما هددهم برفع قضية والدكاترة وقفوا في صفه سابوه يكمل.. لكن فعلاً من السنة الجاية مش هيقبلوا حد تاني من طلبة التعليم المفتوح!! خدوا القرار مع نفسهم كده!! وجامعة عين شمس برضه كلية آداب مفيهاش ماجستير ترجمة وألسن مش بتقبل طبعًا تعليم مفتوح ولا هي ولا الأزهر لأني أعرف ناس قدموا هناك ومرضيوش يقبلوهم. وكل إللي أعرفه إن فيه جامعات في الأقاليم حاليًا بتقبل طلبة التعليم المفتوح في ماجستير الترجمة. بس الموضوع ملوش علاقة بكلمة "تعليم مفتوح" بس.. الموضوع ليه علاقة بتخصص ترجمة إللي مش موجود كتخصص ماجستير في معظم كليات آداب وكلية آداب الوحيدة في نطاق القاهرة إللي فيها ماجستير لغة وترجمة هي حلوان إللي خدت القرار السنة دي بعدم قبول المزيد من طلاب التعليم المفتوح!!

فعلاً إللي أعرفه إن المشكلة موجودة في آداب أقسام اللغات ودار علوم بس باقي الكليات عادي.

بس مفيش لوايح تمنع طلاب التعليم المفتوح من التسجيل في برامج الدراسات العليا في الجامعات.. ولو اتصلت سألت في مركز التعليم المفتوح هيقولولك من حقك تكمل ماجستير ودكتوراه بعد التخرج.. يعني الموضوع لا يخرج عن كونه تعنت من بعض أقسام الكليات.. خصوصًا إن إللي أنا أعرفه إن كل الكليات التانية الطالب بيسجل فيها ماجستير ودكتوراه عادي يعني المشكلة تحديدًا مش موجودة غير في أقسام اللغات في آداب ودار علوم. وحجتهم في آداب إن مفيهاش ماجستير تخصص ترجمة رغم إنهم وعدوا كتير بأنهم هيخلوا دبلومة الترجمة معادلة لتمهيدي ماجستير عشان الطالب يقدر يكمل بعدها لكن للأسف مفيش وعود بتتنفذ. أما كلية ألسن وكلية لغات وترجمة جامعة الأزهر إللي فيهم ماجستير ترجمة، فمش بيقبلوا طلاب التعليم المفتوح وبيقولوها عادي كده لأي طالب بيروح يقدم! المفروض زي ما الكلية بتاخد من الطلبة رسوم تضمن لهم حقوقهم وإن مفيش أي تمييز يُمارس عليهم.. وبعدين لو هم مش عاجبهم مستوى طلاب التعليم المفتوح يبقى العيب الأساسي من عندهم.. أنا عارفة إن فيه بعض الطلاب إللي مستواهم ضعيف.. لكن قبلوهم ليه من الأول وسمحوا لهم يعدوا امتحان القبول ويجتازوا 4 سنوات دراسية وياخدوا الشهادة ليه.. عشان الفلوس إللي بيدفعوها؟ للأسف الجامعات معتمدة بسكل أساسي على الفلوس إللي بتجيلها من التعليم المفتوح بس ده وضع مش منصف بالمرة والمفروض الفيصل في القبول مش إن الطالب خريج نظامي ولا تعليم مفتوح ولكن الفيصل هو اجتيازه لاختبار القبول في برنامج الماجستير الخاص بالكلية إللي متقدم ليها!

