استفسار بين سؤالين....!! 411

[maye shammout 0]

زملاء و زميلات الترم السابع...

يا ريت حد يرد عليا في الموضوع ده لاني محتاره بجد بين السؤالين دول هل هما بيحملوا نفس الاجابة و لا ده اجابه و التاني اجابة منفصلة؟؟!

س1 اعرض لاهم الاطوار و المراحل التي مرت بها المقالة العربية.

س2 تحدث عن التطورات التي لحقت بأسلوب المقالة على مختلف مراحلها.


و لكم جزيل الشكر،،،

[maye shammout 0]

فينكوا يا جماعة؟؟ الامتحان بعد يومييييييييين!!

[dalia 0]

دي الإجابات عن السؤالين من التطبيقات بتاعة الدكتور التيرم اللي فات:

اعرض لأهم الأطوار والمراحل التي مرت بها المقالة العربية.
مرت المقالة العربية بعدة أطوار ، والتي تحددت في أربعة ، هي :
1- طور المدرسة الصحفية الأولي ، على نحو ما يمثلها كُتَّاب الصحف الرسمية التي أصدرتها الدولة أو ساعدت في إصدارها . وهو طور يبدأ من معرفة العرب بالصحافة حتى الثورة العرابية ، ومن أهم أعلام هذه المدرسة رفاعة الطهطاوى. وقد غلب الطابع السياسي على هذه المرحلة . أما من ناحية الأسلوب فقد اعتمدت على الأسلوب الأدبي الكلاسيكي ( التراثي ) القائم على السجع والزخارف اللفظية والمحسنات البديعية .
2- الطور الثاني المرتبط بنشأة الحزب الوطني ، القائم على دعوة جمال الدين الأفغاني ( واحد من أهم مفكري العصر الحديث ) . وأهم أعلامه عبد الله النديم ، إبراهيم المويلحي . وقد تمثلت أهم صحف هذا الطور في صحف " الأهرام " ، "الفلاح" ، " الحقوق " . وقد بدأ الأسلوب الفني في هذه المرحلة يتحرر تدريجياً من الأسلوب الأدبي التقليدي .
3- الطور الثالث ، ارتبط بفترة الاحتلال الإنجليزي ، خاصة مع بداية ظهور النزعات والميول الحزبية . وقد تمثلت أهم صحف هذه الفترة في صحف : " المؤيد " ، " اللواء " ، " الجريدة " . ومن أهم أعلام هذه المرحلة الشيخ على يوسف ، مصطفى كامل ، محمد رشيد رضا ، خليل مطران ، أحمد لطفي السيد ، أمين الحداد ..... . وقد تطور الأسلوب الأدبي في هذه المرحلة كثيراً ، وتخلص تماماً من القيود اللغوية الشكلية التقليدية .
4- الطور الرابع ، ما يسمى بالمدرسة الحديثة . وقد بدأ هذا الطور مع بداية الحرب العالمية الأولى ( 1914 – 1918 ) وقد ارتبط هذا الطور بظهور عدد من الصحف والمجلات المهمة ، مثل : " الاستقلال " ، " النهضة المصرية " ، " السياسة " ، " البلاغ " ، " كوكب الشرق " ، " الأخبار " ، " الأسبوع " ، : المصري " ، " صوت الأمة " ، " الدستور " ، " أخبار اليوم " .
ومن أهم أعلام هذه المرحلة محمد حسين هيكل ، طه حسين ، إبراهيم عبد القادر المازني ، محمد تيمور . وقد ركز هذا الطور على الدقة العملية والجانب الثقافي .

