اجتياز المقابله الشخصيه لقسم الترجمه

[maryam EL kashef 0]

اسلام عليكم:
انا عضوه جديده وعيزه اعرف كيف اجتاز المقابله الشخصيه وعيزه الملزمه مترجمه عشان ازكرها
ولكم جزيل الشكر

[Hamdy Tawfik-manar9 0]

اهلا اخت مريم

الاختبار بيكون بسيط وسهل

وهو عبارة عن قراءة قطعة برجراف امام الدكتور الممتحن

ثم يسالك عن معاني بعض الكلمات

هذا ماحدث معي عندما تقدمت للا متحان

اعتقد ان ليس هناك الزام بقطع محددة

لكن علي اي حال اليك نموذج التدريبات التي تصدرها الجامعة للمتقدين الجدد

http://www.ou.cu.edu.eg/samples/INTERVIEW2.doc


وبالتوفيق ان شاء الله

[maryam EL kashef 0]

السلام عليكم:
شكرا علي الاهتمام يوجد بعض القطع الغير مترجمه وهي كبيره جدا وايضا ماهو معاد اتقديم في الجامعه واريد ايضااسباب عدم اختياز المقابله ..........وشكرا

[Hamdy Tawfik-manar9 0]

الامتحان ياتي من قطع خارجيه علي حد علمي كما فلت لك ... اما بالنسبه للقطع الغير مترجمة

يمكنك الاستعانه باحد القواميس الكثيرة الموجوده في المنتدي واسهلهم ايزي لنجو حيث بترجم

الكلمة بمجرد الاشارة اليها بالماوس وبنطقها ايضا

مواعيد التقديم تقريبا بتكون بعد شهر 7 وبعد شهر يناير من كل سنه

وهنا عنوان الموقع الرسمي للجانعه تابعي معه المواعيد

http://www.ou.cu.edu.eg/Students.aspx

اما عن الاسباب عدم اجتياز الامتحان فها كما قلت سابقا مساله تخضع لتقدير الدكتور الممتحن

لكن الامتحان بشكل عام سهل لاني اعرف ناس مستوياهن متواضعه جدا علميا واجتازوه

بالتوفيق ان شاء الله

[sara111 0]

شكرا على المعلومات

[dream 0]

السلام عليكم

اطمنى الامتحان اسهل مما تتخيلى
لا داعى لكل هذه الرهبة
ربنا معاكى

[maryam EL kashef 0]

شكر ا يا ساره علي اهتمامك بس القاموس مش عايز يتسطب عندي شكرا علي الدعم انا عيزه دعم اكتر

[maryam EL kashef 0]

تعرفي معاد التقديم امتي؟

[dream 0]

السلام عليكم

اهلا مريم
يمكنك الدخول على موقع الجامعة
ومعرفة ميعاد الامتحان

[a.h.issmail 0]

عايزة دعم اكتر


اتوكلي علي الله وخشي الامتحان ميهمكيش الدكتور الي قاعد خليكي واثقة في نفسك
الامتحان مفيش اسهل منه كل الي بيعمله بيوريكي ورقة مكتوب فيها قطعة من الملزمة بيقولك اقريها
بيشووف طريقة نطقك للكلمات عارفة تقري انجليزي كويس ولا لا وتاني حاجة بيقولك فهمتي ايه من الي انتي قرتيه بس ياستي ادي كل الحاجة الي مقلقاكي ويارب بالتوفيق ان شاء الله

[dalia 0]

السلام عليكم

مريم، ما تخافيش، زي ما قالوا لك كل الزملاء، الامتحان بسيط والغرض منه إن الدكتور يشوف نقطك في الانجليزي وانك بتفهمي عامة اللي مكتوب. مش مطلوب منك تبقى أستاذة في الترجمة من الأول

بس خللي عندك ثقة في نفسك، واقري القطعة كويس وما تخافيش.

لما انا امتحنت كان معايا في الأوضة حوالي عشرة بيمتحنوا برضه، فما تتخضيش

بالتوفيق وابقي طمنينا

[أسامة1 0]

الامتحان سهل جدا جدا ويقدر طالب الثانويه العامه متوسط المستوى انه يحله بسهوله لكن لازم تبقى مستعده للى بعد الامتحان اللى هو الدراسه لأن دراسة اللغه محتاجه مجهود وصبر وممارسه وحبك للغه نفسها كمان واليكى بعض القواميس الأون لاين الرائعه:
http://www.google.com/dictionary قاموس مزدوج اللغه حتى لو الكلمه مش موجوده فيه بيجيب لك معلومات عنها من ع الويب.

http://www.araby.com/Dictionary قاموس مزدوج
http://www.thefreedictionary.com/ قاموس انجليزى انجليزى ناطق باللهجتين الأمريكيه والبريطانيه.
http://www.onelook.com/ الأقوى على الاطلاق
http://www.urbandictionary.com/ قاموس لترجمة الكلمات العاميه
عامة يا أخت مريم انتى فى الوقت الحالى مش هتحتاجى من القواميس دى كلها غير الأول او التانى وربما التالت .

