اتعقدت من كليتى

[new hope 0]

السلام عليكم ورحمة الله وبركاته .. انا عضوة جديدة هنا معاكوا .. عجبنى جدا المنتدى والتفاعل اللى فيه وحبيت اشترك وعندى مشكلة عايزاكوا تنصحونى
انا مشكلتى بقى انى مش عارفة انا عايزة ايه .. يعنى انا كنت من المتفوقين فى الثانوية العامة الحمد لله وكان نفسى ادخل اعلام وجبت 93.5 وفرقت على نص درجة ومدخلتهاش .. بس كان مجموعى يجيب السن لكن انا كنت بحب التاريخ جدا بعد الاعلام وقولت ادخل المجال اللى بحبه وفعلا دخلت اثار وافتكرت انى كدة دخلت المجال اللى بحبه بس الحقيقة انى اتعقدت اكتر وفضلت قاعدة فى الكلية وانا مبحبهاش 4 سنين مفكرتش حتى انى احول منها لانى مكنتش لاقية حاجة بحبها ومش عارفة انا عايزة ايه
دلوقتى اتخرجت وبروح اقدم فى شغل كتير طبعا بيبصوا على مؤهلى انه مؤهل ملوش لازمة وانه نادر ومالوش شغل
كله بيستغرب انه مجموعى كان يجيب السن ومدخلتهاش ويقولولى فاتك نص عمرك وانا مبعرفش ارد اقول ايه لانى حتى المجال اللى اخترته اما درسته محبتهوش
فكرت ادخل اداب انجليزى تعليم مفتوح دة اخر ما احترت وفكرت ادخل السن تانى بس ناس قالتلى مينفعش بعد التخرج او ادخل لغات وترجمة اللى تبع الازهر بس معرفش ينفع ولا لا
وفكرت اخد لغات واعمل دبلومة ارشاد وابقى مرشدة بس حسيت انه مش هينفع مع المسئوليات المستقبلية زى الجواز 
احتارت واتعقدت وطبعا مبلومش الا نفسى انى حتى مفكرتش احول منها اما لقيت نفسى محبتهاش
ومش عارفة اعمل ايه بس كل اللى بفكر فيه دلوقتى انى اغير مجالى اللى درسته
تنصحونى بايه

[Hamdy Tawfik-manar9 0]

وعليكم السلام ورحمة الله

اهلا بك في منتديات المنار

العمل في مصر أساسا بيعتمد علي الواسطة للاسف وبعد كده اي شيء تاني

لكن اعتقد انك لو اتقنتي اللغة الانجليزية هيفتح لك مجالات شغل مع مؤهلك او في مجالات اخري

والتعليم المفتوح ميزته انه مرن ومناسب لكل الظروف

لكن اتقان اللغة هيحتاج مجهود ودراسة ذاتية واحيانا كورسات .. يعني مش هتكتفي بالدراسة في التعليم المفتوح 

هتلاقي نصائح كتير في المنتدي وعلي الانترنت عموما عن طرق اتقان اللغة

وازاي تعرفي ان مستواكي بقا احترافي ام لا ؟

بس باختصار من وجهة نظري المتواضعة خلي هدفك انك تقدري تحققي سكور اكترمن 100 في التوفل

او 7.5 في  الايلتس 

وده سكور مش سهل خالص لكن لما تحقيقه هتكوني وضعتي قدمك علي بداية الطريق

وبعون الله بتعزز فرصك في الحصول علي وظيفة جيدة

وان شاء الله الاخوة والاخوات يفيدوكي بنصائح اكثر افادة مني

بالتوفيق

[Hamdy Tawfik-manar9 0]

وينقل الموضوع الي قسم كلية الاداب 

[new hope 0]

شكرا لحضرتك يا استاذ حمدى .. حضرتك لفت نظرى لحاجة مهمة فى موضوع درجات التويفل خاصة واتقان اللغة عامة وانا ناوية اعمل كدة لان مفيش حل تانى ولانى اكتشفت حبى للغات ولكن متاخرا .. بس ازاى حد يجيب اعلى من 100 فى التويفل   
و المشكلة انى دايما بتجيلى افكار سلبية ليه ضيعت فرصة من ايديا وليه وليه والكلام دة كله 
وفى انتظار ردود باقى الاخوة والاخوات

[new hope 0]

لكن ايه الايلتس دة ؟

[Hamdy Tawfik-manar9 0]

الايلتس دا امتحان زي التويفل لكن British English 

اما التويفل American English 

التوفل درجته النهائية من 120 بينما الايلتس درجته النهائية 9 

الامتحانين متشابهين في انهم بقيسوا مهارات اللغة المختلفة Speaking, listening ,reading and writing 

انت ركزي حاليا في دراسة للغة واساسيتها 

وموضوع امتحان التويفل او الايلتس دي مرحلة متأخرة

وفي شهادات تانية طبعا مختلفة

ومع الوقت هتتعرفي علي كل الحاجات وتختاري اللي يوافق احتياجاتك

بس المهم البداية مع العزيمة والتفاؤل

[abo nooh 0]

ربنا يوفق الأخت  وفعلا  جابت  نتيجه ممتازه   في المعدل    وكلام الأخ حمدي ممتاز  في التوجيه  للتوفل والآيلتس   و ربنا  يسهل على الجميع

المواضبه  مع الإستمراريه  ولو للمجهود  القليل مع ديمومه العمل  هتوصل الواحد لجميع أهدافه ب إذن الله تعالى