مصر بعد25ينايرالى اين؟

[Hussein1974 0]

ياجماعة ده موضوع انا باقترحه عليكم نناقش فيه باعتبارنا اولا مصريين وثانيا من طائفة المتعلمين والمثقفين فى البلد كل مايدور فى بلدنا مصر من احداث ومشكلات من بعد الثورة ونناقش اراءنا جميعا فى وضع حلول لكل مشكلات بلدنا واظن ده موضوع يهم الكل يمكن اكتر من اى موضوع تانى مهما كان لاننا بدون تراب مصر مش هايكون لنا اى مستقبل عشان كده اتمنى الاقى تفاعل من الكل ونشوف ونتناقش فى حلول كل مشاكل البلد حسب اراء كل مننا وطبعا بدون اى خلاف لاننا فى الاخر هدفنا واحد وهو خروج مصر مما هى فيه بسلام وامان وتشجيع كل من تولى مسئولية فيها على اقرار الامن فيها وليس التخريب ولا زعزعة الامن ولا التهديد باشعال نيران الفتنة او الفوضى وربنا يوفق مصر وجيشها وشعبها للخروج من الازمة دى او بمعنى اصح الازمااااات دى.

[محمد سعيد جويلي 0]

معاك يا حسين
وربنا ينصر مصرنا إن شاء الله

[Hussein1974 0]

كنت متاكد يامحمد انك هاتتفق معايا.لازم نفكر ونتكلم عن كل شىء.يعنى مثلا انا باقترح نتكلم فى البداية عن مشكلة الامن.اسبابها.وازاى نعالجها.ولا انت ايه رايك؟

[محمد سعيد جويلي 0]

تمام يا سحس أساساً مشكلة الأمن دي هي عصب الموضوع كله

[محمد سعيد جويلي 0]

وأنا من رأيي إن الأمن بيعاني من بعض مشكلات وهي :-

أولاً : - إنعدام ثقة الشعب في جهاز الشرطة المصرية


ثانياً : - إنعدام ثقة أفراد الشرطة في أنفسهم


والبعض منهم لا يمارس عمله بسبب نوع من الاعتراض على الوضع الحالي أو
الانتقام من الشعب فعلاً رأيت الكتير من رجال الشرطة يرى الخطأ أمامه ولا يبادر بردعه .
كحالات السرقة والاغتصاب التي كانت تتعرض لها الناس دون تدخل الشرطة وكالأحداث الأخيرة بمدينة بورسعيد وهو يرى أحداث الشغب والقتل دون فعل أي شئ .



ثالثاً : - هروب المساجين وانتشارهم بأعداد كبيرة وانتشار الأسلحة بين الشعب

[محمد سعيد جويلي 0]

كل هذا أدى إلى ما يسمى الفوضى

[Hussein1974 0]

عندك حق عشان كده انا اقترحت نبدا بيها.يعنى انا رايى متهيالى مش هايختلف عن اراء ناس كتير وهى سببها الفجوة اللى حصلت بي الشرطة والشعب مابين قبل الثورة وبعدها وكمان فى رايى ان فى تخاذل من الشرطة يعنى الشرطة تقدر تعمل اكتر من كده بس مبتعملش ويمكن ده فى رايى خوف اتزرع جواهم وجوانا كلنا على مدار السنين اللى فاتت باعتبار اننا عشنا مرحلة من غير حروب ولا اى تعامل مباشر.حتى يااخى ممكن واحد يشوف غيره بيتعرض لاى خطر وميحاولش يساعده لان الخوف اتزرع جوانا.عشان كده لازم نقهر الخوف ده.انا اقترحت اقتراح بعد الثورة مباشرة على اتنين من اصدقائى بس ملقيتش تشجيع منهم بسبب اننا اتعودنا على التواكل.تعرف يامحمد الاقتراح ده فى رايى لو اتنفذ زى مانا عاوز متاكد انه هايحل اى مشكلة لكن زى مانا متاكد اناه هايحل اى مشكلة برضو متاكد انه مش هايتنفذ لعدم التعاون والتكاتف بين الشعب.احب اسمع كلامك وعاوز يشاركنا زملاء تانيين وبعدين هاقولكم على فكرتى يمكن نلاقى حد يقدر ينفذها.

[Hussein1974 0]

شوفت يامحمد اراءنا متشابهة عشان كده حاسس ان فى امل فى بكره.