فعلاً موضوع جامعة حلوان ده صحيح للأسف لأن السنة دي كان فيه طالب مقبول في تمهيدي الماجستير وهو خريج تعليم مفتوح أصلاً وكانوا فعلاً عايزين يرجعوله الملف بتاعه لأنهم مش هيقبلوا طلاب تعليم مفتوح بعد كده.. لولا إن دكاترة القسم رفضوا الوضع ده لأن التيرم الأول تقريبًا كان خلص ولولا إن الطالب ده رفض وهددهم برفع قضية عليهم كانوا رجعوا له الملف بتاعه والسنة راحت عليه!! وإللي أنا مستغربة له إن كان في اتجاه مؤخرًا لإزالة لوجو التعليم المفتوح من الشهادة عشان ميبقاش فيه تمييز ضد الطلاب بعد كده يعني المفروض إن فيه خطوات للإصلاح.. بس في نفس الوقت فيه مسؤولين بياخدوا قرارات غير مسئولة وبشكل مفاجئ زي ما حصل في جامعة حلوان كده ومفيش عندهم أي اعتبار لمصلحة الطالب!

اللغويات هي علم دراسة اللغة بأسلوب علمي من خلال عدة فروع زي علم الكلام وعلم اللغة الاجتماعي والبراجماتية وعلم الصوتيات وعلم المعاني إلخ. اللينكات دي هتفيدك: http://ar.wikipedia.org/wiki/%D9%84%D8%BA%D9%88%D9%8A%D8%A7%D8%AA http://en.wikipedia.org/wiki/Linguistics http://www.linguistics.ucla.edu/prospective/undergraduate/21-what-is-linguistics.html موقع مفيده فعلا أخت ريما بارك الله فيك .. المورفولوجي : معناها علم الصرف والله أعلم شكرًا جزيلاً.. وفعلاً المورفولوجي هو علم الصرف.

اللغويات هي علم دراسة اللغة بأسلوب علمي من خلال عدة فروع زي علم الكلام وعلم اللغة الاجتماعي والبراجماتية وعلم الصوتيات وعلم المعاني إلخ. اللينكات دي هتفيدك: http://ar.wikipedia.org/wiki/%D9%84%D8%BA%D9%88%D9%8A%D8%A7%D8%AA http://en.wikipedia.org/wiki/Linguistics http://www.linguistics.ucla.edu/prospective/undergraduate/21-what-is-linguistics.html

You are welcome.

Hussein1974 شكرًا جزيلاً. إن شاء الله أنا هتابع معاكم باستمرار وربنا يوفقنا جميعًا.

ميرسي يا حبيبتي. بالنسبة لدبلومة الترجمة متقلقيش منها هي أسهل من ماجستير حلوان بكتير. لو عايزة تخشي مجال الترجمة خليكي فيها أو في دبلومة الجامعة الأمريكية لأنها أقوي وكمان ممكن تاخديها مادة مادة وامتحان القبول بتاعها أنا شفته قبل كده سهل قوي، هي يمكن تكون مكلفة بس مفيدة فعلاً. أنا زميلتي وإحنا بندرس في دبلومة الترجمة في جامعة القاهرة دخلت بتاعت الجامعة الأمريكية كمان وكانت بتشكر فيها قوي وبتقول إنها استفادت منها أكتر وكمان ليا زمايلي أيام الكلية كانوا بيدرسوا تعليم مفتوح ودبلومة الجامعة الأمريكية مع بعض وكان مستواهم ممتاز ما شاء الله. وممكن على فكرة لو مش هيفرق معاكي تقدمي في جامعة حلوان وفي جامعة القاهرة في نفس الوقت بحيث إنك لو لا قدر الله متقبلتيش في واحدة تتقبلي في التانية.

بالنسبة لمواد السنة التمهيدية هم 7 منهم واحدة إجباري: طرق بحث و6 بتختاري منهم 4: Sociolinguistics Pragmatics ESP Stylistics Translation Theories بالنسبة لدراستي في الدبلومة والكلية فادتني في الامتحانات لكن للأسف مفادتنيش في مواد التمهيدي لأن مواد الدبلومة ملهاش علاقة بمواد السنة التمهيدية خالص. بصراحة في حلوان الماجستير اسمه لغويات وترجمة لكن ملوش علاقة بالترجمة خالص كله لغويات. أما مواد دبلومة الترجمة ال16 إللي أنا درستهم فكانوا أسهل كتير من ال5 مواد بتوع التمهيدي لأنهم ببساطة امتداد لدراستي في آداب إنجلش تعليم مفتوح وبالتالي كان عندي فكرة كبيرة عنهم. كمان بالنسبة للي عايز يشتغل مترجم دبلومة الترجمة أفضل وأعتقد دلوقتي بقى ينفع التسجيل بعدها في الماجستير في جامعة القاهرة طبقًا للايحة الجديدة وطبعًا أفضل منها كمان دبلومة الترجمة بتاعت AUC. أما إللي عايز يشتغل في التدريس، فالماجستير في جامعة حلوان أنسب له.

