ماجستير آداب انجليزي (شعبة ترجمه) فقط بجامعة حلوان

[Ana Rema 0]

السلام عليكم
شكرًا جزيلاً لأبو جودي ولكل من ساهم بمعلومات مفيدة .. بس أنا شايفة إن الامتحان ده الجانب النظري منه مصمم لخريجي آداب حلوان شعبة لغوية إللي أصلاً الماجستير ده امتداد دراستهم وكمان فيه اتجاه هناك لتفضيل طلاب آداب إنجلش حلوان على طلاب التعليم المفتوح. لو نتيجتكم بانت يا ريت تعرفونا يا جماعة عشان نقطع الشك باليقين في موضوع التحيز لطلاب جامعة حلوان ده. أما بالنسبة لجامعة القاهرة، ففيها ماجستير ترجمة وأنا متأكدة بس هم برضه بيفضلوا خريجي آداب إنجلش تعليم نظامي على خريجي التعليم المفتوح.. وأنا أعرف ناس قدموا السنة إللي فاتت وكان فيه ناس كتير تعليم نظامي ومفتوح بيقدموا وقبلوا بتوع التعليم النظامي وواحدة فقط من التعليم المفتوح!!! مش عارفة بقى إيه الحل ربنا يسهل!

[khaled38 0]

من فضلك ياريما بالنسبة لموضوع ماجستير جامعة القاهرة اللى اعرفه انه مش موجود لا ماجستير ولا دكتوراه في اي جامعة غير جامعة حلوان فهل انتي متاكدة من المعلومة دي؟ولو متاكدة يبقى ده معناه انهم سمحوا لينا بالتكملة في جامعة القاهرة ودي خطوة كويسة...نتمنى تكون منفذة بالفعل.

[abo nooh 0]

خريجي التعليم المفتوح يقبل بالجامعات اللي تقبل التعليم المفتوح وجامعه القاهره تقبل الخريج من التعليم المفتوح



وكذلك تقبل بريطانيا واستراليا والولايات المتحده

وممكن تكمل دراسات عليا اون لاين وتشتغل بشهاده التعليم المفتوح

تتعلم وتشتغل بآن واحد

فلا تشغل نفسك الا بالدراسه بالوقت الحالي



وكل وقت وليه أذانه

[Ana Rema 0]

أهلا خالد.. في الحقيقة هي كانت دبلومة ترجمة لحد 2011 وبعد كده كان فيه اجتماعات في الكلية وناقشوا موضوع إتاحة ماجستير الترجمة بتحويل الدبلومة إلى تمهيدي ماجستير زيها زي دبلومة اللغويات التطبيقية وده لأن الدكاترة كانوا عايزين التخصص ده يكون موجود وعلى رأسهم د. عناني وكمان كان فيه طلبة كتير بتتكلم مع الدكاترة في الموضوع ده.. فوافقوا على القرار بس مش بأثر رجعي يعني الناس إللي خلصت الدبلومة مش من حقها تسجل رسالة ماجستير.. الرسالة مسموح بيها للطلاب الجدد بس.. وده طبعًا كان فيه ظلم لأن أنا ودفعتي في الدبلومة كنا بنتخرج في 2011 (نفس السنة إللي طلع فيها القرار) وطبعًا متطبقش علينا.. وقالولنا إللي عايز ياخد الماجستير يعيد الدبلومة!! طبعًا محدش قدر على الموضوع ده.. لأن الدبلومة كانت سنتين وحضور 5 مرات في الأسبوع وأعمال سنة ومعظمنا بيوتنا بعيدة.. فمحدش قدم السنة إللي فاتت غير اتنين من زمايلنا عشان بيوتهم قريبة وكان معاهم ناس تانية تعليم مفتوح بس لسه متخرجين مش مخلصين الدبلومة زي حالاتنا.. وزمايلي دول قالولي إن تقريبًا كل إللي نجحوا في امتحانات القبول طلاب نظامي باستثناء طالبة واحدة من التعليم المفتوح كانت معانا في الدفعة.. وأنا قريت هنا كمان إن فيه ناس خريجي تعليم مفتوح راحوا سألوا السنة دي قالولهم مفيش ماجستير ترجمة خالص! فعشان كده أنا حاسة إن فيه تمييز. وبصراحة كمان فيه دكاترة من التعليم المفتوح من إللي كانوا بيدرسوا زمان كانوا بيروحوا يشتكوا في القسم من مستوى الطلبة فده مخلي بعض دكاترة القسم واخدين موقف شوية من خريجي التعليم المفتوح. لكن والله فيه دكاترة عادي جدًا مش بتفرق معاهم ود. عناني نفسه بيقدر خريجي التعليم المفتوح لأنه كان بيدرسلي وكنت بشتغل معاه شغل ترجمة وعارفة رأيه كويس.