[محمد سعيد جويلي 0]

وكأن الرئيس المخلوع قد بعث لنا الرسالة ونحن الآن نفتح هذه الرسالة ونقرأ محتواها . عندما قال في خطابه الأخير كما تتذكر أنني سأستمر في الحكم لحين إنتهاء فترة الرئاسة أو ستواجهوا الفوضى من بعدي أي الخطة البديلة التي اقترحها على ثعبانه الوفي حبيب العادلي

[محمد سعيد جويلي 0]

قول يا حسين فكرتك أنا معاك

[Hussein1974 0]

ماهى دى كانت رسالة مباشرة منه ماهو يامحمد ياروح مابعدك روح.يعنى عاوزه يتخلع من الكرسى والمجد وكمان الامل فى تولية ابنه ويسكت.كان لازم يتوعد الشعب بالفوضى والانتقام.بس تفتكرايه الحل فى رايك لمحاربة الفوضى والفتن والبلطجة وكل مظاهر الانفلات فى البلد؟ماهو لازم يكون فى حل قبل بلدنا ماتضيع.

[Hussein1974 0]

مش عارف ليه محدش بيشاركنا الكلام؟هو المنتدى ده مش للحوار ولا ايه؟

[محمد سعيد جويلي 0]

الحل فينا إحنا يا حسين فينا إحنا جوانا
فيا وفيك وفي كل الناس
إن الله لا يغير ما بقوم حتى يغيروا ما بأنفسهم

لازم كل واحد فينا يتغير
ويكون التوحيد عامل مشترك بينا
لازم نزرع جوانا نبتة الأمل في الله أولاً
لأن تقوى الله يعطي قوة بالقلب

ألا بذكر الله تطمئن القلوب

[محمد سعيد جويلي 0]

تخيل كده يا حسين قامت حرب وانت حاسس من جواك إن مقصر في واجباتك تجاه ربنا
تخيل كده هيكون موقفك عامل إزاي في الحرب
أكيد هتكون خايف لاتموت وانت من جواك مقصر تجاه ربنا وهتكون مذبذب في المواجهة وخايف وقلبك نبضاته سريعة من شدة الخوف من لقاء الله لإنك معرض للموت .
طب تخيل كده العكس إنت من جواك بتدي ربنا حقه في عبادته أو بتجتهد في ذلك لإننا عمرنا مهما عملنا مش هنوفي ذرة من حقه علينا المهم إنت حاسس إن من جواك إن فيه عمار بينك وبين ربنا في واجباتك تجاهه هتكون بتحارب وانت شكلك عامل إزاي أكيد هتكون قوي وبتحارب بكل بأس وقوة وعزيمة هو كده بالظبط حالنا دلوأتي إحنا في حالة حرب بس حرب نفسية من خوفنا في بيوتنا وخوفنا من المواجهة لأي حد لإننا للأسف أكثرنا ضعفاء النفس لأن إيماننا ضعيف بالله

[محمد سعيد جويلي 0]

يبأه الحل كالآتي لكي ننهض بدولتا مرة أخرى
أولاً :- أن نتقي الله أولاً وأن تكون كلمة الله هي العليا .
ثانياً :- أن نتوحد جميعاً مسلمين ومسيحيين لمواجهة هذا الفساد .
ثالثاً :- أن نساند رجال الشرطة في آداء أعمالهم .
رابعاً :- إنشاء جهاز يسمى الجهاز الشعبي .

[محمد سعيد جويلي 0]

بالنسبة للمقترح الرابع وهو :- إنشاء جهاز يسمى جهاز الأمن الشعبي


يتكون من:- أفراد مدنيين ، وأهالي .



ودور هذا الجهاز هو حلقة وصل بين الشعب والشرطة ومساندة جهاز الشرطة في العمل

[محمد سعيد جويلي 0]

وطبعاً الجهاز ده هيتبني بناءاً على أسس وخطط معينة في من يعينون في هذا الجهاز .

[Hussein1974 0]

برافو عليك بامحمد.لو نص المصريين فكروا كده هانكون احسن بلد فى العالم عشان كده هاقولك رايى وتقولى ايه رايك وملاحظاتك.بص انا استوحيت فكرتى من اللجان الشعبية اللى اتعملت بعد الثورة بس طبعا اللجان دى افرزت بلطجية وقطاع طرق ولم تستمر ولم تكن منظمة.المهم هاشرحلك.