تاريخ فن المقالة:
تعرضنا فيها لتاريخ فن المقالة ، بدءا من التراث الإغريقي، ومرورا باللاتيني ثم العربي. وتوقفنا عند أهم المدارس والأطوار التي مر بها فن المقالة في عالمنا العربي، التي تمثلت فيما يلي:
1- المدرسة الصحفية الأولى
2- مرحلة الإصلاح التي ارتبطت بنشأة الحزب الوطني، وبدعوة جمال الدين الأفغاني
3- طور ارتبط بفترة الاحتلال الانجليزي، وبروز النزعات الحزبية
4- طور المدرسة الحديثة
** ** **
تحدث عن أهم التطورات التي لحقت بأسلوب المقالة على مختلف مراحلها.
التصور المقترح للإجابة، مع ترك التفاصيل للطلاب:
فلقد مرت المقالة العربية بعد مراحل ، طُبعت فيها بعدة خصائص تميزها عن بقية المراحل الأخرى. ومن أهم هذه المراحل، ما يلي:
أولا: مرحلة النشأة أو المحاولات الأولى:
تلك التي تمثلت في كتابات رفاعة الطهطاوي ومعاصريه وتلامذته.
ثانيا:مرحلة الدعوة إلى الإصلاح:
التي بدأت بدعوة جمال الدين الأفغاني، وقد مثلتها كتابات سليم النقاش وسعيد البستاني وعبدالله النديم وإبراهيم المويلحي ومحمد عبده.
ثالثا: مرحلة طلائع المدرسة الحديثة:
التي ارتبطت بالدافع الوطني، متأثرة بأفكار الحزب الوطني، وقد تمثلت تلك الأفكار في كتابات الشيخ علي يوسف ومصطفى كامل وأحمد لطفي السيد.
رابعا: مرحلة المدرسة الحديثة:
تلك التي تزامنت كتاباتها مع ثورة عام 1919، ومن أهم أعلامها : طه حسين ، محمد حسين هيكل ، إبراهيم عبد القادر المازني، عباس محمود العقاد، عبد العزيز البشري، يحيى حقي.
** ** **
السؤالين شبه بعض جداً فعلاً، بس في الكتاب على ما أتذكر، حتلاقي إن في حاجات مختلفة

[lovebird 0]

ميرسيي علي الاجابة ياداليا

انا برضه كنت محتارة في السؤالين دول

[maye shammout 0]

جزاكي الله كل خير يا داليا على مجهودك بس ده موجود عندي فعلا في التطبيقات لكن لو قريتي كويس هتلاقي انوه جاوب ع السؤال الاول بالتفصيل اما في التاني ف كتب النقاط لنفس الاجابة بس سيبلنا احنا نكمل التفاصيل مش اكتر هل ده معناه انهم نفس الاجابة ولا هنضيف تفاصيل تانية ؟؟

ده قصدي ف لو فهماني انا في انتظار ردك،،،

[Hamdy Tawfik-manar9 0]

علي فكرة انا فاكر السؤال ده كويس وهما سؤال واحد مش سؤالين

بتذكري اسم او عنوان كل مرحله وفترتها الزمنيه ... واهم مميزات المقال في تلك المرحله... واهم الشخصيات او الادباء البارزين في كل مرحله او الجرائد و الصحف التي تعبر عن تلك المرحله

والكلام ده مش بيزيد عن 4 او 5 سطور كاقصي حد تحت كل مرخله

والاجابه انا فاكر موجوده اما في المحاضرات او الكتاب

يعني انت ممكن تدمجي الاجابتين اللي كتبتهم داليا

بحيث تضيفي للاجابة الاولي الحاجات االي موجوده في الاجابة الثانية

ومش موجوده في الاولي ( انا شخصيا عملت ملخص بالشكل ده )

ولو اكتفيتي باجابة واحده منهم برضه صح

وماتقلقيش ان فيه اختلافات في عناوين بعض المراحل مادام هتشرحي

سمات المرحله واهم الادباء المرتبطين بيها

[dalia 0]

maye shammout كتب:

جزاكي الله كل خير يا داليا على مجهودك بس ده موجود عندي فعلا في التطبيقات لكن لو قريتي كويس هتلاقي انوه جاوب ع السؤال الاول بالتفصيل اما في التاني ف كتب النقاط لنفس الاجابة بس سيبلنا احنا نكمل التفاصيل مش اكتر هل ده معناه انهم نفس الاجابة ولا هنضيف تفاصيل تانية ؟؟

ده قصدي ف لو فهماني انا في انتظار ردك،،،

لا شكر على واجب

فاهمة قصدك والمشكلة بس إني مش فاكرة بالظبط الدكتور كان قال إيه على الفرق بينهم، بس زي ما حمدي بيقول برضه، الإجابة قريبة جداً في الاتنين، فلو دمجتي الإجابتين على إنك تحطيلك كام حاجة من عندك، يبقى ما تقلقيش

وإن شاء الله خير يا رب

[dalia 0]