[Ana Rema 0]

خالد سالم.. أهلاً بيك
على فكرة المشكلة مش في القوانين واللوايح.. المشكلة في السياسات التمييزية إللي بتبقى جوه الأقسام.

[khaled38 0]

اشكرك ياريما على المعلومات القيمة دي وباذن الله ربنا يوفقك وتقدرى تكملي دراساتك لحد الدكتوراه كمان ومادام فتحوا الباب للتعليم المفتوح فى جامعة القاهرة ولو سنة صغيرة يبقى ممكن مع استمرار المطالبة يكملوا فتح الباب للاخر ويسمحولنا نكمل في جامعة القاهرة لان ده حقنا زي اي خريج جامعي وكمان المفروض نكمل في اي كلية تانية بما فيهم كلية الالسن لاني دخلت على موقع كلية الالسن لقيتها بتقبل خريجي جميع كليات اداب في مصر لتحضير الماجستير فيها وبما ان شهادتنا معادلة لاداب يبقى حقنا نكمل في السن كمان مش كليات اداب وبس....ده حق من حقوقنا والا تبقى فعلا شهادتنا غير معترف بيها

[Ana Rema 0]

العفو يا خالد وربنا يوفقنا جميعًا إن شاء الله.. بس على فكرة بالنسبة لكلية ألسن والأزهر مش بيقبلوا خريجي تعليم مفتوح لأن ألسن فيه ناس سألوا فيها والأزهر صاحبتي راحت من سنتين قدمت فيه بس مقبلوش ورقها عشان هي خريجة تعليم مفتوح. إحنا لو عايزين حقنا فعلاً لازم نعمل خطوة إيجابية.. يعني مثلاً نروح مركز التعليم المفتوح ونتكلم مع المدير ونفهمه الوضع.. أنا قبل ما أدخل آداب إنجلش سألتهم بتأهلني للدراسات العليا ولا لأ قالولي عادي مسموح لي بيها.. فكده هم معندهمش مصداقية لأنهم سايبين رؤساء الأقسام يحطوا لوايح على مزاجهم ويعاملونا على إننا خريجين من الدرجة التانية!!! ده إحنا محصلناش خريجي الجامعات والمعاهد الخاصة لأن هم بيتساووا بخريجي آداب إنجلش ومسموح لهم بكل مراحل الدراسات العليا!!! على فكرة كان معايا في الدبلومة خريجي جامعة أكتوبر والجامعة العربية المفتوحة وكان مسموح لهم بكل حاجة حتى دبلومة اللغويات التطبيقية إللي إحنا محرومين منها!!!بجد كده ظلم!

[abo nooh 0]

أهلا ريما وشكرا على التوضيح والمعلومات اللي في المشاركه

وعندي سؤال عن المواد اللي كان يدرسك فيها د.عناني ماهي المواد ؟

ماذا كنتي تشتغلين معه ما طبيعه العمل

؟ وأين تتوفر كتب الدكتور عناني بمكتبه معينه مثلا لان اشوف كتبه متوزعه في كل مكان

ياريت تفيدينا عن كل معلومه عن الدكتور عناني وجزاك الله كل خير يا ايمي

لان الموضوع غايه في الاهميه عن حياته

[abo nooh 0]

ريما /

.. في الحقيقة هي كانت دبلومة ترجمة لحد 2011 وبعد كده كان فيه اجتماعات في الكلية وناقشوا موضوع إتاحة ماجستير الترجمة بتحويل الدبلومة إلى تمهيدي ماجستير زيها زي دبلومة اللغويات التطبيقية وده لأن الدكاترة كانوا عايزين التخصص ده يكون موجود وعلى رأسهم د. عناني وكمان كان فيه طلبة كتير بتتكلم مع الدكاترة في الموضوع ده.. فوافقوا على القرار