لنفرض انك ساكن فى حى معين.هانعتير الحى ده بلد مستقلة بذاتها ونحدد فيه مثلا خمسين مكان حيوى زى مثلا تقاطعات الطرق او الاماكن اللى فيها منشات حيوية.ثانيا هانقسم اليوم على 8ورديات يعنى كل وردية3ساعات.ومثلا نوقف فى كل مكان 20شخص ليهم شروط ومواصفات معينة هاقولهالك دلوقتى.فلو ضربنا يطلع المجموع 8000شخص.بس طبعا اشخاص فيهم شروط وهى ان ميكونش حد فيهم مسجل او خطر على الامن او سىء السمعة او مدمن اواى شىء مماثل لكده وكمان ده شىء تطوعى يعنى كل واحد بارادته.بكده هنلاقى الف راجل واقفين فى وقت واحد فى الخمسين مكان وكلهم لابسين زى موحد وليهم اسم موحد وليكن مثلا..هانحمى مصر بدمنا..وكلهم يقولوا قسم زى بتاع الشرطة يتكتب بعناية وفيه انهم هايفنوا نفسهم دفاعا عن تراب مصروطبعا كل الناس والبلطجية هايشوفوا ده وهايشوفوا الحماس والكترة فيهم وده هايرعبهم.المهم الاف شخص هايكون ليهم مهام محددة وهى مثلا:

1-منع اى مشاكل او نزاعات بين الناس

2-منع اى تجاوزات من الموظفين زى الرشوة او الاهمال..الخ

3-مساعدة الشرطة فى القبض على المساجين اللى هربوا من ابناء نفس الحى

4-تنظيف الشوارع

5-تنظيم المرور

6-مساعدة اهالى الحى عند اللزوم

واكيد طبعا هتلاقى حاجات كتير غير كده ويكونوا على اتصال ببعض يعنى كل مجموعة فيها واحد على اتصال بال49التانيين عشان لو حصلت مشكلة يقدروا العشرين فى وقت قليل يكونوا 200 او اكتر لان الكترة المنظمة بتخوف اى حد.طبعا دى فكرتى وطبعا على الواقع هاتكون اكتر تنظيم لكن للاسف متاكد انها مستحيلة لان لايمكن نتحد على هدف واحد وفكر واحد.بس لو حسبتها يامحمد هتلاقى لو ده حصل فى كل حى جميع مشاكل البلد بلا استثناء هاتتحل.

ياريت تقولى رايك وانا قابل اى كلام متترددش وقول اى حاجة.

[محمد سعيد جويلي 0]

وده رأيي يا حسين في الوقت الحالي في موضوع حل مشكلة جهاز الشرطة .

[Hussein1974 0]

مش ممكن يامحمد فى نفس الوقت اللى باكتبلك فيه فكرتى الاقيك كاتب نفس الفكرة.ايه ده مش معقول يكون تفكيرنا كده زى بعض.الحمدلله.

[محمد سعيد جويلي 0]

ياه يا حسين إنت عندك نفس فكرتي تقريباً وهي عمل جهاز يسمى جهاز الأمن الشعبي يعني إحنا متفقين وطالما إتفقنا في موضوع واحد وفي أول حديث صريح بينا أكيد فيه كتير مننا بيرحب بهذه الفكرة وهي بجد فكرة جبارة وفعلاً ترعب وتخوف أي بلطجي هيحاول يعمل شغب أو يسرق أو يخرب في أي شئ .
الفكرة دي بجد ممتازة
بس مين إللي ينفذ
ومين إللي يوصلها
وكل واحد فينا بيحب يعارض لمجرد إنه يعارض بس .

[محمد سعيد جويلي 0]

يابني ألي إسمك وسنك وعنوانك ورقم تليفونك بسرعة شكلك محترم وأنا بحب المحترمين .

[محمد سعيد جويلي 0]

عارف يا حسين أنا لو مش شغال وفي مكان بعيد عن أهلي ومش في البلد وفي قلب الأحداث كنت عملت إيه ؟
كنت وصلت الفكرة دي وبدأت بنفسي في تنفيذها ونشرتها بين أصدقائي وخليتها هي شغلي الأول والأخير .

