اجتياز المقابله الشخصيه لقسم الترجمه

[hend nga 3]

واخيرا انتهت المقابلة الشخصية على خير وتمت بحمد الله اليوم

واستطيع اليوم ان اقول لكم بأنى فى الترم الأول

المقابلة كالأتى لمن سيأتى بعدى ويريد الأستفسار فأخى الكريم محمد شرح كيف تمت المقابلة

فى القاهرة واليوم سأقول لكم كيف تمت المقابلة فى احدى مكاتب الوكلاء بالسعودية

لقد قام الوكيل بجمع جميع المسجلين فى يوم واحد وهم ليسوا بالعدد الكبير

وبعد ذلك اتصل بالدكتورة على الهاتف الجوال وادخلنا واحد تلو الأخر وانا كنت الأولى طبعا

طلبت منى تقديم نبذة عن نفسى بالأنجليزة مع محاولة ضبط القواعد والجمل اثناء التحدث

عرفت عن نفسى سألت اكثر من سؤال عن نفس الموضوع ( التعريف ) والمقابلة كلها باللغة

الأنجليزية ولكن الدكتورة كانت تتحدث ببساطة وكلام واضح ومفهوم ويسهل فهمه على

مستوى الطالب المتوسط

وبعد ساعتين من انتهاء المقابلة قام الوكيل بالأتصال وابلاغى بأنه تم قبولى فى الكلية

وسأتلم الكتب والباسورد بعد عشرة ايام

اتمنى ان اكون اوضحت الأمور اكثر لمن يرغب بالأستفسار مستقبلا

[Honey Bunny 0]

مبروك ليكي و لمحمد هند موفقة باذن الله حبيبتي.

[mohammad 0]

الف مبروك نجمة وربنا يوفقك وان شاء الله امتياز دايما
وعقبالي احسن باينهم قدمولنا ميعاد الامتحان وهيعذبونا على النتيجة قالوا يومين وهاتنزل ع النت ولسة لحد دلوقتي ما نزلتش وادينا صابرين
يالا اهو النت يكدب الغطاس

فيا عجبا لمن يعصى المحسن بعد معرفته بإحسانه ويطيع اللعين بعد معرفته بطغيانه‏.
ادَّخر راحتك لقبرك، وقِّلل من لهوك ونومك، فإنَّ من ورائك نومةً صبحها يوم القيامة
إذا لم تستطع أن تكون خادماً لدين الله .. فكن خادماً لخادمى دين الله

[mohammad 0]

مش عارف مين محمد هند اللي تقصده لوست

[hend nga 3]

اشكركم كثيرا اختى الكريمة lost واخى الكريم محمد .......

اعتقد lost افتكرت ان نتيجتك ظهرت لأنك امتحنت منذ ثلاث ايام

اعتبرها بشرة خير اخى الكريم

بالتوفيق والنجاح للجميع

[reham2010 0]

مساء الخير

بصراحة كده انا عايزة اقدم بس خايفة اوى من موضوع المقابلة ده..
احسن انا من النوع اللى بيخاف وببوظ الدنيا
كمان انا عايزة اقدم عشان احسن مستوى الانجليزى بتاعى..هل ده سبب كافى لو قلته ولا لازم اقول اسباب تانية؟؟
على اساس انى لو قلت الرد ده فمن الممكن انهم يسألونى..ليه مثلا مش بتاخدى كورسات..؟؟

بليز يا جماعة ياريت حد يرد عليا لحسن انا قلقانة اوى

[Hamdy Tawfik-manar9 0]

اهلا اخت ريهام

المقابله عبارة عن اختبار بسيط في اللغة ...لا يوجد اسئلة من تلك النوعية اللي طرحتيها

الا اذا كان فيه نظام جديد ماسمعتش عنه

عموما اقراي الموضوع من بدايته هتلاقي فيه اجابات لاسئلتك

[mohammad 0]

السلام عليكم
المقابلة فعلا اختبار بسيط في اللغة وكما شرح اخي حمدي وانا من ضمن الممتحنين هذا الترم وانا شارح ايه اللي بييجي في المقابلة في الموضوع بس انا اعتقد ان التقديم خلص مش عارف اذا كنتي تقصدي ترم شهر 9 الجاي ولا ايه؟

[reham2010 0]

هو لسه فى تقديم..بكره فى امتحان تحريرى.. ويوم الاربعاء الامتحان الشفوى..
لكن انا هقدم شهر 9..
بس فى حاجة محيرانى.. لما بقول لحد انى عايزة ادخل عشان احسن مستوايا فى اللغة بيقولوا لى ده سبب مش كافى..
فانا مش عارفة هل ده فعلا سبب مش كافى لو قلته فى المقابلة ولا ايه؟؟

[reham2010 0]

نسيت اقول حاجة..
صحبتى قدمت و نجحت و سالوها هى ليه قدمت..
هما دايما بيسالوا السؤال ده..