على فكرة أنا لسه عارفة دلوقتي إن الامتحان التحريري يوم 30/9 وإن الشفوي هيبقى في يوم لوحده.

You are most welcome.

شكرا علي المعلومات القيمة Ana Rema عفوًا.

بصراحة مش فاكرة نص السؤال بالظبط لكن إللي فاكراه إنه كان سؤال مش متخصص بيسأل عن أهمية دراسة اللغة.

لأ الشهادة معترف بيها في القطاعين العام والخاص.. وأنا ليا زميلات اتخرجوا من كذا سنة واشتغلوا في مجال تدريس اللغة الإنجليزية في مدارس خاصة ولغات.. وفيه ناس كانت شغالة في وظائف حكومية وخدوا الشهادة لتحسين وضعهم الوظيفي. هو فيه فعلاً مشاكل بتواجه بعض الناس بس بتكون فردية لأن مفيش قرار يمنع خريج التعليم المفتوح من إنه يشتغل في التدريس أو يفرق بينه وبين خريج التعليم النظامي في التوظيف أو الدراسات العليا وخصوصًا بعد تعديل لايحة الدراسات العليا الأخير. وأحسن طبعًا إن الناس إللي واجهت المشكلة دي رفعوا قضية لأن إدارة عين شمس بالشكل بتجور على حقوقهم.

لو حد عنده سؤال يا جماعة يتفضل. وأنا هتابع معاكم إن شاء الله على قد ما أقدر. هجاوب مؤقتًا عن السؤال المتكرر عن امتحان القبول: امتجان القبول جزئين: شفوي وتحريري والامتحان التحريري بيكون الأول وبينقسم لجزئين جزء نظري وجزء عملي الجزء النظري غالبًا بيكون سؤال في اللغويات أما الجزء العملي فبيبقى ترجمة لباسدجين وفي الغالب بتكون واحدة عربي وواحدة إنجلش. بعد انتهاء الامتحان الطلبة المتقدمين للماجستير بيطلعوا يمتحنوا الامتحان الشفوي في قسم اللغة الإنجليزية.. وإللي بيعمل الامتحان كل سنة دكاترة القسم إللي بيدرسوا في برنامج الماجستير. وبالنسبة للأسئلة الشفوي بتختلف من دكتور للتاني بس في الغالب معظم الدكاترة بتسأل الطالب عن سبب رغبته في الالتحاق وبعد كده بيسألوه في الغالب سؤال في اللغة أو الترجمة. درجات النجاح في الامتحانين 14 وكل سنة بيتقبل 20 طالب ولو زاد العدد عن كده بيبقى 21 أو 22 بالكتير عشان بيعملوا حسابهم إن احتمال طالب أو اتنين ميكملوش. وطبعًا لو عدد الطلبة إللي مقدمين كبير وعدد إللي جابوا 14 أعلى من المطلوب بيتقبل الطلبة إللي جابوا أعلى درجات. ونتيجة الامتحان بتتعرف بعد أسبوع.. بس إحنا لما نتيجتنا بانت مكنش فيه درجات.. كان فيه كشف بأسماء المقبولين متعلق جنب مكتب شئون طلبة الدراسات العليا وبس.