[sweet_love 0]

متشكرين على القواميس دى يا أسامة

[أسامة1 0]

العفو يا سويت انا تحت امركوا

[saif2005 0]

السلام عليكم
شكرا لشرح كيفية اجتياز المقابلة الشخصية ربنا ان شاء الله معاكم وبالتوفيق

[mohammad 0]

السلام عليكم يا اخواني اعضاء المنتدى وزواره

تعقيب بسيط على كل الردود:
وانا ملاحظ ان اخر مشاركة كانت من 2009 وده لفت نظري الى ان المقابلة اليوم قد اخذت شكلا ومضمونا مختلف عما ذكرتم فهو اليوم لم يصبح كأيامكم ولكن اليوم اصبح امتحان قبول وليست مقابلة لان المقابلة كانت امتحان شفوي فقط من الدكتور الممتحن لكن اليوم اختبار تحريري في يوم واختبار شفوي في يوم اخر
وانا من سعداء الحظ اللي هايطبق عليهم النظام دهوربنا يستر ودعواتكم لي بالتوفيق وجزاكم الله كل خير

[Doaa.M.M 0]

السلام عليكم..

أبا بأيد محمد فى تعقيبه صحيح الامتحان تحريرى فى يوم وشفوى فى يوم تانى
أنا اتطبق عليا النظام ده ..كمان فى الامتحان التحريرى كان الورق مختلف
من طالب لآخر والشفوى مجرد أسئلة عن اسمك أو سنة التخرج أو سبب
اختيارك لأداب انجليزى وهكذا
وربنا معاكم جميعا وبالتوفيق

[mohammad 0]

وعليكم السلام يادعاء
استأذنك معلش في شوية اسئلة بما انك اجتازتي المقابلة لاني انا فعلا خايف منها وده لاقتناعي ان اللي تخاف منه مايجيش احسن منه .
المهم هل فعلا فيه مذكرة للامتحانات سواء للشفوي او للتحريري؟
وما هو مستوى الامتحان التحريري علما بأني ثانويع عامة 2004 وطبعا يعتبر الانجليزي بالنسبة لي راح ؟
اخر سؤال معلش الرد في الامتحان الشفوي هل كله بالانجليزي ؟
وجزاكي الله خيرا اختي الفاضلة

[mohammad 0]

متشكر يادعاء على الرد اللي ماوصلنيش وياريت لو حد عنده رد من الاعضاء الكرام يرد عليا ضروري ياجماعة المقابلة بتاعتي قربت وربنا يوفقنا جميعا وجزاكم الله خيرا

[hend nga 3]

اخى الكريم لوذهبت للصفحة الأولى لهذا الموضوع ستجد لينك المذكرة اللى هنمتحن فيها فى المقابلة الشخصية لا اعلم بخصوص المقابلة الشخصية لأنى طبعا مثلك المقابلة تقريبا بعد اسبوع او اكثر لكن بسؤالى اعضاء المنتدى كلهم طمأنونى وكمان وكيل الكلية هنا بالرياض طمننى وقال انها مجرد محادثة على التليفون وبعض الأسئلة على النت ولذلك شدد على وجودى ولكن لا اعلم ماذا عن المقابلة بالقاهرة حمل المذكرة وحاول تقرأها لا اعتقد ان الدكتور هيسأل عن قواعد كل اللى هيسأل فيه هو انك تقرأ قطعة من المذكرة وتترجمها شفهيا لو فيه امتحان تحريرى فى الغالب هيكون عن اساسيات القواعد حاول تستغل الأيام القادمة بأن تسقل لغتك بالعديد من المهارات وبالمنتدى موجود كل ما يساعدك

لكن لا تضيع وقتك فى تحميل البرامج والكتب والقواميس حمل ما تراه سهل ومناسب واترك عملية
التحميل لوقت اخر بعد اجتياز المقابلة

اتمنى انى اكون افدتك فى هذا .......اهه المذكرة تتحدث عن مصر وموقعها الجغرافى ونبذة عن تاريخها الحديث فترجمة هذا الموضوع سهل لأنها معلومات معروفة مسبقا لكن الأهم قراة الموضوع وترجمة ما تراه صعب
اطلت عليك بالحديث اتمنى ان اكون افدتك

