طبِّل طبِّل يا إعلام


وانفخ في بسنت وإسلام


قول فليحيا شباب الفيس بوك


مَدّوا العالم بالإلهام
طبِّل طبِّل يا إعلام



- - -


إوعى تجيب سيرة الكنتاكي


وللا أجندة وائل جاكي


وللا تشكك في النواره


أو تسأل مين اللي وراكي


أحسن تتوبخ تتلام
طبِّل طبِّل يا إعلام


- - -


طبِّل يللا كمان وكمان


وامدح وانفخ في الشبان


دانت نسيت الحزب الوطني


وإنت نسيت الست سوزان


ياخواننا بقى داسمه كلام
طبِّل طبِّل يا إعلام


- - -


وإنت نسيت الباشا جمال


كان عندك سِيد الأبطال


دلوقتي ليه تنهش لحمه


وتخليه سِيد الأندال ؟!


يخساره عليك يا إعلام
طبِّل طبِّل يا إعلام


- - -


ياخواننا بتوع الإعلام


نحاسبكم باسم الإسلام؟


وللا باسم نبينا عيسى؟


أو موسى عليه السلام؟


أو باسم ميثاق الإعلام؟
طبِّل طبِّل يا إعلام


- - -


ياخواننا الكلمه أمانه


عايزينها ترسخ جوانه


وتقول الحق ولا تخافشي


لو تكدب راح تبقى خيانه


وح نكره كل الإعلام
طبِّل طبِّل يا إعلام