يا جماعة متزعلوش إن شاء الله خير: (إن الله لا يضيع أجر من أحسن عملاً) وخليكم واثقين أنكم طالما اجتهدتم ربنا هينصفكم إن شاء الله وعمر حقكم ما هيضيع. ربنا يسهل إن شاء الله والاجتماع بتاع المجلس الأعلى للجامعات يسفر عن نتائج إيجابية.

أهلاً Honey Bunny وكل سنة وإنتي طيبة (: بصي بالنسبة لنظرة الدكاترة، فأنا أقصد إن عدد إللي مستواهم ضعيف عندنا أكتر من عدد إللي مستواهم كويس.. فبيحصل تعميم.. يعني لو مثلاً الدكتور مسك 3 ورقات ورا بعض مستواهم سيء ومسك بعدهم ورقة مستواها كويس وهكذا.. أكيد نظرته بتبقى سلبية غصب عنه.. وهو بينقل نظرته دي للقسم.. والقسم بياخد موقف بسببها. يعني الدكاترة إللي بيدرسولنا مش بيبقوا قاصدين يحرمونا من الدراسات العليا.. بس هم بينقلوا للقسم تقييمهم للطلبة مش أكتر وهو بقى بيقوم بالواجب. والله كان فيه دكتور بتقول قبل كده إنها لقت طلبة بيحطوا النقطة إللي المفروض تبقى في نهاية الجملة في سطر جديد وكذلك الفاصلة كانوا بيبتدوا بيها السطر!!! وكان فيه دكاترة كتير بيعلقوا قدامنا وبيقولوا إن طلبة تعليم مفتوح مستواهم أقل من طلبة النظامي وإن هم لا يتفوقوا عليهم غير في الترجمة. بمعنى أصح إللي مستواه ضعيف عندهم هو الاستثناء.. أما إللي مستواه كويس عندنا فهو الاستثناء.. أنا مش عايزة حد يزعل من كلامي.. بس بحبيت أنقل لكم الصورة كاملة قدر الإمكان وأقول إن بعض الطلبة تسببوا جزئيًا في إللي بيحصل ده لأن زي ما إنتوا شايفين باقى الكليات مفيهاش المشكلة دي. بس صدقيني معظم طلاب نظامي مجتهدين جدًا أنا قرايبي كانوا آداب إنجلش تعليم نظامي وكل زمايلي في دبلومة جامعة القاهرة وتمهيدي ماجستير حلوان مستواهم كويس جدًا ومجتهدين جدًا.. وهم كمان عندهم أعمال سنة يعني لازم يحضروا كتير.. والدكاترة غصب عنهم عندهم ناس جايبة فوق ال80% في الثانوية العامة و48/50 على الأقل في الإنجلش و70% في اللغات التلاتة، ومعظمهم بيحضروا وبيقدموا أعمال سنة.. فلازم في الآخر هيعتبروهم هم إللي مؤهلين.. وعندهم ناس تانية بتحضر يوم واحد في الأسبوع إن حضروا أصلاً ومنهم إللي مؤهلات متوسطة وانقطعوا فترة عن الدراسة فمستواهم ضعيف في اللغة ومنهم إللي واخدين الموضوع على إنه كورس.. ومنهم إللي مبيذاكرش غير آخر السنة.. ومفيش أعمال سنة.. والورق آخر السنة نسبة كبيرة منه بيبقى فيها أخطاء مفجعة.. ففي النهاية طبيعي إن هم هيتحيزوا للطلبة النظاميين. أنا عارفة إن إنتي وأنا وناس كتير ملهاش ذنب عشان كده لازم ناخد موقف! بس برضه أنا حبيت أتكلم عن أحد الأسباب الرئيسية للمشكلة وهي الطلبة عشان الناس تجتهد ويثبتوا إن طالب التعليم المفتوح مش أقل من طالب التعليم النظامي في شيء.