[hend nga 3]

عزيزتى ريهام انا قمت بالمقابلة الشخصية الأسبوع الماضر ربما تكونى قرأتى ما حدث معى فى اعلى الصفحة

عزيزتى انا سألتنى الدكتورة نفس السؤال المحير بالنسبة لكى
ليست الفكرة فى معرفة شعورك اكثر منه ان يحاول الدكتور معرفة قدرتك على الأجابة وكيفية الأجابة باللغة الأنجليزية وضبط

القواعد والجملة بشكل صحيح والدكتور دائما يسأل هذا السؤال لأنه فى اعتقاده بأنه الأسهل فى الفهم والأجابة عليه

فعلى سبيل المثال اجبت الدكتورة : بانى ارغب فى تحسين مستواى فى اللغة الأنجليزية وسيساعدنى ذلك فى التقدم فى عملى
كما انى ربما بعد انتهاء دراستى فى الكلية اكمل فى دراسات عليا فى الأدب المقارن لأنى تخرجت من الأزهر قسم لغة عربية
وكان رد الدكتورة بالعربى ( ما شاء الله - ما شاء الله (
على فكرة المقابلة كانت مكالمة تليفون استمرت حوالى 10 دقائق

اتمنى ان اكون اوصلت لكى الفكرة

نصيحة لا تجعلى ابدا اى شخص ان يقوم بأحباطك عن فكرة او حلم او رغبة
انتى الوحيدة التى تعلمين ماذا تريدى فى حياتك
اتمنى لكى التوفيق اعتذر للأطالة فى الكلام

[mohammad 0]

مانا كمان كنت من ضمن اللي امتحنوا الاسبوع اللي فات بس لم يقدر لي الله النجاح وان شاء الله هاحسن مستوايا واقدم شهر 9 بس انا اما رحت الامتحان التحريري احد الطلبة قاللي ان لو مانجحتش بتقدم اكثر من مرة وميعاد المقابلة اللي بعديها بيكون الفرق بينهم اسبوعين تقريبا على عكس ما ذكروا (المركز ) لما كلمتهم ف التليفون قالوا تقدم الترم الجاي يعني شهر 9 فمش عارف فين الحقيقة لاني اساسا لا اثق في كلام المركز كل ما اكلمهم احس اني بكلم السوبر ماركت كل شوية الاقي الشخص بيختلف عن اللي قبله وده مش وجه الاعتراض
وجه الاعتراض ان الشخص اللي بيتغير كل مرة مش عارف حاجة مرة يحولني على قسم الطلبة ومرة واحد=ة تسأل اللي جنبها على سؤالي بالظبط كأن التليفون محطوط في الشارع ولما يرن لو حد معدي من جنبه يرد
فلو حد عرف ان فيه تقديم قبل شهر 9 يقولنا ويبقى جزاه وجزاكم الله كل خيييييييير

[reham2010 0]

Star.H
انا متشكرة جدا على ردك ومفيش داعى للإعتذار خاااااااااالص طول براحتك عالاخر..
انا محتاجة انى اعرف كل حاجة عن الموضوع ده.. واى حاجة تقولها مهمة بالنسبة لى لانى من النوع اللى بيخاف اوى..
و كمان مش لاقية كلام اشكرك بيه على نصيحتك..بجد عندك حق..

[reham2010 0]

معلش يا محمد..عوضها فى شهر 9 ان شاء الله..
انا رحت الجامعة من كام يوم وسألتهم لو حد مثلا قدم و محصلش نصيب ينفع يقدم تانى؟؟
قالوا لى ينفع بس مش فى نفس الترم..(مش فاهمة ايه الحكمة بصراحة) !!
يعنى ربنا معاك فى شهر 9

[mohammad 0]

تتعوض ان شاء الله
وانتي برده عليكي انك تقوي نفسك في الترجمة لان الامتحان كله زي ما قلت ترجمة وتابعي صفحات الموضوع السابقة لللاستفادة
اما عن الحكمة من ان التقديم هايكون الترم الجاي فاعتقد عشان اللي مانجحش محتاج فترة لتقوية نفسه في الاساسيات
غير كده الشرط مكتوب جنبه اللي مش هيجتاز الاختبار لا يحق له التقديم الا في الكليات التي بدون مقابلة مثل تجارة وحقوق ...... بس ان شاء الله مصمم على اداب انجليزي وبمناسبة المقابلة الشفوية انا لم ادخلها لان النجاح في التحريري هو شرط دخول الشفوي وبالنسبة لـ Star.H مقابلتها كانت عبر الهاتف مش زي مركز القاهرة تحريري وشفوي عشان هي تابعة لمركز السعودية والحمد لله نجحت وهتوالينا طبعا بالاخبار ماهي هاتكون سبقانا بخطوة
ويااااااااااااااااارب توفق الجميع الى ما تحب وترضى

[Honey Bunny 0]

السلام عليكم ورحمة الله وبركاته
الاخت ريهام اولا اهلا بيكي اخت عزيزة معانا
ثانيا هقولك زي ما قلت لمحمد قبل كده مفيش داعي للرهبة والقلق الزايدين عن الحد
المقابلة او التحريري الهدف منها معرفة المامك باساسيات اللغة من تكوين جمل سليمة نحويا وتامة المعني مع الالمام بقدر من المفردات اللي تساعد في التعبير عن اي فكرة
التحريري وكما ذكر محمد عبارة عن كتابة موضوع ما" براجراف"
وده مش عبثا بالعكس ده عشان يشوفوا عمليا نتوا فاهمين ايه عن اللغة اللي هتدروسها مش عشان تعلموا ناس تانيين...لاء عشان انتوا هتتعمقوا في اللغة دي زي اللغة الام بالظبط لانكم هترجموا منها واليها
فطبيعي لازم عشان توصلوا للمراحل دي يكون فيه اساس سليم يتبني عليه
اتمني اكون وضحتلكم الصورة اكتر
في امان الله

[Eye.Of.Eagle 0]

السلام عليكم ورحمة الله وبركاته آخر رد في الوضوع كان بتاريخ شهر أبريل، يعني الواضح أني أتيت متأخراً، ولكني أرجوا من السادة ذوُ الخبرة إجابة بعض أسئلتي، ولهم جزيل الشكر.