مي، على فكرة، لما بصيت على الكتاب بتاع 411، الوحدة التانية والوحدة الرابعة، هما اللي بيتكلموا على الموضوعين. أعتقد واحد بيتكلم عن الموضوع من وجهة النظر التاريخية، يعني كل مرحلة جت امتى وإيه الأسباب اللي وراها وكده. والتاني بيتكلم عن الموضوع من وجهة نظر خصائص أو العلامات اللي بتميز كل مرحلة، يعني مين أشهر كتابها وإيه ملامح كتابة المقال في كل مرحلة وأمثلة عن الكتاب وطريقة كتابتهم

يارب أكون أفدتك ولو بمعلومة صغيرة...

[Hamdy Tawfik-manar9 0]

معلش بقي ياداليا ... اقتراحي احسن وعملي

انا خبرة في التعامل مع الامتحانات .. اساسا كنت بذاكر الامتحانات فقط

شوفي يا مي ... انت ادمجي الاجابتين زي ماقولتك واول ما تلمحي اي سؤال منهم

تقومي علي طول لطعه له الاجابه الكاملة في الورقه

وهو هيبقي عنده كل حاجه.. الفترة الزمنية او التاريخية ومعاها السمات والادباء

وهو يختار بقي براحته

بتكلم جد والله ... دي الطريقة المضمونه .. وخديها من واحد كان محترف مذاكرة في اسبوع الامتحانات

والحمد لله كنت فايت في التعليم المفتوح زي السكينه في الحلاوة

[dalia 0]

HAMDY كتب:

معلش بقي ياداليا ... اقتراحي احسن وعملي

انا خبرة في التعامل مع الامتحانات .. اساسا كنت بذاكر الامتحانات فقط

شوفي يا مي ... انت ادمجي الاجابتين زي ماقولتك واول ما تلمحي اي سؤال منهم

تقومي علي طول لطعه له الاجابه الكاملة في الورقه

وهو هيبقي عنده كل حاجه.. الفترة الزمنية او التاريخية ومعاها السمات والادباء

وهو يختار بقي براحته

بتكلم جد والله ... دي الطريقة المضمونه .. وخديها من واحد كان محترف مذاكرة في اسبوع الامتحانات

والحمد لله كنت فايت في التعليم المفتوح زي السكينه في الحلاوة

بجد فطستني من الضحك وأنا كنت محتاجة أضحك في الأيام اللطيف اللي إحنا عاشينيها دي قبل

الامتحانات...حسستتني إننا اتنين مندوبين مبيعات وبنلزق للبنية أمشاط وفلايات مثلاً

طبعاً نظراً لضيق الوقت، فأنا معاك إن طريقتك أسهل وأأمن

[maye shammout 0]

الف شكر يا استاذنا العبقري حمدي ربنا يكرمك بجد و نصائحك قيد التنفيذ ! هو ده اللي عاوزه اوصلوه ان الاتننين اجابة واحده ... و بشكرك بجد يا داليا على تعبك معايا انا عارفه دوختك معايا بجد ،،، وربنا يعديلنا الايام الجايه ده على خير و يوفق الجميع ان شاء الله .

[maye shammout 0]

معلش يا استاذ حمدي هتعبك معايا يا ريت تقولي كنت بتعدي ازاي في سؤال كتابة المقالة لاني مش شاطرة في كتابة المقال و مش عارفة هيعدي معايا ازاي؟؟؟
يا ريت تقولي كنت بتحل المشكلة ده ازاي!!

[Hamdy Tawfik-manar9 0]

اكتب لي صيغ السؤال في الامتحانات علشان انعش ذاكرتي .. انا بتاع امتحانات بس

[Hamdy Tawfik-manar9 0]

ايوه انا افتكرته من خلال تعليقي في احد المواضيع السابقة

الامتحان سؤالين


السؤال الاول

اختياري من بين 3 اسئله

ا تعريف المقالة الموضوعية مع ذكر انواعها
او
2- السمات والتشبه من عدمه بين فن المقال وفنون اخري
او
3 - اعرض لمقال قراته مناقشا قضيته وعارضا لاهم خصائص الكاتب