السؤال ل / ريما ana rema

( هل الكلام هذا موجود على هيئه قرار مكتوب ( قرار بورق

أم القرار هنا مجرد اتفاق شفوي بين الدكاتره

يارب نجد جواب شافي

واشكرك جدا ياريما

[abo nooh 0]

ربنا يسهل كل عسير ويفتح ابواب الفرج للكل



و يرزق الاخوه كلهم ما يحبونه ويجعله عونا على رضاه موصلا الى جنته



امين

[Ana Rema 0]

أهلاً خالد سالم..
د. عناني كان بيدرسلي مادتين في سنة أولى دبلومة: نظرية الترجمة والمعاجم، وشغلي معاه كان مراجعة لأعمال مترجمة ليه قبل طباعتها ونشرها.. وطبعًا مكانش تعديل على الترجمة.. بس المراجعة كانت بتتعلق بأخطاء السهو والنسيان.. بس استفدت كتير في الحقيقة. بالنسبة لكتب د. عناني بتلاقيها في مكتبات زي الأنجلو وأبو الهول إللي في وسط البلد وبعض المكتبات الموجودة داخل جامعة القاهرة ومنها مكتبة آداب. بالنسبة للاجتماعات هي كانت رسمية لأن خلال سنتين الدبلومة كانوا الدكاترة بيقولولنا إن الدبلومة هتبقى تمهيدي ماجستير قريب.. فكان الموضوع مطروح.. بس طبعًا الاجتماعات دي بتبقى مقتصرة على الدكاترة.. وكل إللي أعرفه إن وإحنا في سنة تانية صدر القرار.. بس طبعًا متطبقش علينا.. كان هيتطبق عالطلبة الجدد.. طبعًا قبل القرار ما يصدر إحنا فهمنا من بعض الدكاترة إن إللي جايب جيد جدًا من خريجي الدبلومة هيتسمح له بالماجستير.. لكن ده محصلش والقرار مكانش بأثر رجعي.. وإللي عرفته كمان إن عدد المتقدمين السنة إللي فاتت كان أقل كتير من عدد إللي كانوا بيتقدموا أيام ما كانت دبلومة لأن الماجستير للحاصلين على مؤهلات عليا في اللغة الإنجليزية بس أما الدبلومة فكانت مفتوحة لكل المؤهلات العليا.. وأعتقد ده سبب عدم قبول الدفعات القديمة لاستكمال الماجستير.. وإللي حصل كمان إن تقدم حوالي 60 اتقبل تلتهم بس تقريبًا.. وكان الامتحان زي الدبلومة بالظبط شفوي وتحريري.. وإللي ينجح في التحريري كان بيدخل الشفوي.. والدبلومة بعد ما بقت تمهيدي ماجستير بقت تيرمات مش امتحانات آخر السنة زي ما كانت لحد 2011.. وكمان اختلف ترتيب المواد شوية.. والماجستير أول دفعة فيه قدمت كانت السنة إللي فاتت عشان بعض زمايلي قدموا فيها.. لكن بصراحة أنا مستغربة إن فيه ناس سألت السنة دي وقالولهم مفيش ماجستير!

[abo nooh 0]

بارك الله فيك

[abo nooh 0]

هل قدمتي ع الماجستير يا ريما ؟

[khaled38 0]

عندك حق ياريما فعلا دي ملاحظتي من خلال دخولي مواقع كليات كتير من اداب والسن وهي اننا مش متساويين حتى مع خريجي الجامعات والمعاهد الخاصة ولا حتى المعاهد الاجنبية وكاننا مثلا حاصلين على شهادة كمنحة من الدولة مش بمجهودنا ومش معادلة لاي شهادة...واستغربت جدا لما لقيت اعتصامات لطلبة التعليم المفتوح بيطالبوا بمطالب كتيرة ومحدش فيهم جاب سيرة الدراسات العليا وانا في رايي ان ده اهم طلب لان هو ده اللي هايخلينا متساويين مع خريجي باقي الكليات في اي جامعة....لازم فعلا ناخد خطوة ايجابية بس متهيالي ان القرار مش في ايد مدير المركز انما في ايد المجلس الاعلى للجامعات وممكن لو طالبنا مدير المركز ميعملش حاجة..الموضوع ده لازم نفتحه بجدية ونوصله لاعلى المستويات لان ده اهم حق لينا ولناس كتير هتيجي بعدنا من خريجي التعليم المفتوح.