أنوي بإذن الله التقدم لبرنامج الترجمة (لغة إنجليزية) أنا من سكان الأقاليم (محافظة سوهاج) .

أولا تجدر بي الإشارة بصدق إلى التدني الشديد لدرجة لا أستطيع وصفها بخدمات مركز الإتصال بالتعليم المفتوح جامعة القاهرة، فما من مرة أقوم فيها بالإتصال لأستفسر عن شيء إلا وأصابني الإحباط الشديد وحسبي الله ونعم الوكيل، بل أذكر أن أحد الزملاء هنا قد شّبه مركز إتصالاتهم بالـ (سوبر ماركت) لذا أجدني أقول -مع الإعتذار لصاحب التوصيف الأول- أن السوبر ماركت أشرف من هذا بكثير بل وأكثر تحضراً، ولله الأمر من قبل ومن بعد.

لم أحصل منهم على شيء، بل أصابتني صدمة حين سألت عن رسوم إجراء المقابلة الشخصية عن طريق الإنترنت فإذا بالمُجيب يقول: خمسون دولار أمريكي، فذُهلت وبادرت من فوري بإخباره أن موقعكم "المُحترم" يقول أن الرسوم عبارة عن خمسون جنيهاً مصرياً لا غير للطالب المصري، فأنا داخل الجمهورية ولست خارجها، فإذا به يكرر نفس الإجابة ويقول لي: خمسون دولار يا أستاذ، النظام إتغير..!

- فهل هذا الكلام صحيح يا أهل الخبرة؟ هل رسوم المقابلة الشخصية عبر الإنترنت للطالب المصري المقيم داخل الجمهورية خمسون دولار؟ (أنا لا أسأل عن الطالب الوافد أو المقيم بإحدى الدول خارج الجمهورية)

الأمر الثاني المُثير والذي يدفع للإحباط كذلك، بل هو المُر مذاقاً، أن الموقع الرسمي يذكر أنه بإمكاني إجراء المُقابلة مثلاً من ضمن الخيارات بإحدى الجامعات الإقليمية التي يتعاقد معها المركز، وحيث أن جامعه سوهاج من ضمن هذه الجامعات فأنا قد إفترضت أن ذلك ممكن، فإذا بي أسمع غير ذلك من جهتين: الأولى من هنا بسوهاج حيث أخبروني أن المقابلة الشخصية لا تُعقد لديهم بل في القاهرة، والجهة الثانية هي جامعة القاهرة نفسها مركز الخدمات حيث أجابوني قائلين: بل تُعقد المُقابلة عندنا وليست عندك أو على الإنترنت! وحين أخبرتهم أن موقعكم "المقبور" يقول بخلاف ذلك، أفادوا قائلين: النظام إتغير يا أستاذ! ولا أدري لماذا تذكرت وقتها برنامج (كلمتين وبس) للراحل فؤاد المهندس على إذاعة الراديو، فقد كان يكفي أن يستبدل هذا الذي أجابني اللقب من "إستاذ" إلى "مُحترم" لأعتقد أنني ربما أستمع للبرنامج ولست حقاً أقوم بتجربة شخصية..!

والله إن شر البلية ما يُضحك..!

وهذا رابط الموقع الرسمي والبيانات الرسمية (الواهية) لمن أراد التأكد: أنقر هنا فضلاً.

الآن بالصفحة الرئيسية بالموقع الرسمي جاء هذا الخبر:

اقتباس :

بدء التسجيل للفصل البيني أغسطس 2010 من السبت 14/8/2010 ويستمر التسجيل حتى يوم الخميس 26/8/2010، وتعقد الامتحانات من السبت 16/10/2010 إلى الخميس 21/10/2010.

عندي الآن سؤال يتعلق بالخبر أعلاه: ما هي تلك الإمتحانات التي سيتم عقدها في شهر 10 من يوم 16 إلى يوم 21؟ هل هذه المقابلة الشخصية؟! أم الترم الأول على أن يكون الترم الثاني في شهر يناير؟ وهل معنى ذلك أن السنة الدراسية الواحده في الأصل عبارة عن نصف سنة؟

لا أفهم وأرجوا إجابتي للضرورة حول هذه المسألة خصوصاً، حيث أتصور أن التعليم المفتوح كما التعليم العادي أو الطبيعي الذي أعلمه من أن الترمين عبارة عن سنة دراسية كاملة تقريباً "كالطبيعي بأي جامعه أخرى"، أما لو كان كما أتصور فهذا معناه التخرج بعد سنتين بإعتبار أن كل ترم تقريباً عبارة عن ربع سنة وليس نصف سنة فعليه تكون السنتان عبارة عن أربع ترمات.؟!!