تمنياتى لك بالتوفيق

[Doaa.M.M 0]

اسفة جداااااا يا محمد انا لم أقرأ رسالتك إلا اليوم

أنا دخلت المقابلة الشخصية مرتين فى ترمين متتاليين ونجحت فى المرتين
المرة الاولى كانت مقابلة شفويه فقط الدكتور أعطانى ورقة بها قطعة من
المذكرة اللى بعنوان مصر وقرأتها وترجمتها شفوى وبس
أما فى المرة التانية وكانت ترم سبتمبر الماضى النظام بتاع المقابلات اتغير
وبقى امتحانين تحريرى وشفوى والحقيقة الناس اللى كانت مقدمة خوفونى جدا
لكن الامتحان كان سهل للغاية يادوب بس قطعة تترجمها عربى وهى حوالى 4 او 5
سطور وجملة عربى تترجمها انجليزى والاتنين فى منتهى السهولة وعلى فكرة مفيش اى
قطع او موضوعات معينة للاطلاع عليها..المقابلة الشفوى كانت مجرد اسئلة عن الاسم والسن
وليه اخترت الانجليزى بالذات وهكذا وطبعا الرد يكون انجليزى فقط

[Doaa.M.M 0]

نسيت أقولك ان انا كمان ثانوية عامة 2004 وكنت

مضطربة جدا وحاسة انى أفل مستوى فى المتقدمين
لكن أحب أطمنك ان الامتحان التحريرى أقل من مستوى
طالب الثانوية..كمان عايزة ألفت نظرك لشئ خلى إجابتك
فى الامتحان الشفوى معقولة بدون فلسفة ولا كلام كتير
ورد على قد السؤال لان لو انت حاولت تظهر انك قوى فى
اللغة الدكتور بيبدأ يتعمق فى أسئلة ويوجه لك أسئلة أكتر وده اللى أنا لاحظته
مع أحد المتقدمين يعنى خليك طبيعى وبسيط بدون مبالغة
وبالتووووووفيق إن شاء الله ومتنساش تطمنا عليك

[mohammad 0]

متشكر جدا يادعاء على الاهتمانم ومعلش سؤال مهم جدا واخير هل لقدر الله لو ما نجحتش في المقابلة اقدر اخش الامتحان مرة تانية ولا هي مرة واحدة في العمر
ومعذرة اني مش قادر اديك حقك في الشكر لضيق الوقت وجزاك الله خيرا

[a.h.issmail 0]

محمد باشا ازيك

انت كدة بتوتر نفسك علي الفاضي الامتحان ان شاء الله هايبقي سهل جدا
احنا كان علي ايامنا "عواجيز بقي " شفوي بس كان في مذكرة الي بيقولولك عليها دي كانت حوالي 30 صفحة انجليزي كان المفرروض انك تذاكرها طبعا حضرتي كنت قلقان جدا حفظت المذكرة زي اسمي ورحت الامتحان واثق من نفسي قعدت في المدرجات سمعت الاشاعات ال ايه الدكتور بيمتحن من برا المذكرة مش عايز اقولك انا حسيت بايه ساعتها ورحت منفض وقلت انا هدخل الامتحان والي يجيبه ربنا كويس
دخلت قعدت مع الدكتور بصلي وراح فاتح المذكرة اياها وقالي ترجم اول سطر فيها مش عايز اقولك اني من كتر التوتر والقلق مكنتش هاعرف اترجمها بس الحمد لله عدت الازمة علي خير وان شاء الله هاتعدي معاك انت اتوكل علي الله وميهمكش
وبالنسبة لموضوع لو لا قدر الله ومكنتش كويس في المقابلة بيبقي فيه 3 مقابلات تانين ان شاء الله مش هتحتاجهم علشان هتنجح من اول مرة
وربنا معاك يارب
وبالتوفيق ان شاء الله

[mohammad 0]

الله يسلمك ويطمنك يا احمد (على حد اعتقادي) ويارب تكون بخير ان شاء الله
والله مانا عارف اشكرك على ايه ولا ايه على الاجابة على سؤالي ولا عشان طمنتني متشكر جدا جدا بس ايه اللي يخليك متأكد ان امتحاني اسهل من امتحاناتكو بالرغم من انها اصبحت شفوي وتحريري وكمان التحريري لكل واحد امتحان؟
وجزاك الله خيراً

[a.h.issmail 0]

اانا معتقد ان الامتحانات الشفوي دايما اصعب من التحريري

التحريري بيبقي عندك فرصة تراجع وتشوف انت كتبت ايه مرة واتنين وتلاتة انما الشفوي ياعيني زي مابيقولوا "غسلة وقومة "