اما السؤال الاجباري

كتابة مقال عن احداث غزة الاخيرة

ده الامتحان اللي انا امتحنته وزي ماانت شايفه المقال كان عن احداث غزة يعني قضية عامة سهل اي حد يتكلم فيها مادام عنده المام ببعض المعلومات البسيطة

اعتقد انه سؤال المفروض تكون درجته مضمونه .. ومش لازم يبقي مقال طويل لكن يكون مكتوب بموضوعية وعناصره تبقي متكاملة ..زي اي موضوع تعبير من اللي كنا بنكتبه في الثانوية

عموما في اكتر من موضوع في المنتدي كان بيتكلم عن طريقة كتابة المقال وشروطها ..هابقي ادور عليهم واضع لك روابطهم هنا في الموضوع

[maye shammout 0]

ماشي يا كبييييييييير!! خود عندك >>> ده سؤال امتحان 2009:-


اكتب مقالا تستعرض فيه تقييماَ لأحداث غزة الأخيرة.
(على ألا يزيد المقال عن ثلاثين سطراَ، أو صفحة واحدة فقط.)

في انتظار رد حضرتك

[maye shammout 0]

ايوه بالزبط! انت رديت عليا بس مختش بالي من اخر رد ... على العموم جزاك الله كل خير و في انتظار الروابط بس معنى كلامك انك مكنتش بتعتمد على اسلوب معين في كتابة المقال مجرد بتستعرض رايك بنفس الطريقة اللي كنا بنستخدمها في الثانوية العامة

[Hamdy Tawfik-manar9 0]

اهلا مي

انا شخصيا كنت بكتب بغض النظر عن القواعد يمكن لاني شوية متعود علي الكتابة

لكن هناك مجموعة قواعد بسيطه المفروض مراعاتها هلي حسب مااتذكر من المحاضرات

اولا الموضوع يقسم الي خمس فقرات

الفقرة الاولي هي الافتتاحية التي تقومين فيها بالتعريف عن الموضوع الذي تتحدثين عنه والنقاط او الجوانب المختلفة التي ستتناوليها

الفقرة الخامسة او الاخيرة تكون الفقرة الختامية والتي تضعين فيها النتيجة النهائية التي وصلت اليها او ملخص الموضوع وهي تتشابه الي حد ما مع الاولي

اما الفقرات الثلاثة في المنتصف فهي مايطلق عليه محتوي الموضوع وفيها تعرضين لجوانب الموضوع المختلفة علي اصعدة مختلفة

يعني مثلا لو تتحدثين في مقالك عن اسباب تاخر العالم العربي عن ركب التنمية

ممكن في احدي الفقرات تتكلمين عن تخلف مناهج التعليم في الدول العربية وانتشار الامية وتسوفين امثله تؤيد كلامك

وفي الفقرة الثانية تتكلمين مثلا عن الاسباب السياسية التي تؤدي للنخلف مثل الاستبداد السياسي وتخلف القوانين وفساد اجهزة الدولة وقصور القوانين مع ضرب امثله ان امكن

وفي الفقرة الثالثة تتحدثين عن بعض الاسباب الاقتصادية التي تعوق تطور المجتمعات مثل سوء توزيع الثروة والتفاوت الطبقي وسوء التخطيط والفساد المنتشر

وطبعا كما اسلفت الفقرة الاولي والنهائية تكن عبارة عن مقدمه وخاتمه

كل فقرة من الفقرات بتكون من اربع الي خمس سطور ( مساله تقريبية فقط )


وليس شرط ان يكون الكلام متكلف او مفخم بل اكتبي بتلقائية وبجمل بسيطة

لكن فقط حاولي ان تجعلي فكرة الموضوع واضحه

وان يكون هناك رابط مشترك ورؤية واضحه تجمع كل فقرات الموضوع

وحاولي ان تكوني موضوعية في عرضك دون تحيز او إعلاء جانب علي اخر


وممكن تتحرري من كل تلك القيود وتكتبي علي طريقتك لكن المهم يكون موضوع متجانس ومترابط

ويكون كل جزء فيه يحمل فكرة فرعية واضحه وكلها تصب في الفكرة او الهدف الرئيسي للموضوع


وستجدين في الرابط التالي موضوع متعلق بالمقال

/montada-f11/topic-t253.htm

[maye shammout 0]

جزاك الله كل خير اخ حمدي ... ألف شكر