[abo nooh 0]

يوجد بعض الطلبه قبلوا فعلا في الدراسات العليا - بجامعه حلوان

وهم معانا بالمركز

ويبدو ان هنالك صعوبات في بعض الأحيان

وربنا يسهل كل عسير

[Ana Rema 0]

@ Khaled Salem
أيوة يا خالد أنا قدمت فعلاً السنة دي في جامعة حلوان وامتحنت مع ناس من خريجي آداب إنجلش حلوان وناس من التعليم المفتوح والنتيجة ظهرت إمبارح وأنا رحت جبتها النهارده. ومعايا أسماء المقبلوين كمان عشان لو حد عايز يعرف نتيجته.

[Ana Rema 0]

@ Khaled38
فعلاً يا خالد هم بيعاملونا على إننا أقل من كل الخريجين.. ولازم ناخد الخطوة دي بس يكون عددنا كبير جدًا عشان هم بيهتموا غير لما يكون إللي بيشتكوا عددهم كبير.. ولازم برضه نبقى عارفين التقصير جاي منين.. من المركز ولا من المجلس الأعلى للجامعات.. دول حتى مش معتبرينا ليسانس آداب أصلاً.. أنا مرة فكرت أعمل دبلومة أدب مقارن وكان من شروطها إن المتقدم يكون خريج آداب.. فبسأل موظفة في شئون الطلبة عنها لقيتها بتقوللي إني مينفعش أقدم فيها لأنها لخريجي آداب بس!!!! طب أمال إحنا إيه مش خريجي آداب برضه؟ والله أنا مرديتش عليها من الصدمة! يا ريت فعلاً نعمل كلنا حاجة إيجابية في الموضوع ده.

[abo nooh 0]

الف مبروك يا ريما و فرحنا لقبولك



وهذا بشرى خير وفأل خير لكل الدارسين بأن من سار على الدرب وصل



مبروك تاني

[Ana Rema 0]

@ Khaled Salem
ميرسي جدًا يا خالد.. الله يبارك فيك وعقبالك.. معلش أنا دورتلك على لينك كتاب د. عناني (نظرية الترجمة) بس ملقيتوش.. إنت عايش في مصر ولا بلد تانية؟

[abo nooh 0]

انا بالكويت وبجي مصر على طول كل فتره انزل ما بين فتره وفتره

وسوف اذهب مصر في هذا الكورس لحضور بعض المحاضرات

بالنسبه لكتب الدكتور عناني انا سجلت كما قلت عندي مكتبه الانجلو وابو الهول

واحيانا اشاهدها مع بعض الباعه اما م الجامعه

انامهتم بسيره وحياه هذا الدكتور لانه مترجم عالمي - ليس بالامر السهل -

فارجو ان يوفقك ربنا وتدلينا على مكان هذه النظريات

ولما ننزل مصر لازم نشوف طريقه نتواجه ونزور الدكتور عناني انا مصر على رؤيته

واشكر لك اهتمامك بالرد الطيب ومبروك بالف مباركه على قبولك ومنها للاحسن والاعلى

على رضا الله ورضوانه

[abo nooh 0]

واحنا ممكن نسأل الدكتور عن كتاب يجمع هذه النظريات

لانها هتخدم كثير في شغلنا بالمستقبل



أن شاء الله

[abo nooh 0]

نظريه الترجمه + والمعاجم

هل بقي معاكي ورق مذكراته او اي حاجه باقيه من الدبلومه السابقه لك



وشكرا

[abo nooh 0]

where are you doctor rema ?

[khaled38 0]

الف مبروك ياريما القبول وباذن الله الى الامام دائما الى اعلى الدرجات باعلى التقديرات...باشكرك جدا على اهتمامك بالرد وعلى مشاركتك معانا و على الرغم من قبولك بتمهيدى الماجستير الا انك مهتمة بمشكلة هامة جدا تخص باقى زملائك....ليا طلب عندك بما انك تم قبولك بحمد الله ارجو الا تنقطع مشاركتك معانا هنا وان تمدينا بكل جديد وتمدي يد العون للجميع ولكل واحد بيتمنى اللحاق بقطار الدراسات العليا.وكمان ياريت تكون في طريقة للتواصل المباشر معاكي انتي والاستاذ محمد تقريبا كاتب الموضوع ده الاصلي نتمنى ليه وليكي التوفيق والسداد ان شاء الله.