مساء الخير يا جماعة.. إزيكم جميعًا (: أنا طبعًا معاكم إن فيه تمييز زي ما اتكلمنا قبل كده ومقدرة المعاناة إللي مرت بيها زميلتنا Honey Bunny وللأسف ناس كتير اتعرضت للظلم ده ومفيش حل لحد دلوقتي.. بس تعالوا نحلل الموضوع كده مع بعض: أولاً: الشهادة بتاعتنا معترف بيها مفيش كلام.. بدليل إن ناس كتير خدتها عشان تعدل وضعها الوظيفي في مؤسسات حكومية وناس تانية اتعينت بيها في القطاع الخاص يعني عادي جدًا. المشكلة مش في الاعتراف بالشهادة لأنها بالفعل مؤهل جامعي حكومي والمشكلة برضه مش عند الموظفين إللي قالولنا وإحنا بنقدم إن الدراسات العليا مسموح بيها.. عارفين ليه؟ عشان فعلاً كل الكليات مسموح لها بدراسات عليا ما عدا إحنا فيه علينا بعض الاستثناءات ده غير إن وقت ما معظمنا قدم كانت مشكلة دار علوم لسه مظهرتش لأن زي ما أنتوا عارفين برنامج دار العلوم يا دوبك معمول من كام سنة.. وواضح أصلاً إن معظم الموظفين كانوا ميعرفوش المشكلة بتاعننا لأن الموضوع جاي من أقسام اللغة الإنجليزية نفسها.. وإللي للأسف مش مضطرة تقبل كل قرارات المجلس الأعلى للجامعات.. فيه حاجات بتترك لتقدير الأقسام!! يعني المشكلة معظمها في الأقسام لأن القائمين عليها مش عايزين يساووا طلاب التعليم النظامي بطلاب التعليم المفتوح .. طب إيه أسبابهم؟ هم طبعًا شايفين إن طالب النظامي بيجيب مجموع إلى حد ما مرتفع في الثانوية العامة (في حدود 80%) ودرجاته في اللغة الإنجليزية مش أقل من 48/50 ده غير مجموعه في اللغات التلاتة إللي درسها إللي لازم ميقلش عن 70% بالإضافة إلى حضوره بانتظام خلال معظم أيام الأسبوع وأعمال السنة إللي بيتقيم من خلالها.. فطبعًا هم بيبقوا واثقين في طالب التعليم النظامي حتى لو جاب في الأربع سنين مقبول.. بس طبعًا مش معنى كده إنه لما يجيب مقبول يتسمحله بالماجستير لأنه لازم يجيب على الأقل جيد وإلا هيبقى آخره دبلومة. طبعًا المقارنة هنا ظالمة جدًا لأن هم مش بيبصوا على الناس إللى بتجتهد في التعليم المفتوح وبتعتمد على نفسها وبتذاكر كويس.. كل إللي شايفينه إن الطلبة بيتعلموا على نفقتهم الخاصة ده غير نقطة تانية مش لصالح التعليم المفتوح خالص ومحدش واخد باله منها.. النقطة دي تتلخص في إن الدكاترة إللي بيدرسوا في القسم هم نفس إللي بيدرسوا في التعليم المفتوح مش كلهم طبعًا لكن مجموعة منهم.. فإللي بيحصل إن هم لما بيصححوا ورق الطلبة إللي هو العامل الوحيد لتقييمهم في التعليم المفتوح بيصعقوا من كمية الأخطاء اللغوية وضعف المستوى وإللي للأسف جزء كبير من الطلاب بيعانوا منه لأنهم مش كلهم مؤهلين أصلاً للدراسة في الكلية ومنهم إللي واخدها على إنها كورسات ومنهم كمان إللي مش بيذاكر غير آخر السنة فالنتيجة بتبقى إن مستواهم بيفضل ضعيف وبيخلوا الدكاترة يفتكروا إننا كلنا كده!!!! يعني الطالب المجتهد المتفوق بيتظلم بسبب الطالب الضعيف! وطبعًا الدكاترة بينقلوا آراءهم دي للقسم والقسم طبعًا بيتمسك بموقفه أكتر لأنه مش عايز يدي حد ماجستير أو دكتوراة في اللغة الإنجليزية وهو مستواه ضعيف لأنه هيبقى صورة غير مشرفة. وبما إن القسم متمسك بموقفه والمجلس الأعلى للجامعات مش فارقة معاه والمركز كل همه الفلوس هيفضل الوضع كده!!! وصدقوني يا جماعة جامعة حلوان برضه بعض دكاترتها واخدين موقف من طلبة التعليم المفتوح.. هم مش بيقولوها صريحة لكن بتبان من بعض تصرفاتهم.. رغم إن حلوان مفيهاش آداب إنجلش تعليم مفتوح.. بس الدكاترة كلهم يعرفوا بعض والصورة دي منقولة للجميع.. ده غير إن كل إللي بيتخرج من التعليم المفتوح بيجي جامعة حلوان يقدم دراسات عليا لأنها المخرج الوحيد ليهم.. وهناك برضه الدكاترة بيكتشفوا مستوى بعض الطلبة الضعيف من خلال الامتحان الشفوي!!! فمش بياخدوا منهم كتير.. أنا لما كنت بقدم كان فيه ناس كتير جدًا تعليم مفتوح وخدوا منهم 3 بالعدد!! بالنسبة للدبلومة أنا برجع أأكد إنها كانت دبلومة وبس ومكنش فيه تخصص ماجستير ترجمة لحد من سنتين وكان الموضوع قيد الدراسة لحد ما بقت تمهيدي ماجستير من سنتين بالظبط.. وإللي أعرفة إن هم كانوا بياخدوا خريجي تعليم مفتوح عادي أيام ما كانت دبلومة عشان كانت بتقبل جميع المؤهلات العليا.. أما خلال السنتين إللي فاتوا فاقتصر القبول على الحاصلين على مؤهل عالي في اللغة الإنجليزية.. وبرضه كان فيه ناس بتقدم تعليم مفتوح وبيقبلوا أوراقهم عادي لحد السنة الدراسية إللي فاتت.. بس هم مقبلوش السنة إللي فاتت غير طالبة واحدة من بين طلاب التعليم المفتوح على حد علمي.. ومن كلامكم كده واضح إنهم مقبلوش حد السنة دي خالص!!! والموضوع كده كله على بعضه عايز وقفة وعدد كبير جدًا عشان يهتموا ويفهموا إنها مش مشكلة فردية!! والمركز والمجلس الأعلى للجامعات هم الاتنين داخل جامعة القاهرة ولازم زيارة ليهم عشان يبقى فيه حل والناس إللي هتقدم السنة إللي جاية متصادفش نفس العراقيل!