[Hussein1974 0]

شوفت بقى اديك قولت كل واحد بيحب يعارض لمجرد انه يعارض عشان كده متاكد انها مش هاتتنفذ الا اذا رجعنا زى زمان لعصر الاحتلال ساعتها هاننفذ غصب عننا وبرضو هاتلاقى اللى يعارض.لازم الاول نكون راجل واحد.يعنى انا مثلا اقترحت تكوين حزب بدون اى اغراض سياسية وهدفه هو هبة نفسه للبلد وبس.

تعرف كلام توفيق عكاشة رغم ان ناس كتير بيضحكوا عليه لكن فى منه كتير بيعجبنى لان فى افكار بيقولها انا قلتها من سنة فاتت.السقطة الوحيدة اللى باخدها عليه انه عنده طموح سياسى انه عاوز يرشح نفسه للرئاسة بس فى المستقبل.

لازم يامحمد اللى ينفذ الافكار دى يكون مالوش اى هدف غير مصر.

[Hussein1974 0]

انت بتقول برة البلد؟انت فين اصلا يامحمد؟

[Hussein1974 0]

متهيالى قبل كده قلت البحر الاحمر.صح ولا انا غلطان؟

[Hussein1974 0]

ياريت يامحمد بس متهيالى ممنوع نكتب معلوماتنا الشخصية هنا مش عارف ليه مع ان دى حرية شخصية.ياريتهم يسمحولنا بكده على الاقل اللى عاوز يتعرف على حد يتعرف.

[محمد سعيد جويلي 0]

ههههههههههههه
آسف أصل أنا بجد ضحكت على توفيق عكاشة
لإني أنا كمان بعض كلامه بس ومش شخصيته لإنه عشان الناس بتقول عليه مجنون ووحش هو بيحاول إنه يجتهد ويعمل عكس ذلك بإثباته لكل نظريات المخطط الصهيوني والأمريكان والسياسات المتبعه ليهم وده بالنسبة للجانب الخارجي .
أما بالنواحي الداخلية .
بيحاول إنه يبرز على سلبيات النظام بكل شفافية وبدون مايخبي أي شئ حتى لو كان كلام سيئ بيقوله لإنه ذي ما ألتلك إنه بيحاول يثبت للشعب إنه كويس وبيحب مصلحة الشعب
كلامه ده في مصلحتنا آه .
وأنا بحب معظم كلامه فقط في قناة الفراعين
لكن عايز أبلغك خبر تاني ومش عارف تتفق معايا والا لا

توفيق عكاشة مناااااااااافق .

[محمد سعيد جويلي 0]

أنا مش بره مصر أنا بس شغال في شرم الشيخ يعني ببعد عن مصر 6 ساعات تقريباً .

[Hussein1974 0]

مانا بقولك يامحمد فى بعض كلامه بيعجبنى واحنا بفكرنا نقدر ناخد من كلام اى حد اللى يفيدنا ونسيب اللى ليه اغراض تانية حتى لو كان منافق زى توفيق عكاشة.

[Hussein1974 0]

يعنى انت بتمتحن فين يامحمد وفى كلية ايه؟

[محمد سعيد جويلي 0]

أنا بمتحن في الاسماعيلية وفي كلية تجارة جامعة القاهرة تعليم مفتوح وساكن في بورسعيد

[Hussein1974 0]

كويس يعنى من المدينة الباسلة.يبقى فعلا بور سعيد بلد رجالة مدام انت منها يامحمد.على فكرة انامن القاهرة وفى كلية الاداب قسم انجليزى تيرم خامس وباذن الله ادخل سادس.

[محمد سعيد جويلي 0]

وكمان أقولك حاجه أنا من المتابعين الجيدين لتوفيق عكاشة ولكلامه وزي مانا قلتلك مش لشخصه وزي مانت بتقول كده بالظبط باخد منه الكلام الكويس اللي بيخاطب عقلي ويكون صحيح ومنطقي

[محمد سعيد جويلي 0]

ربنا معاك يا حسين ويوفقك وشكراً لانطباعك عن بورسعيد

[محمد سعيد جويلي 0]

أنا في تجارة تيرم خامس

[محمد سعيد جويلي 0]

وانت شغال فين ؟

[Hussein1974 0]

ربنا يوفقك يامحمد.عندك حق صاحب العقل بيميز واحنا الحمدلله ربنا ميزنا بالعقل بس يارب نقدر نحل مشاكل بلدنا.