[Ana Rema 0]

@ Khaled Salem
أهلاً خالد.. أنا موجودة أهو.. بس مبيجيليش عالإيميل إن فيه مشاركات جديدة في الموضوع مش عارفة ليه.. مع إني مشتركة في الخدمة دي.
بالنسبة لكتاب د. عناني متقلقش هتلاقيه بمنتهى السهولة أول ما تنزل مصر وهتلاقيه كتب كتيرة ليه في المكتبات دي.
بالنسبة للمنهج، كل مادة وكان ليها أسلوبها.. بس المنهج الأساسي بتاع د. عناني كان الكتب: كتاب نظرية الترجمة + كتاب المعاجم إللي إحنا درسناه في التعليم المفتوح في تيرم 4 لكن الاختلاف الوحيد إن في مادة المعاجم كان المطلوب مننا في الدبلومة نذاكر معظم الكتاب مش الجزء الأولاني منه زي ما حصل في الكلية.. وعلى فكرة أنا إللي درسلي المادة دي في الكلية د. على عبد العزيز.. مش عارفة هو إللي درسلكم المادة ولا لأ.. بس أنا أعرف إن من بعد ما أنا خلصت دكاترة كتير اتغيروا وهو منهم.
باقي مواد الدبلومة كانت: قراءة وفهم، وترجمة أدبية من وإلى العربية، وترجمة علمية من وإلى العربية، وترجمة شبه تتبعية ومنظورة، وترجمة فورية، وتحليل نصوص إنجليزية، ونحو، ونصوص من الأدب العربي، وترجمة قانونية وسياسية إلى العربية. والمواد دي كانت متقسمة على السنتين 9 في أولى و7 في تانية ومنها مواد اتدرست لنا في السنتين زي العلمية والأدبية.
بس دلوقتي بقوا 8 في أولى و8 في تانية على تيرمات كل تيرم فيه 4 مواد وكده طبعًا أحسن من الأول.
وكان مقرر علينا في الأدبية برضه كتب د. عناني: الترجمة الأدبية بين النظرية والتطبيق ومصطلحات أدبية بس معظم المواد التانية مناهجها كانت باسدجات خارجية مش كتب باستثناء الترجمة العلمية بتاعت د. ماهر شفيق.
وأنا معايا الباسدجات دي لحد دلوقتي وإن شاء الله هدور عليها وأنزل جزء منها في أقرب فرصة.

[Ana Rema 0]

@ Khaled38
الله يبارك فيك يا خالد.. ومتشكرة جدًا وعقبالك
أنا فعلاً يا خالد مهتمة عشان أنا برضه اتعرضت لنفس الظلم ده.. وعايزة التمييز ده ينتهي عشان الناس إللي هتتخرج جديد ميواجهوش نفس المشكلة.
ومتقتلش خالص أنا إن شاء الله معاكم على طول وهتابع المنتدى باستمرار وأي استفسار بخصوص الدراسة سواء في جامعة القاهرة أو جامعة حلوان هرد عليه.
وطبعًا بالنسبة ل Mzmzs
كاتب الموضوع الأصلي جزاه الله خيرًا على مشاركاته وكل المعلومات القيمة إللي قدمهالنا لأنه شجع ناس كتير تقدم في الماجستير وعرفهم كل المطلوب منهم.

[msmsz 0]

الزميلة Ana Rema
الف مبروك علي قبولك في تمهيدي الماجستير في جامعة حلوان، بالرغم انك تعليم مفتوح!!!
للأسف لم انجح في امتحان القدرات، كما حدث مع اغلب زملائي وزميلاتي من التعليم المفتوح
عدد الطلاب المتقدمين كان كثير والمطلوب هو تصفيتهم الي 20 فقط، وكان الطبيعي انهم يركزوا علي اختيار طلاب التعليم النظامي و المتفرغين للدراسة لكي يستطيعوا الحضور 3 مرات اسبوعيا

بالتوفيق مقدما في دراسة الماجستير

السلام عليكم

[Ana Rema 0]

