ياريت ارجع عيال

[احمد ياسين 0]

يارتنى ارجع تانى عيل
اشوف حاجه فى بترينه
اروح واجرى عليها
واقول لابويا انا عايزها
وابكى بعينى واريل

واصحى بدرى على الشارع
انداى صحبى نلعب كوره
ونخسر بس نستنا
وننزل تانى بعد الفور
ونلعب بلى فى الشارع
وشيك على العالى وخلويص
ونجرى ناخد من عم احمد
تمر وعرقصوص فى الكيس
طفولتى كانت لذيذه بجد
وفيها شقوه لابعد حد
وعمرى ما قبلنى مطب
ولا كرسه ولا اى سد
يارتنى ارجع تانى عيال
علشان احس الحريه
واشوف الدنيا زى زمان
بالونها الطبيعيه
بتشوجنى كتير جدا
يا فصلى فى ابتدائيه
وحصه الرسم والالعاب
وكام اغنيه وطنيه
ويوحشنى كمان صوت امى وهى بتنادى
ويوحشنى طابور الصبح وانا بغنى مع اصحابى بلادى بلادى
وتوحشنا كمان ستى ورطوش فى باب بتنا
وتوحشنى كمان عجله لعبت بيها فى حارتنا
تصدق انى لما بشوف صورتى ببكى واتالم
وبندم انى مذكرتش ومفلحتش
وعرفت ان ابويا ليه كان بيقولى اتعلم
بتوحشنى كمان ياما ليالى العيد
ورمضان وبكار ورشيده
وصحبى مينا وعمى سعيد
بيوحشنى بوجى وطمطم
وبمب وصوريخ رمضان
بجد خلاص انا نفسى
اكون عيال
علشان انا بقيت طئهان
ياريتنى ارجع تانى عيال
ومعرفش رئيسى مين
وينهبنى ما ينهبنى
اهم حاجه اكون عيال
مسلم مصرى انا وامين
كلماتى/ ياسين

[khaled38 0]

جميلة جميلة يااحمد...بتمنالك من كل قلبي ترجع عيل

[man_reda 0]

يا راجل الواحد لما صدق كبر

عاوز ترجع عيل وتعد تبكى وتريل تااااااااااااااااااانى

يا راجل كبر دماغك ..

حلوه يا أحمد واعتبرها دعوه عامه لعوده الطفوله علشان خاطر بكار ورشيده

[*maryam 0]

كلمات جميلة ولذيذة قوي

ومين ميحبش يرجع طفل تاني احلى سنين العمر أكيد ما أحلاها سنين ياااا فكرتني بأيام جميلة عمرها ما ترجع تاني لا تفكير في المستقبل ولا تحمل مسئولية ولا هم دنيا ولو زعلنا نفرح بلعبة ولا حاجة حلوة وأقل حاجة كانت بتضحكنا وتفرحنا وننام زي الملايكة منفكرش في حاجة

ياسلام عليها ايام

[احمد ياسين 0]

بشكركم جميعا

[nora1 0]

الله على الكلمات الجميلة بجد رجعتني لأيام زمان..

فعلاً بشكرك أولاً على المجهود ثانياً على التعبير البسيط غير المتكلف..

لا إله إلا أنت سبحانك إني كنت من الظالمين..

[احمد ياسين 0]

شكرا نور نورتى التوبيك

[KoTTa Koky 0]

ضحكتنى أوووووى يا أحمد باقرأها

فكرتنى بنفسى فعلا لما بتفرج على صورى بفضل أبكــى أوى

كانت أيام حلوة و حقيقية وفعـــلا ألوانها طبيعيـــة جداااااااااا

بدون أى رطوش خارجية أو أى زيف

لما كنت بتبتسم كانت الابتسامة حتى طالعة من القلــب انما هلا حتى الإبتسامة

بتطلع بس لمواقف كتير محتاجة اننا نبتسم فيها حتى لو جوانا بركـــــــــــــان من الغضب

بس الحلو فى كبرنا بالرغم من ألمنا لكن بنتعلم كتير أوووى

من حياتنا وما يقابلنا

أتمنالكـ كل التوفيق فى حياتك يا أحمد

وتوصل للمكانة اللى بتتمناها

[احمد ياسين 0]

KoTTa Kok سعيد والله انى فكرتك بالطفوله
وبشكرك جدا على حسن تعاملك انتى كمان كلامك جميل
وبيوصف الحاله كلمك قصر فيا والله اسعدنى مرورك

[mahinoor 0]

كلمات رائعة نابعة من إحساس صادق
كثير من الناس من يراودهم حلم الرجوع إلى الطفولة ..بالتأكيد إنه حلم جميل لكن الأجمل أن تعيش رجلاً أو إمرأة في قلب طفل أو طفلة هكذا لن تشعر بفراغ كبير....

[KoTTa Koky 0]

المشكلة يا ماهى ان أوقات بيكون حجم الفراغ أو الشعور بالألم كبير أوى

لدرجة انك ما تتحمليش تجملى حياتك وتضحكى على نفسك

وتعيشى نفسك فى حلم مش حقيقة

[احمد ياسين 0]

انا اقصد فى القصيده ان الطفوله براءه بنبقى لسه صفحه بيضا مفهاش شخبيط
عشان كده اتمنها عشان اكون برئ من ذنوب وارتاح فى المشاكل
ده مش معنه اننا مش نعيش جميع مراحل الحياه لائن كل مرحله ليها مذاق خاص
بشكركم على تفاعلمك ماهى وكوتى اسعدنى مروركم