تفتكر ايه تانى فى البلد عاوز حلول سريعة؟

[Hussein1974 0]

انا شغال فى تجارة الملابس بالجملة يعنى بوزع ملابس للمحلات بس لحسابى.انا اصلا زمان كنت فى اداب انجليزى ببنها بس حصلت قصة طويلة المهم دخلت الجيش وبعدين سبت الكلية من غير مامتحن ولا حتى مادة واحدة بسبب موظف منه لله مش مسامحه مشانى فى طريق غلط.المهم سبت ورقى فيها واشتغلت بس انااصلا طموحى من زمان انى ادرس لانى باعشق التدريس.عشان كده بعد ماتجوزت واستقريت لقيت نفسى بين امرين.اسعى انى ارجع اداب بنها تانى او ادخل تعليم مفتوح فاخترت التعليم المفتوح.

[محمد سعيد جويلي 0]

ياااااااااااه مشوار كبير بس بجد إنت إنسان طموح وأكيد ربنا هيوفقك إن شاء الله

[Hussein1974 0]

شكرا يامحمد وانت كمان باذن الله.المهم مردتش على سؤالى.

[محمد سعيد جويلي 0]

أكبر مشكلة كمان بنعاني منها هي مشكلة الاقتصاد المصري

[محمد سعيد جويلي 0]

ودي حلها زي مانت عارف الشيخ محمد حسان ربنا يباركله
بس يارب مصر كلها تتكاتف وتنفذ بجد

[Hussein1974 0]

الراجل ده فعلا مالوش اى غرض سياسى.فعلا ربنا يباركله.

[محمد سعيد جويلي 0]

المهم دول أهم مشكلتين بجد
وهي تتلخص في الأمن واتكلمنا عليه
والأمان ويتمثل في الاقتصاد

يعني الأمن والأمان

شفت بأه في كلمتين تقدر تلخص مشاكل مصر وكل كلمة ليها الجوانب بتاعتها

[Hussein1974 0]

ايوة ماهو احنا سهل نحدد المشكلة وسهل نحدد حلولها بس صعب جدا تنفيذ الحلول.لان اى مركب لازم يكون ليها ريس واحد وللاسف فى كل مكان الكل عاوز يبقى الريس.

[محمد سعيد جويلي 0]

كلامك مظبوط يا حسين وإن شاء الله تفائل خير
مصر هتكون أحسن إن شاء الله
مش كل إللي حصل ده بقدرة وحكمة ربنا
يبأه هنخاف ليه
طالما دي قدرة ربنا
يبأه أكيد ربنا هيخرجنا من الأزمة دي على خير
وأكيد ربنا بيسخر ناس كتير صالحة في خدمة البلد دي
وأكيد إللي جاي هيبأه أحسن ولو طال انتظارة فترة

مصر بخير يا حسين

مصر بخير والحمد لله

بس مصر تعبانة مريضة شوية

ومحتاجه علاج

والأطبه بيداوروا على العلاج

وربنا هيوصلهم ليه إن شاء الله

[Hussein1974 0]

كلامك كله كويس يامحمد وياريت نلاقى ناس كتير تحب بلدها عشان نوصل للعلاج زى مابتقول ومصر تقوم بالسلامة وتتعافى وترجع اقوى من الاول.بس الخوف اعداءها ميدوناش الفرصة لكده عشان كده اتمنى اننا نكون اقوى من اى ظروف.

[محمد سعيد جويلي 0]

المهم أستأذنك يا صاحبي
لأني من متابعي مسلسل خاتم سليمان والحلقة الأخيرة تقريباً النهاردة الساعة 11 دلوأتي على قناة CBC دراما .
والنهاردة أحداث المسلسل مهمة أوي لإن الثورة هتقوم النهاردة
وبجد المسلسل ده رائع بيوريك أد إيه كان بيظلم النظام الفاسد قبل الثورة
وكل شئ قبل الثورة لإن المسلسل ده حلاوته إنه إتعمل بعد الثورة وبيحكي عن كل شئ
معلش يا حسين أشوفك بكرة
لإن المسلسل بدأ

[محمد سعيد جويلي 0]

وأنصحك إنك تتفرج على الحلقة دي