الزميل Msmsz
الله يبارك فيك.. ومتشكرة جدًا
ومعلش إن شاء الله تعوضها السنة الجاية.. ونصيحة قدم في الاتنين مع بعض: ماجستير جامعة القاهرة وجامعة حلوان.. عشان تزود فرصك في القبول.. أنا فعلاً مخلصة دبلومة الترجمة بس جامعة القاهرة مش عين شمس.. أول لما اتخرجت قدمت فيها وخلصتها السنة إللي فاتت.. وريحت سنة.. وبعد كده قدمت السنة دي في تمهيدي الماجستير بجامعة حلوان.. وكان معايا زمايلي من التعليم المفتوح قابلتهم بالصدفة هناك.. بس للأسف متوفقوش في القبول.. ربنا يوفق الجميع السنة الجاية إن شاء الله.. بس أنا على فكرة مش متفرغة أنا بشتغل وقلت للدكاترة الموضوع ده في الامتحان الشفوي.. وعلى فكرة هم كده دايمًَا بيحددوا عدد المقبولين بغض النظر عن عدد المتقدمين لأن لما تقدمت لدبلومة الترجمة في جامعة القاهرة قبل ما تبقى تمهيدي كنا 203 وخدوا مننا 43 وبعد ما بقت تمهيدي السنة إللي فاتت اتقدم عدد أقل في حدود 60 واتقبل برضه 20 بس.. مش عارفة السبب.. بس هم بيحددوا للماجستير عدد المقبولين قليل دايمًا.. يمكن عشان تحضير الرسائل بيحتاج دكاترة كتير للتفرغ والإشراف.. والله أعلم
بالنسبة لدبلومة الترجمة في جامعة عين شمس إللي أعرفه إنها دبلومة مهنية يعني مش بتأهل لماجستير ودكتوراة وإنها بتاخد من تقدير جيد ومدتها سنتين وموادها بتختلف شوية عن مواد جامعة القاهرة لأنهم بيدرسوا فيها لغة وأدب.
على العموم أفضل حاجة تقدم في كذا جامعة في شهر 7 إن شاء الله وربنا يوفقك.. ولو عندك أو عند حد من الزملاء أي استفسار أنا هتابع الموضوع باستمرار إن شاء الله.

[khaled38 0]

ما شاء الله على مشوارك المشرف ياريما..ربنا معاكي ويوفقك..من كلامك اقدر استخلص ان من السنة اللي فاتت اصبحت الدبلومة من جامعة القاهرة بمثابة تمهيدي ماجستير وان اللي يحصل عليها من حقه يحضر ماجستير في جامعة القاهرة وبالتبعية بعد كده يحضر دكتوراه في جامعة القاهرة..معنى كده ان مفيش اختبارات قبول للتمهيدي زي جامعة حلوان..من هنا اقدر احدد شروط تحضير الماجستير بجامعة القاهرة كالتالي:

1-ليسانس اداب ترجمة تعليم مفتوح بتقدير جيد على الاقل

2-دبلومة ترجمة بجامعة القاهرة مدتها سنة بتقدير جيد على الاقل

ده استنتاجي وتحليلي لكلامك فياريت لو في اي خطا او تعديل منك عليه توضحيه عشان نحدد نقط للجميع تكون واضحة وبسيطة.

[khaled38 0]

سؤال تاني:هل اختبارات القبول بالدبلومة بجامعة القاهرة تعادل نفس مستوى اختبارات القبول بتمهيدي الماجستير بجامعة حلوان؟

او بمعنى تاني اختبارات القبول بالدبلومة بجامعة القاهرة عبارة عن ايه بالظبط؟

معليش استحملينا يمكن اجاباتك على اسئلتنا تكون اسس ترسم طريق اجيال كتير من بعدك.

[Ana Rema 0]

