عشرة أسرار لنجاح محشى ورق العنب

[khabab 0]

عشرة أسرار لنجاح محشى ورق العنب
*****************************

عايزة محشى ورق العنب يطلع معاكى مظبوط ومايفكش منك على النار
ويكون كله حجم واحد ؟؟
ا
تبعى يا فتوكة الخطوات دى بعناية خطوة خطوة

اولا : لما تيجى تسلقيه لازم تبقى نص سلقة يعنى تحطيه فى ميه مملحة بتغلى ومتسيبهوش اكتر من دقيقتين عشان ما يتهريش منك

ثانيا : وانتى بتلفيه خللى الظهر الخشن هو اللى عليه الحشوة والظهر الناعم هو اللى فى الخارج

ثالثا : خللى الحشوة فى النص بالظبط ووسطنيها كويس وخللى كل مرة نفس مقدار الحشوة عشان يطلع كله نفس الحجم
رابعا : متطيش رز او حشوة كتير ومتخليش الرز كورة لا افرديه بيضاوى

خامسا : عشان ميتلسعش منك او يتحرق ويشيط حطى فى ارضية الحلة ترانشات جزر او بطاطس مع قليل من زيت الزيتون وممكن تحطى العنقود اللى بتشيليه من ورق العنب وبطنى بيه الحلة وبعدين رضى ورق العنب

سادسا : لما تيجى ترصى ورق العنب فى الحلة عشان كله يبقى نفس السوا ومايفكش منك فيه طريقتين ياترصيه على شكل دائرى او حلزونى ياترصيه سطر بالطول فوقيه سطر بالعرض عكس اللى
تحته

سابعا : لما تبدأى تسويه حطى عليه شوربة يا دوب تكون مغطياه وحطى فوق المحشى طبق اصغر من مقاس الحلة وطبعا يكون بيتحمل الحرارة واضغطيه على المحشى حلو وغطى عليه الطبق ده هيخليه مايفكش منك وهو بيستوى

ثامنا: لما تغطى الحلة خللى النار عالية لحد الشوربة ما تبدأ تغلى اول ما تغللى وطى النار خاااااااالص

تاسعا : اول ماصوت الشوربة يهدى خالص ومايكونش فيه أى صوت اطفى عليه

عاشرا : بالنسبة للخلطة ماتخليش فيها أى سوايل يعنى سبكى الطماطم كويس وصفى الرز عشان تضمنى انه مايعجنش معاكى

وبألف هنا وشفا ياقمرات

[amir99 0]

موضوع رائع وجميل تحية قلبية جميلة بجمال طرحك..

[لؤلؤة العراق 0]

دمت متألق ومن تميز لأميز تقبل أرق التحايا كرقتك.أستمر وأنتَ مبدع