قالوآ نسيته قلت أنا مقدر أنساه ♥ " طقوسنا أيام الأمتحانات "

[Miss sad 0]

القــــهـــــووووه

صوت أمي ياحبيّ لها نداء على البريك الأجباري للقهوه , وماهي إلا دقايق إلا هزه أرضيه من هالي نزلوا يتقهوون
ماشالله وأنتم ماتجون إلا اذا صار عندنا امتحانات
يجي صوت الأخو الكبير الي مسير على أهله ذاك الوقت >> أخلاص في الشرح
لي يومين ماشفت أمي وبعدين تقهووا وضفوا رجاءً لاتدقين وتقولين ماحليت منك ترا اعرفك تسوينها وتسقطين كلش علينا
ايه وش عليك ماعندك شي وفاضي ماغير رايح جاي من الفراغ < ويبدأ التنحت عاد

ويبدون يتفنجلون وكنهم أول مره يشوفون بعض

تذكرون يوم نطلع للبر ذاك اليوم , من زمان العام أظن <<

وشوي تدخل أختي : هلا هلا << الي يشوفنا يقول ما شافوها من شهر ما كنها أمس عندنا


,

صباح ومساء الخير كلن ع حسب الساعه البيولوجيه حقته



طبعاً بعد المقدمه المكتوبه أعلاه .. ذكرت الأغنيه الي كانت تجي في القناة الأولى من زمان
ذاكر دروسك ترررم أول بأول ترررم تنجح وتصير الأول ..
دايم أمي ترددها بايام الأختبارات أول ..



طبعاً لايخفاكم أيام الأمتحانات وش يصير لأبناء الشعب .. في هذه الحاله المساجد تمتلي ويجينا مطر بعد من كثر خشوع الطلاب ومداومتهم ع الصلاة في أوقاتها ..
وخيرات كثيره كثيره تعم بأثرها البلاد .. , وحالة أستنفار قصوى لمعشر البنات في تنظيف
غرفهم , وترتييب الدواليب بعد ماكانت تشكي الملابس ههههه ..!!


طبعاً .. بأقفز عن أيام المراجعه إلى عصر الجمعه يعني بكرا أول أمتحان السبت ..
الكل يدخل ويسكر على نفسه باب غرفته خلاص عاد بنذاكر بدأ العد التنازلي يعني
إلا الباب الغرفه : طق طق طق ..
هااااااااه وش تبين / مسبقاً أعرف أنها مرسول الحُب أخر العنقود هذاك الوقت
خذي هذي من تركي , وأفتح الورقه إلا العاهه يدور حرش كاتب عيارتي
وأشق أقرب ورقة من دفتري .. وأقعد أكتب له مافيه كلمه مشفره ماكتبتها له
وأبد يروح عصرنا وأحنا نتراسل هواش , وأغاني , والي تبون , لين مايجيني هو ولا أجيه أنا .. ونتكي عند بعض مافيه ذكريات مانجيبها أيام الكوره والشارع الأصفر وكل شي يجي ..
لين يأذن المغرب , همن صدق أحس يومي راح علي .. همن خلاص أبذاكر ياخي خلني وأتوعده أن جاني رسايل ولاشي لأعلم أبوي .. وأنا نصابه أحتريه أصلاً ..

أمدانا ندخل ونبدأ شوي إلا أمي تنادينا على البريك الأجباري حقنا .. ماتسمعون
إلا قوة صفق في بيبان الغرف ههههههههههه من الحماس ع أساس مذاكرين يعني .. عاد تعرفون الضمير لئيم أوقات بزود أصير أجيب كتابي وأحطه في حضني وأسولف وأتقهوى معهم وأذاكر .. يصير عشرين في واحد مهب ثلاثه عادي هههههههه
وأقعد أحفظ التعاريف بصوت عالي شوي أبيه يثبت في مخي بس .. تروح ساعتين وأنا متكيه على هالحال ..

من بكرا ندخل على أمي وتقول هاه بشرو سبع ولاضبع
أنا : وش الشين منهم // ماحليت
العاهه : ناجح كان فوق الأمتياز شي عطوني إياه

طبعاً بالنهايه أنجح أنا وهو يحمل مواد ..


وبعد مادخلت الجامعه عقلت واجد والله .. بعد ماتخرج العاهه وفكني من شره ومراسيله أختلفت طقوسي أكيد .. ..
صرت اذاكر بالغرفه بالليل وبالبيسمنت بالنهار .. يقالكم ابغير يعني
جنبي كوب قهوه وهاتك ياتخطيط بالهاي لايتر الوان وسريري كل ابوه قلامه ونوتات الملونه ذيك .. مدري وش الحكمه صارت تلازمني دايم ..
واشوف الماده كم تحتاج وقت .. اييييه زين يمديني اسولف شوي بالثابت الي أفتقده أيما أفتقاد هههههههه ..
أتصل على صديقتي ع اساس بشوف المهم كان شي ناسيته ولاشي وتطول السالفه طبعاً سالفه تجر سالفه كالعاده ..
همن نسكر ونبدأ نذاكر .. إلا شوي يرن الجوال , هاااه :< الله من زين النفس بعد هههههههههه .. عاد النفسيه بأمتحانات الجامعه شينه دايم ..
لأن الحرص ذابحني على هالمعدل ... وتخرج العاهه .. له دور أكيد في ذلك فهو يخفف وطأة الأمتحانات عني << متعوب عليها الجمله الأخيره قوه
دايم يعطيني دفعات معنويه يقعد يحسب لي كم يبيلي وأنجح في المواد منول في الثانوي وأنبسط اذا قال لو تجين تكتبين اسمك على الورقه وتطلعين نااااجحه
كنت أحس بثقه قويه .. ولا أراجع ..
هذي كنت أتقبلها بالثانوي .. أما بالجامعه اجيه يحسب لي كم غلط وأطلع عن A << قايله لكم عقلت
المهم تعطيني فقره فقرتين واقفل وخلاص أمسك خط لين البريك الأجباري أطلع أخذ فنجالين ثلاثه أربعه .. وأرجع لغرفتي ..
طبعاً يُحرم على عيوني النووم بأيام الأمتحانات في الجامعه .. ما أنام لو أيش وأظن هالشي الي دمر ساعتي البيولوجيه لدرجة مذكر كم لي مانمت بالليل
وأصير كني ساعه خراش كلن يقول قوميني الساعه الفلانيه ..
ويتخلل هالشي اوقات راحه أشيك على اقلاع واطلع , أفتح موقع الجامعه , أدور طبخات , أكتب وصفة تطويل الرمووش وهذي ما أذكرها إلا وقت الأمتحانات أبحث عنها مدري ليه ..

[Miss sad 0]

أأأأأأأأأأأأأأأأأأأأأأأأأين الردود..

[Miss sad 0]

ماهاذا؟؟؟؟؟؟؟؟؟؟

[Joly. 0]

نيهاهاهاها

سحقا لي آنآ آول ﻣﻥ̴‏​‏​‏​​‏​​ ردد

هيا هيا آنقلعي رديت

[Miss sad 0]

أكرميني بسكوتك.

[Miss sad 0]

[Vanilla 0]

مشكووووره
تقبلي مروري ياقمر