@ Khaled38
بجد متشكرة جدًا يا خالد على كلامك وذوقك
وبالنسبة للماجستير في جامعة القاهرة، هو بعد ما بدأ السنة إللي فاتت خلاص مبقاش فيه دبلومة.. بقى تمهيدي الماجستير على طول بنفس المواد ونفس الدكاترة بس اختلف ترتيب المواد مش أكتر.. وفعلاً بعده يقدر الطالب ياخد دكتوراة.. ويشترط يكون الطالب معاه مؤهل عالي في اللغة الإنجليزية وأعتقد بتقدير جيد.. لأن مفيش ماجستير بمقبول.. لكن على أيامنا كانوا بياخدوا كل المؤهلات العليا إللي تقديرها مقبول عادي.. بس ده عشان خاطر كانت دبلومة مش ماجستير.
وبالنسبة لاختبارات القبول، هي شفوي وتحريري.. زي ما كانت أيام الدبلومة بالظبط.. بيجيلك غالبًا باسدجين في الامتحان التحريري.. موضوعات سياسة أو أخبار صحفية أو اقتصادية.. على حسب الدكتور إللي بيحط الامتحان.. والشفوي بيقوللك قدم نفسك وبيسألك عن سبب التحاقك وبتبقى غالبًا هي دي نوعية الأسئلة..

[Ana Rema 0]

@ Khaled38
صراحة اختبار قبول الدبلومة إللي جالي كان أصعب من بتاع جامعة حلوان بكتير.. بس كان فيه تطبيق على إللي درسناه في التعليم المفتوح.. يعني إللي متخرج من الكلية مستواه كويس في الترجمة يقدر يحله وكذلك إللي بيشتغل مترجم وعنده خبرة معقولة.. هو كان باسدج سياسية من عربي لإنجلش وباسدج اقتصادية من إنجلش لعربي بس كانوا طوال وممنوع دخول الامتحان بالدكشنرز.. وكان زمن الإجابة 3 ساعات.. أما امتحانات الدبلومة نفسها في أولى وتانية فكان مسموح لنا فيها بالحضور بقواميس.

[khaled38 0]

مفيش اي كلام اقدر اعبر بيه عن مدى شكري وامتناني ليكي...انتي فعلا وضحتي كل حاجة

ربنا يكتبلك النجاح والتفوق

[Ana Rema 0]

@ Khaled38
متقولش كده إحنا زمايل.. وربنا يوفقنا جميعًا إن شاء الله.

[abo nooh 0]

اهلا إيمي

ما المراد بهذه الكلمه

باسدج

هل المراد كلمه قطعه

وثانيا ازاي يتم السماح بالحضور مع القواميس ؟

هل كان مسموح ؟

[Hana09 0]

السلام عليكم ياجماعة

والله موضوع جيد ومشجع علي استكمال الدراسة ، وبشكر كل الاعضاء اللي شاركو بالاراء والتي اظن انها مفيدة جداً لكل لطلبة واتمني ان تتغير نظرة الناس للتعليم المفتوح واللي بتسبب ظلم كتير لينا يعني شهادتنا ممكن نكمل بها خارج بلدنا واظن انها هتكون معترف بيها في اي مكان ، اتمني يجي اليوم نتساوي بباقي الشهادات الجامعية لان والله العظيم بجد بنتعب ونفسنا نكمل وبجد احنا ناس طموحة جداً لكن القدر اللي وضعنا في سكة التعلم المفتوح بسبب ظروفك كل واحد فينا


اتفائل خيراً في المستقبل للتعلم المفتوح ولكل الدراسين فيه

[reda mostafa 0]

موضوع مثمر للغايه بالتوفيق للاخوه والاخوات فى مرحله الدراسات العليا

وعقبالنا ان شاء الله

[abo nooh 0]

عليكم السلام اخي عربي واكيد ربنا لا يقدر الا كل خير



ان شاء الله ينال كل منا مبتغاه



واهلا بالجميع بكل الاخوه والاخوات



يسر الله للجميع الخير

[Abo Judy 0]

السلام عليكم أخوتي وأخواتي الكرام
الحمد لله أنا وفقت في أمتحان القبول ودفعت المصروفات. أتمني حظ سعيد وفرصة أفضل لمن لم يوفق بإذن الله تعالى في السنة القادمة. أنا نجحت على الرغم من كوني خريج تعليم مفتوح (تقدير: جيد جداً)، ولكنني الأن مرعوب وخايف لأني عرفت أن المحاضرات صباحية يوم الأثنين والخميس وممكن يكون في يوم ثالث كمان! بس عموماً هحاول وربنا يسهل. أكرر شكري لكل من ساعدوني بمعلومات ويا رب نقدر نوفي ليكم بعض جمايلكم. بس أنا عندي إستفسار عن مواعيد المحاضرات والمواد يا ريت أي حد يعرف يحاول يساعدنا.
وجزاكم الله خيراً

[abo nooh 0]