السؤال التالي: بالنسبة لشهادة التخرج، هل إذا تقدمت لخوض الإمتحان بالجامعة الإقليمية بمحافظتي فهل ستكون شهادتي منها أم من جامعة القاهرة؟ فأنا أفترض أنها ستكون من الجامعة الأم وهي القاهرة ولكني قرأت في موضوع ذو صلة هنا بهذا الأمر أحد الزملاء أو الزميلات قالوا أن الشهادة ستكون من الجامعه الوكيل وبالتالي ستكون هنا جامعتي الإقليمية وليست القاهرة، فهذا هذا صحيح؟

إن صح هذا الأمر فهذا تخريف وأمر غير مفهوم..!!!!

أخيراً وأرجوا ألا أكون قد سببت إرهاقاً لكم: ما هو المطلوب مني في أول يوم للتقدم بقسم الترجمة؟ أقصد هل هي فقط الرسوم ومن ثم تحديد ميعاد إجراءها؟ ومتى يكون هذا الميعاد من يوم التقدم لها؟ هل هو نفس اليوم أم التالي أم الذي يليه أم ماذا؟

هل هناك أوراق مطلوبة إلى جانب رسوم التقدم؟ كشهادة التخرج مثلاً أو شهادة الثانوية العامة وشهادة الإعفاء النهائي من الخدمة العسكرية "وحيد أبيه المتوفى" رحم الله أمواتنا وأموات المسلمين.

إلى الآن لم أقرر بعد ما إذا كنت سأسافر للقاهرة لإجراء المقابلة الشخصية أم أعقدها عبر الإنترنت، ولكن إذا فرضنا أنني سأسافر، فكم يوماً إجمالاً قد أحتاج لإنهاء هذه الإجراءات بما في ذلك تلك المُقابلة؟

أرجوا الإجابة ولو بشكل تقريباً ولكن دقيق إذا أمكن نظراً لظروفي الخاصة التي هي المانع الحقيقي لي من السفر وعليه فأنا أود حقيقتاً لو أن كل ذلك يتم في يومٍ واحد، ولكن للأسف ها أنا ذا أعلم أن المقابلة عبارة عن إمتحانين (تحريري ومن ثم شفوي) وتقريباً على يومين منفصلين لذا فالأمر على الأقل به ثلاثة أيام، فها يكفون أم قد سمتد الأمر لأربعه أيام؟

لكم مني جزيل الشكر، وخالص الدعاء لكم بالتوفيق جميعاً، وبارك الله لكم في هذا الموقع النافع ومجهودكم الكريم. أخوكم / أحمد. محافظة سوهاج.

[Hamdy Tawfik-manar9 0]

اهلا اخي الكريم احمد

اولا مرحبا بك في منتديات المنار التعليمية

ثانيا : نصيحتي الاولي لك ان لا تعتمد كثيرا في معلوماتك علي الموقع الرسمي لان اغلبها معلومات غير محدثة

والطريقة الامثل من وجهة نظري للحصول علي المعلومات هي من اقرب مكتب

للتعليم المفتوح لجامعة القاهرة موجود في منطقتك

لان من الواضح انهم يغيرون الانظمة من وقت الي اخر

ثالثا : كيفية الامتحان ومواعيده لن اسنطيع ان افيدك فيها لاني امتحنت علي النظام القديم

حيث كان امتحان شفوي فقط يعقد في المقر الرئيسي في القاهرة

ربما يجيبك احد الاخوة او الاخوات الذين امتحنوا طبقا للنظام الجديد

رابعا : الشهادة تكون من جامعة القاهرة بغض النظر عن مكتب التسجيل الذي

قمت بالتسجيل فيه ولكن يذكر بها انها من مركز التعليم الفتوح جامعة القاهرة

خامسا : الاوراق المطلوبة علي مااتذكر هي اخر مؤهل وشهادة الخدمة العسكرية وشهادة الميلاد

وعدد من اصور الفوتوغرافية وتقدم في المكتب الفرعي وليس شرطا ان تكون في القاهرة

يمكنك اتمام جميع الاجرءات عن طريق مكتبهم الفرعي في منطقتك

اما مكان انعقاد الامتحان فيفضل ان تاخذ اجابة مباشرة منهم في المكتب

وان شاء باقي الزملاء او الزميلات يفيدوك في باقي النقاط التي سألت عنها

تحياتي

وبالتوفيق ان شاء الله

[Eye.Of.Eagle 0]

حياك الله أخي الكريم حمدي، وجزاك الله خيراً يا أخي على على المنتدى النافع، فوالله ما وجدت مثيلاً له، وبالله التوفيق.

