إختبار القبول كلية دار العلوم .. معلومات هامة

[hany ell boss 0]

  

أنا اليوم إمتحنت " إختبار القبول " فى كلية دار العلوم جامعة القاهرة تعليم مفتوح .. والحمد لله ناجح وعرفت النتيجة فى وقتها .

ولكن الأيام إللى فاتت كنت أبحث عن ( طريقة الإختبار- وكيفية الأسئلة - وصعبة أم سهلة - و ما زمن الإختبار .... إلخ )

وللأسف لم أجد فى النت كله شىء يشفى غليلى .. كلها مثل بعضها صفحة يتناقلها كل المواقع دون جديد .

فقلت لابد أن أفيد بتجربتى إخوانى .. ربما بحث أخ عن تلك المعلومات فى يوم من الأيام ودعا لى بحسن الخاتمة إذاكنت حي وبالرحمة إن كنت فى عداد الموتى .....

** نتوكل على الله ونشرح خطوة خطوة من اول ما تدخل للتقديم فى الكلية إلى ظهور نتيجة الإختبار .. شرط أن تدعو لى بحسن الخاتمة ... إتفقنا يا نجم إنت وهو  

1 - بتذهب إلى مقر التعليم المفتوح جامعة القاهرة أمام باب كلية تجارة .

2 - بتدخل برجلك اليمين  لو بالشمال هتبقى بداية غير موفقة  على شباك التقديم .

3 - هتقول للموظف عاوز أقدم فى كلية دار علوم لو سمحت يا برنس .. هتدفع 50 جنيه وهيديك إستمارة فيها

ميعاد الإختبار ( اليوم - الساعة ) .. لازم تحضر قبل الميعاد بنصف ساعة على الأقل .

4 - يوم الحضور هتدخل المقر الرئيسى إللى فيه شبابيك التقديم إللى أخدت منه الإستمارة .. هتصعد

تانى دور فى غرفة تسمى ( المسرح ) .. متخفشى مش هتشوف ممثلين ولا حاجة    

5 - هتدخل وهتقعد بأولوية الحضور .. وخلى بالك برده الإختبار بأولوية الحضور .. يعنى إللى هيجى بدرى هيمتحن بدرى .. هيجى شاب روش كدة وهيلم منكم الإستمارات .. هيلم حوالى 12 إستمارة .

6 - هيقولكم ( الواد الروش   ) إللى أخدت منه الإستمارة ييجى ورايا .. تروح نازل معاه يا برنس للدور الأرضى تانى .

7 - هتدخل على غرفة بها كمبيوترز كتير .. تقريباً على أد الإستمارات الـ 12 .. وهتقعد أمام كمبيوتر وهيقولك طلع البطاقة لو سمحت ( متخفشى مش تحريات ولا حاجة   ) .. وبرده هيديك الإستمارة تانى .

8 - هيلف على الحاضرين واحد واحد ويفتح له برنامج صغير موجود على الديسك توب فيه الأسئلة ..

والأسئلة عبارة عن إختيارات فقط .

9 - هتلاقى واجهه البرنامج بتقولك دخل ( رقم الإستمارة ) و ( الرقم القومى لبطاقتك الشخصية )

الـ 14 رقم كلهم . راجع عليهم كويس علشان متنساش رقم أو تكتب رقم غلط .

10 - هتلاقى " زر " مكتوب عليه فى الأسفل ( بدء الأسئلة ) .. أضغط عليه وتوكل على الله وجاوب

11 - الأختبار مدته 15 دقيقة كحد أقصى ... هتلاقى " تايمر " فى برنامج الأسئلة إللى بتحل فيه من فوق ومتخفشى مدة الإختبار هتكفى إن شاء الله وزيادة .. أنا راجعت كمان مرتين بفضل الله .

12 - كل كمبيوتر فيه إختبار مختلف عن الكمبيوتر إللى جنبه .. يعنى " نو غش "   

13 - الإختبار عبارة عن 21 سؤال إختيارات .. مثال للتوضيح :-

نجيب محفوظ صاحب قصة :

* قصر الشوق

* مصرع كليوباترا

*قنديل أم هاشم

وهتعلم بالماوس على الإجابة الصحيحة .. ( قصر الشوق طبعاً   )

14 - درجة النجاح هى ( 8 ) درجات .. يعنى أقل حاجة تنجحك هى ( 8 ) درجات من ( 21 ) .

15 - بعدما تحل و تراجع هتلاقى .. ( زر) تحت مكتوب عليه ( إنهاء الأسئلة ) إضغط عليه .. بس خلى بالك أوعى تغلط وتضغط عليه و إنت لسه بتحل علشان البرنامج هيتقفل وممنوع تفتحه تانى .. يعنى فى نهاية الإجابة فقط .. والإنتهاء من الإجابة تماما و خلصت يعنى ..... يبقى تضغط عليها يا نجم .

16 - أنا أول ما ضغطت عليه ..  لقيته طلع لى رسالة وقالى ( ناجح ) مجموع ( 14 ) من ( 21 ) . راح الواد الروش إياه قالى مبروك ناجح   . سبحان الله على طول كدة إيشى خيال يا ناس ( تحط الإجابة من هنا .. تظهرلك النتيجة من هنا ) وده قمة الإعجاز العلمى ( باسم يوسف   ) .

17 - وبس كدة خلاص فنيتو ....... ربنا يوفقكم .. وأتمنى أن تكونوا قد إستفدتم .. و أى سؤال

أنا تحت أمركم ......   

* ملحوظة :-

لا تنسى الدعاء لى بظهر الغيب بحسن الخاتمة ..   

[galal elmadny 0]

الف مبروك  ياهانى على هذه الخطوه


الايجابيه ومبروك على النجاح فى اختبارات


 القبول بكليه دار العلوم ..


 وشكرا على النصائح التى قدمتها لاصدقاء 


المنتدى لمن عنده اختبار القبول بكلية دار العلوم ..

[hany ell boss 0]

الله يبارك فيك يا " جلجل " .. ولا شكر على واجب إحنا إخوات

دعواتك لى بالتوفيق

[galal elmadny 0]

 

[عصام شهاب 0]

اسال الله لنا ولكم الاخلاص والقبول وبالتوفيق ان شاء الله  

[galal elmadny 0]

امين يارب العالمين

[hany ell boss 0]

آمين يا رب العالمين ....