توكل على الله والف مبروك على القبول وان كانت المحاضره صباحيه فايه المشكله

وهذه مرحله ماجتسير يااخي تختلف عن الحضور ليوم الجمعه لان مرحله اقوى وتعليم اوسع

و ربنا معاك ولاتخاف ابدا

[abo nooh 0]

أبو جودي ما دمت قبلت بفضل الله سبحانه

فأرجو مراجعه قسم الدراسات العليا لتعرف منهم المواعيد وكل حاجه

و اخوانك هنا أكثرهم بالتعليم بمرحله الليسانس

انت استاذنا وهتفيدنا بعد ما تراجعهم ابا جودي

[froh 0]

الف مبروك يابو جودى وبالتوفيق ويسعدنا قبولك لدراسة الماجستير ... وليه مرعوب كل خطوه بتخطيها بداية لمشوار النجاح اللى هتوصله باذن الله تعالى ... مبروووووووووووووك قبولك .

[khaled38 0]

الف مبروك ياابوجودي وعقبال مانهنيك بتفوقك في الماجستير ومن بعده الدكتوراه..وياريت متحرمناش من مشاركتك في المنتدى عشان نطمن على مسيرتك في الدراسة وعشان كمان تفيد الجميع بخبرتك كدارس دراسات عليا زي الزميل محمد اللي كتب الموضوع وافاد الجميع واللي بنتمنى ليه حظ اوفر في المرة الجاية وزي الزميلة ريما اللي افادتنا افادة عظيمة بمعلوماتها....مع ارق امنياتي بالنجاح والتفوق ليك انت وريما.

[msmsz 0]

الزميل Abo Judy والزميلة Ana Rema
الف مبروك لكما النجاح في امتحان القدرات

يوجد في المرفقات جدول المحاضرات الخاصه بمواد تمهيدي الماجستير
4shared.com/office/NgmQFMuj/__online.html

المحاضرات سوف تكون كلها صباحيه وبعد الظهر احيانا ايام الاثنين والاربعاء والخميس كما هو موضح في الجدول
يجب ان تحاولا الحضور علي الاقل بنسبة 80% من مجموع محاضرات كل ماده علي حدى

المشوار التعليمي للماجستير مكلف ماديا ومعنويا ونفسيا وخصوصا اذا كنت موظف بغض النظر عن منطقة سكنك
لأنه ليس من السهل ان تأخذ 3 ايام اجازه كل اسبوع لمدة 6 شهور علي الاقل بدون ان تخصم هذه الايام من مرتبك الشهري

بداية الدراسة 1/10/2012 ونهاية الدراسه 30/4/2013
بداية الامتحانات 15/5/2013 ظهور النتيجه 15/6/2013

اعانكما الله علي كل العوائق والمصاعب حتى تنالا شهادة الماجستير
ارجو منكما ان تنشرا كتب المواد السبعة الخاصة بتمهيدي الماجستير

بالنجاح والتوفيق مقدما
السلام عليكم

[msmsz 0]

الزملاء والزميلات
سوف يتم فتح باب القبول لتمهيدي الماجستير العام القادم من 15/7/2013 الي 31/8/2013

هذا للعلم والتنبيه
السلام عليكم

[khaled38 0]

ربنا يبارك فيك ويوفقك ان شاء الله السنة الجاية ويكتبلك التفوق الدائم

[Ana Rema 0]

@ k.salem
معلش يا خالد اتأخرت عليك في الرد عشان مدخلتش المنتدى اليومين إللي فاتوا:
فعلاً باسدج أقصد بيها قطعة.. ومعظم مواد دبلومة الترجمة كان مسموح لنا فيها باستخدام القواميس الورقية والإلكترونية زي أطلس.. بس مكانش مسموح بقواميس الموبايل أو استخدام النت.

[Ana Rema 0]

@ Araby & reda mostafa
ربنا يوفقكم ويحققلكم أمنيتكم بالالتحاق بالدراسات العليا.. بس إنتوا شدوا حيلكوا وذاكروا كويس في الكلية.

[Ana Rema 0]

@ Abo Judy
ألف مبروك لنجاحك في امتحان القبول
وربنا يوفقك ولو إن مواعيد المحاضرات صعبة قوي.

[Ana Rema 0]

@ khaled38
شكرًا جزيلاً خالد وربنا يوفقك.