صدقني أيها الفاضل إذا قلت لك أن المسؤولين عن الفرع الإقليمي هنا لا يدرون أين يمينهم من شمالهم، فما بالك بالسؤال عن هذه الأشياء؟

قد تخالني أُبالغ، وربما كنت كذلك، ولكني فعلاً سألت (فأنا لست غاوياً لوجع الرأس) فإذا بهم ينظرون لبعضهم البعض ببعض البلاهه الغير خافيه إطلاقاً على طفل بالإبتدائي، ومن ثم يهرول أحدهم إو إحداهن إلى مكتب آخر فيعود ويقول لا شيء..! فعلاً لا شيء، فهم يقولون مثلاً وبإختصار: كليات المقابلة الشخصية (هكذا يدعونها إختصاراً كما ذكرت) يُفضل لك يا أستاذ الذهاب للقاهرة للسؤال.

وكأنما عدنا لزمن الإبل والإرتحال لقضاء الحوائج.!

حقيقتاً لا يدرون شيئاً، بل وحين أقوم بالإتصال بالدكتور الإقليمي بالجامعه هنا لأستفسر منه حيث أنه هو المسؤول عن البرنامج إقليمياً في جامعته، أجد هاتفه مغلق طوال الساعه وعلى مدار الإسبوع، فهل هذا يُعقل؟ بل وحين ذهب لمقابلته في الجامعه هنا أخبروني أنه في أجازة وسيعود أول العام الدراسي الجديد، أي شهر 9 أو منتصفه..!!

منتهى الإسفاف..!!

حقيقتاً أرجوا من باقي الأفاضل إجابتي كذلك عن بعض ما سألت عنه، فلا خاب من إستشار.

كما وأرجوا إجابتي حول مدة الدراسة الإجماليه في الجامعه؟ هل هي سنتان إجمالاً بأربعه ترمات، أو أربع سنوات كالطبيعي؟

ستلاحظون بمشاركتي السابقة إستفساري عن هذه الجزئية خصيصاً.

أشكر كثيراً أخي حمدي على جوابك، بل وكذلك عى ردود أخرى قيمة قرأتها لك بمواضيع أخرى وأفادتني، وكذلك لزملاء وزميلات أفاضل آخرين.

جزاكم الله خيراً، ونفع بكم.

[mohammad 0]

السلام عليكم ورحمة الله
اشارك اخي حمدي الترحيب بك اخي

ثانيا انا من وصف المركز بالسوبر ماركت كما ذكرت
بس انا عايز اقولك انك لازم تصبر على المهازل اللي بتحصل من وتخلف في طريقة وصول المعلومة ليك ده حتى انت لازم تصبر لحد ما ربنا يكرمك وتاخد الشهادة وبعد كده تديهم بالـــ.... بلاش! اللهم اني صائم
بالنسبة لموضوع الفصل البيني الله اعلم هو ايه بس انا قالولي ان التقديم في شهر 9 وطبعا ممكن المدة تطول كالعادة
اما بالنسبة للاوراق لا يحتاجوا اي اوراق سوى صورة البطاقة وصورتين وصورة ضوئية من شهادة الثانوية والموقف من التجنيد معا على ما اذكر ...مش فاكر قوي بس المهم انهم لا يحتاجوا اوراق التقديم الا بعد اجتياز المقابلة كمان بياخدو صور مش اصول لانها لا تسترد .
بتقدم وبيديك ورقة فيها ميعاد الامتحان الشفوي وميعاد التحريري بينهم اسبوع تقريبا وساعة ماتيجي للامتحان محدش طبعا هايدلك سوى انك هاتمشي مع الناس اللي ماشية لحد المبنى اللي هاينعقد فيه الامتحان وهو مش بعيد من الاستقبال
تذكر جيدا انك بتروح بالورقة اللي استلمتها اللي فيها ميعاد الامتحان واوعى تنساها لانك لا تدخل الا بيها وااثبات الشخصية
طبعا الورقة عليها كود الطالب والكود ده هو رقم الجلوس بتطلع تدور على لجنتك وبيبقى مكتوب على اللجان الارقام من - الى
لقيت لجنتك الحمد لله هاتستلم ورقة الامتحان وطبعا انا شرحت ايه اللي بييجي في الامتحان من قبل ولو عندك اي سؤال انا موجود ان شاء الله
بالنسبة لموضوع الرسوم انا اذكر ان رسوم المقابلة على النت كانت اغلى فعلا وكمان انا مش عارف ازاي اصلا هايمتحنوك على النت لان امتحان النت بيكون للمغتربين اي خارج مصر

وبالتوفيق ان شاء الله

[Eye.Of.Eagle 0]

وعليكم السلام ورحمة الله وبركاته

حياك الله أخي محمد، أشكرك على الترحيب.

هو أنت إذاً صاحب وصف السوبر ماركت (أضحك) والله يا أخي لولا الملامة لوصفتهم أنا بالزريبه وما باليد حيله، وبالمُناسبة: ليس هذا فقط حال هذا المركز بل هذا هو حال جميع المصالح الآن بمصر، والله المُستعان.

حقيقتاً أنا جديد تماماً على نظام التعليم المفتوح، فما معنى الفصل البيني؟

طبعاً المسميات والأوصاف ليست غريبة على مصر (أذكر مثلاً البريمو والسبنسه والتسطيحه، إلخ) (أضحك مُجدداً) ولكن ما هذا الفصل البيني؟ هل هو الترم الأول أم ماذا تحديداً؟

وما الفرق بين أن أقوم بالتقدم في شهر أغسطس أو الفترة التالية والتي أعتقد أنها ستكون في مارس (لا أذكر تحديداً)؟

ولم تُجيبوني بالله عليكم عن سؤالي الذي ربما كان ساذجاً (أبتسم) ولكني فعلاً دخلت في حالة الحيص بيص!