عفوًا يا خالد.. ربنا يوفقك.. وأتمنى كل الزملاء يستفيدوا من المعلومات المكتوبة في الموضوع وربنا يوفق الجميع. وشكرًا لدعائك.

موضوع جميل جدًا. جزاك الله خيرًا.

معاك حق يا خالد.. أي تعب يهون عشان الإنسان يحقق هدفه.. خصوصًا إذا كان هدفه ده طلب العلم.. وشكرًا جزيلاً لتشجيعك. وربنا يحقق لك كل أمنياتك.

@ froh الله يبارك فيكي وشكرًا جزيلاً (: وشكرًا خالد. وربنا يوفق الزميل msmsz إن شاء الله ويحقق له كل أمنياته. أنا بصراحة كنت أعرف موضوع إن فيه ماجستير في جامعة حلوان من سنين بس كنت مستبعدة الفكرة عشان الجامعة بعيدة قويييييي عن بيتي. بس لما محمد جاب معلومات كتير عن الموضوع شجعني فعلاً وقلت أجرب حظي فيها بدل ما أعيد دبلومة جامعة القاهرة عشان تتحسبلي تمهيدي ماجستير. لأن موضوع إعادة سنتين ده ممل .قوي ربنا يسهل بس والواحد يعرف يحضر المحاضرات إللي من 8 الصبح دي