هل العام الدراسي في التعليم المفتوح كما هو في التعليم "المقفول" (أضحك) أقصد الطبيعي؟ أم هو أقل؟

لقد أوضحت ما أعنيه من قبل في المشاركة السابقة والتي سبقتها كذلك: هل إجمالي سنين الدراسة هي أربع سنوات كالطبيعي أم سنتين؟

فأنا لا أعرف ما هو ذلك الإمتحان في شهر أكتوبر المُقبل؟ أهو الترم الأول ومن ثم الترم الثاني في يناير؟ أما ماذا؟

فهذا هو ما جعلني أفكر في هذا الإتجاه، ولكوني وطبيعياً قد تصورت أن الدراسة بالمفتوح هي كالعادي من ناحية سنين الدراسة الأربعه فأنا لم أهتم أن أسأل هذا السؤال من قبل، ولكني الآن أجدني في حيرة من أمري، فأرجوكم التوضيح.

أشكرك أخيراً أخي محمد على ردك، وسعيد بزيارتك.

[mohammad 0]

كل ده ضحك ربنا يسعدك دايما

خلينا في المفيد الترم البيني لا علاقة له بالمقابلة ولا بالتقديم اطلاقا لاني قرأت مسبقا عنه وعرفت انه بيكون للطلبة اللي ناقصهم مواد او مأجلين مواد (يعني تكملة للنواقص لمسايرة الترم او السنة الدراسية)
وده مختصر منقول للتوضيح:
من لهم الحق في التسجيل للتيرم البيني:
*
من حق الطالب الذى يوجد لديه مواد متأخرة من تيرمات سابقة ، سواء كانت
حالة المادة (مادة : جديدة متآخرة أو مادة : تأجيل أو مادة : عذر أو مادة :
غياب أو مادة : رسوب ) ، ان يقوم بالتسجيل فيها لإداء الآمتحان عنها
بالتيرم البينى ، بشرط ان لا يتجاوز الحد الأقصى فى التسجيل عن : ( ثلاث
مواد فقط ) ، وكذلك اذا رغب الطالب فى تسجيل مواد جديدة من التيرم الآعلى
، يمكنه ذلك بشرط الا يتجاوز الحد الآقصى فى التسجيل عن : مادة أو مادتين
جديدتين فقط من التيرم الآعلى بشرط الا يتجاوز مجموع المواد المسجلة فى
التيرم البينى ، سواء كانت مواد متأخرة أو مواد جديدة من التيرم الآعلى عن
ثلاث مواد فقط .

بالنسبة للتقديم اذا لم لك تجتاز المقابلة لا قدر الله تقدر تقدم في المقابة اللي بعدها وبينهم 5 شهور بس ده تقريبا عشان هما مش هايعملوا لكل واحد جديد ترم
وممكن يفيدنا فيها اخي حمدي لو يقدر

[Eye.Of.Eagle 0]

قال لك: شر البلية ما يُضحك، على العموم ربنا يسعدنا ويسعدك، آمين.

أفهم من كلامك إذاً أن الوضع الدراسي طبيعي أي أربع سنوات إجمالاً، كالوضع الدراسي العادي في الجامعه النظامية؟

لا أدري لماذا ولا كيف ولكني كنت قد طمعت فقلت في نفسي: ياليتهم سنتين علشان نخلص..!!

أضحك..!

جزاك الله خيراً، وبإنتظار أن يتفضل باقي الزملاء بالإدلاء بآرائهم إن أحبوا ذلك، ولك ولهم مني جزيل الشكر.

[Hamdy Tawfik-manar9 0]

بالنسبة لنظام المقابلات انا ليس عندي فكرة عن النظام الجديد كما اوضحت سابقا

اما بالنسبة لعدد سنوات الدراسة فهي اربع سنوات كحد ادني

حيث ان لديك 40 مادة مفسمة علي 8 تيرم بمعدل 5 مواد لكل تيرم كحد اقصي

اي انه لا يجوز ان تاخذ اكتر من 5 مواد في التيرم الواحد بينما العكس متاح

بمعني انه يمكنك اخذ عدد اقل مادتين او ثلاثة او حتي مادة واحدة في التيرم

لكي تحصل علي الليسانس يجب ان تنجح في 40 مادة في مدة ادناها 4 سنوات

ويمكن ان تزيد عن ذلك علي خسب عدد المواد التي تاخذها في كل تيرم

المهم انك تحصل علي الليسانس بعد النجاح و اجتياز الـ 40 مادة

التقدير يكون تراكمي بمعني متوسط درجاتك في الـ 40 مادة

[nour_cota 0]

على فكرة انا نور عضوة جديدة بالمنتدى وكمان لسة ناجحة فى الاختبار الشخصى لاداب انجليزى وبحب اعرفك حاجة انا كمان كنت خايفة من الامتحانين التحريرى والشفوى بس كان الخوف الاكبر من التحريرى لكن الامتحان الحمد لله كان سهل على مستوى طالب الثانوية العامة كان عبارة عن بارجراف عن اهمية دراسة اللغات فى حياتنا والشفوى كانت الدكتورة بتسالنا بلانجليش لية اخترتى تدخلى اداب ترجمة بمعنى انة امتحان الغرض منة الدكتورة تعرف مدى قدرتك على تحدث اللغة الانجليزية ومدى ضبطك للقواعد اه نسيت اقوللك ان كمان التحريرى كان فية قطعة ترجمة خارجية بس بسيطة وسهلة وفى الاول والاخر الحمد لله وعقبال اللى لسة نتيجتة مظهرتش

[Honey Bunny 0]

السلام عليكم ورحمة الله وبركاته

أولا بالنسبة لمدة الدراسة لا تقل بأي حال من الاحوال عن اربعة سنوات دراسية لكن من الممكن ان تزيد عن ذلك اذا قمت بتأجيل عدد من المقررات او أحد الترمات بالكامل ولم تسجل ايا من تلك المواد في الفصل البيني لكي تنتهي من دراستك في الوقت المحدد " تتخرج مع دفعتك".

التسجيل للكلية يمكن له فترتين خلال العام الدراسي ... اما دور سبتمبر " شأنه شأن الانتظام" او التسجيل في دور مارس لمن لم تمكنه ظروفه من التسجيل في دور سبتمبر او أيما كانت المسببات.

بخصوص الفصل البيني كما تفضل الزميل : هو موعد عقد امتحانات لمن قاموا بتاجيل بعض المواد وا ترم كامل او لمن يريد لظروف ما انا ينهي عددا من المقررات في الترم القادم ويتم التسجيل للبيني عقب اداء امتحانات الترم الاساسي حسبما تعلن الكلية موعد التقدم للتسجيل.

أما بخصوص الموظف الذي اخبرك بأن الدفع سيكون بالدولار وانت داخل الجمهورية فهو لا أقل من ان يكون مغيب تماما ولا يريد حتي اداء مهامه الوظيفية وتستطيع الاتصال بالفرع الرئيسي " القاهرة" واخبارهم بذلك....انت مصري وداخل الجمهورية وستؤدي الامتحان اما في احدي جامعات الشراكة او المركز الاقليمي للمكان الذي تسكن به او حتي القاهرة ...اذا ما سر الدفع بالدولار كما ذكر هذا المعتوه!

أرجو لك الافادة.

[rody 0]

مرسي جدا للاهتمام يا استاذ/ حمدى
فى سؤال كمان
هل يفضل فى الاختبار النطق بالامريكان ولا البريطانى ؟؟

مع وافر الشكر ،

[Hamdy Tawfik-manar9 0]

هههههه

بريطاني ايه وامريكاني ايه ؟

انطقي ان شا الله حتي بالاوندي

ده امتحان في اساسيات الاساسيات

عموما احنا دراستنا بتبقي بريطاني

بالتوفيق

[عمرو الشاعر 0]

معلومات قيمة جدا شكرا حمدى

[rody 0]

مرسي كتيير للرد بجد مش عارفة اشكرك ازاى على انك طمنتنى

وبجد المنتدى رائع وفى تعاون بين الاصدقاء ودى حاجة جميلة جدا

وحتى لو فشلت فى الاختبار هفضل عضوة فى هذا المنتدى الرائع لاتعلم منكم

[rody 0]

باركووووووووووووووولييييييييي انا نجحت

[rody 0]

فى سؤال هى المحاضرات كل جمعة ولا جمعة وجمعة لان واحدة صحبتى قالتلى انها جمعة وجمعة وانا محضرتش اول محاضرة نظرا لانى تاخرت فى الكشف على النتيجة بس أرجو انكم تفيدونى بهذا السؤال لانكم اقدم منى بالجامعة وجزاكم الله خيراً

[hend nga 3]

يا هلا بالجميل المحاضرات كل جمعة ومتقلقيش من اللي فاتك المهم في الأخر وليس المحاضرات الأولي

بالمناسبة انا ترم ثاني الآن بالتوفيق والنجاح للجميع

[rody 0]

مرسي للرد يا ستار يا جميلة وانشاء الله النجاح لينا وليكى باذن الله

[Bishoy Habib 0]

ممكن حد يقولي اخر ميعاد للتقديم الترم ده للطلبه الجدد بالضبط؟

[marina 0]

يبدا من شهر 3 واخر ميعاد فى بداية شهر 7 وامتحانات الترم دا فى شهر 7 ومحاضرات بتبدا فى اول 4

[اميره هلال 0]

من فضلكم عايزه اعرف التقديم ابتدي ولا لاء لدور مارس عشان عايزه اقدم وبتصل ع التيليفونات مش بترد ارج الافاده
وشكرا

[marina 0]

لسة فى منتضف شهر3

[اميره هلال 0]

ميرسي جداااااااااااااااااا يا مارينا يعني ابتداء نمن يوم 15 دهه اكيد طب عادتا الجامعه بتبقي شغاله طول الاسبوع ولا يوم الجمعه بس يعني لو عايزه اروح عشان استفسر اروح يوم ايه ؟؟؟؟

[marina 0]

الجامعة شغالة كل الاسبوع ما عدا الجمعة من 8 صباحا حتى الرابعة ظهرا وانت هناك بتروحى معاكى البطاقة ولابد تصورها ومعاكى صورة شخصية لكى وخد استمارة الثانوية العامة احتياطى ومعاك 50 جنية تمن الاستمارة وهناك بيدوك ورق ضعيرة بيكون فيها اسمك ورقم استمارتك وفيها ميعاد الامتحان التحريرى والمكان وبريضة الامتحان الشفوى وميعادة ومكانة وبيكون امتحانك بعد يومين من التقديم وبيكون التحريرى الاول ولازم تاخدى الورقة دا معاكى بالاضافة لبطاقتك والنتجة بتاع الامتحان بتظهر على النت من خلال الموقع الرسمى للجامعة وعامة بيظهر قبل ما تمتحن الشفوى بيوم وعامة بيبقى بعد الساعة 3 والامتحان التحريرى هو الاهم لان النجاح فية بيترتب علية الامتحان الشفوى ودا بيكون بريضة بعد يومين من الامتحان التحريرى ونتجة الشفوى بريضة على النت وبعدها ممكن 3 ايام او يومين وفى ناس بتعرف فى نفس يوم امتحانها الشفوى انها نجحت وخلى بالك الورقة بريضة الصغيرة بتروحى تمتحنى بيها الشفوى وانت داخلة على الدكاترة اللى بيمتحنوا بيخدوها منك انت بس احفظى رقم استمارتك كويس لان بيها بتشوفى النتجة وحتسجلى بيها وبالنجاح ان شاء اللة وعامة مفيش تقديم الا لما تظهر نتيجة اللى امتحنوا فى الدول العربية

[أميرة للوفاء 0]

السلام عليكم
رائع جدا ماقدمتم ان شاء الله التقديم فى نص شهر ابريل
دة فى بنى سويف
ودعواتكم لى فى اجتياز المقابله لانى بجد خايفه منها

[اميره هلال 0]

انا قدمت يا ياجماعه واتحدد الانتر فيو يوم الاربعاء والخميس ومقلقه جداااااااااااااااااا مش عارفه ايه نوع الاسئله انا مش مقلقه من الاختبار التحريري قد الشفوي لانه بيسببلي توتر جامد جدااااا --- لو حد موجود جديد ياريت يفيدني وايه نوع الاسئله اللي ممكن تتسال -- اتمني فعلا القبول والدراسه في هذه الكليه شكرا

[marina 0]

اسئلة بتبقى عايزة تدرسى انجليزى لية وهل استغلت قبل كدة وهل اجادة الكمبيوتر مطلوبة

هل تعتقد الانجليزى كلغة مهمة وهل الكمبيوتر ايضا مهم

هل جربت اخد كروسات

واسئلة عامة بسيطة وحتى لو مش فاهمة بتسالك تانى وتعيد السوال وبصراحة اهم حاجة الامتحان التحريرى مش الشفوى

[marina 0]

اهلا بيك يا اختى اميرة فى المنتدى والتعليم المفتوح وبنحاج فى الامتحانين

[Gina 0]

معلش انا كمان عندى امتحان يوم الاربعاء والخميس اللى جاى وقلقى كله من التحريرى مش الشفوى لانى باتكلم كويس بس الترجمه هى اللى يمكن بتكون صعبه شويه بالنسبه لى,,,وبالنسبه للاسئله دى بتاعت التحريرى بتكون كلها انجليزى؟
ارجوكم افادونا لاننا نحب و نهتم بالغه جدا

[marina 0]

الامتحان التحريرى مدتة ساعة وهو عبارة عن سوالين مش حياخدوا اكتر من 15 دقيقة بالمراجعة

السوال الاول بيطلب كتابة 5 جمل عن موضوع معين مثلا عن فوائد الكمبيوتر او اهمية اللغة الانجليزية او كتابة 5 جمل بالانجليزى طبعا عن اى شخصية وبترك ليكى حرية اختار الشخصية

اما السوال التانى فسطرين انجليزى يتمك ترجمتهم للعربى ممكن عن اهمية النت او الكمبيوتر وهكذا وكلها سهلة وعامة الامتحان التحريرى هو الاهم اما الامتحان الشفوى فبتدخلوا مجموعة 4 اشخاص وبتكون الاسئلة عن اهمية الكمبيوتر لية عايزة تدرسى انجليزى اشتغلت قبل كدة ولالا هل الكمبيوتر مهم وواللغة الانجليزية مهمة وممكن تكون اسئلة شخصية وعامة هم بيكروا السوال كذا مرة حتى لو معرفتويش تفهموة او تجوبوا

[marina 0]

اهلا بيكى يا جينا فلالى المنتدى والتعليم المفتوح

[marina 0]

عامة دا لنك ممكن يساعدكم تقدورا تشوفة /t2990-topic

[marina 0]

ودا لينك لنظام قديم كانوا فية بيدهم مذكرة فيها قطع ترجمة صعبة وكانوا بيجيبوا منها قطعة

/t3194-topic


ودا لينك تانى

/t3137-topic

[marina 0]

/t3137-topic