ولو في اي حاجة انا في الخدمة

[mohammad 0]

انا ما بسألش انهى الاصعب انا بسأل عن اي حد حضر المقابلة (الجديدة)
وعرف ايه اللي دار فيها بمعلومات اكيدة لان مستوى المقابلة الجديدة غير معلوم ابعاده الى اي مدى لانهم ما داموا غيروا نظام المقابلة يبقى اكيد المستوى اتغير
خصوصا انهم لغوا شرط الخمس سنين يعنى المقابلة على مستوى طالب ثانوية عامة طازة مش واحد زي حالاتي بقالوا خمس ست سنين بعيد عن الدراسة
كل اللي ردوا على سؤالي كانوا نظام قديم

[Honey Bunny 0]

السلام عليكم ورحمة الله وبركاته

أعتقد يا أخ محمد ان الموضوع قتل بحثا...هل تعتقد انه التحريري اصعب من الشفوي؟؟؟
مخطيء تماما من يظن ذلك...ولم كل هذا التوتر ؟؟ بخبرتك السابقة تعلم ان كل الامتحانات المتعلقة باللغة الانجليزية تأتي مبهمة "غير معلومة مسبقا" فهي تقيس مهارات اللغة عند المتقدم للامتحان.....

المذكرة التي قام برفعها الاخوة ليست للحفظ
ولكن للفت انتباهك للمستوي الذي تتحدث عنه و لا يفرق هنا ان كان شفوي او تحريري او كلاهما مجتمعين....اعقلها وتوكل اخي.

[Doaa.M.M 0]

يا محمد انت فعلا بتوتر نفسك على الفاضى والتوفيق بيد الله

أنا حاسة بيك لان انا نفس النظام وخريجة ثانوية 2004
وقعدت خمس سنين بدون دراسة لكن الموضوع بسيط
أنا من النظام الجديد ولسه فى سنة أولى
بخصوص سؤالك انت ممكن تقدم للمقابلة 3 مرات
فى نفس الترم يعنى لو لا قدر الله منجحتش تقدم تانى فى الميعاد
اللى بعده وبيكون الفرق بين كل مجموعة متقدمين واللى بعدهم
تقريبا اسبوع او اتنين .. وربــــــــــــنا معـــــــــاك

[mohammad 0]

مش عارف احمد ميدو يقصد ايه بس دي لايمكن تكون غلطة كاي بورد عشان دي متكررة ع العموم متشكرين على الغلطة الكمبيوترية يكفي محاولة المشاركة واهلا بيك في المنتدى

[mohammad 0]

LostLustre كتب:

السلام عليكم ورحمة الله وبركاته

أعتقد يا أخ محمد ان الموضوع قتل بحثا...هل تعتقد انه التحريري اصعب من الشفوي؟؟؟
مخطيء تماما من يظن ذلك...ولم كل هذا التوتر ؟؟ بخبرتك السابقة تعلم ان كل الامتحانات المتعلقة باللغة الانجليزية تأتي مبهمة "غير معلومة مسبقا" فهي تقيس مهارات اللغة عند المتقدم للامتحان.....

المذكرة التي قام برفعها الاخوة ليست للحفظ
ولكن للفت انتباهك للمستوي الذي تتحدث عنه و لا يفرق هنا ان كان شفوي او تحريري او كلاهما مجتمعين....اعقلها وتوكل اخي.

اعتقد اني رديت وقلت اني مش باسأل على الاصعب انا بسأل عن المستوى للشخص الممتحن ولا حضرتك ماخدتيش بالك من ردي اعلى ردك وكمان المذكرة اللي قالو عنها واللي اللينك بتاعها موجود في الموضوع مذكرة قديمة بنظام قديم وحضراتكوا مش فاهمين ان القبول كل شوية بيتصعب وياعالم هيعملوا ايه بعد كده في امتحانات القبول وعلى فكرة انا سمعت ان بعض الكليات في الاقاليم وفي جامعة حلوان اشتغلت بنظام الساعات المعتمدة اللي شغال بيه التعليم المفتوح وبرده بفلوس ولكن سيكون هناك ضوابط يعني ابشروا بالغاء التعليم اللي بيقولوا عليه مجاني وتحول التعليم الى شركات استثمارية تقوم على اساس المادية هدف عام وايضا انا لسة ما اتأكدتش من صحة الخبر

[Honey Bunny 0]

وفي رأيك ...ماذا تقصد بالمستوي؟؟؟

المستوي هو التدرج \مدي الصعوبة "مبتدئ-متوسط-فوق متوسط-متقدم"....ده بخصوص ردك اللي هوا فوق ردي+ ردك اللي جه تعليقا علي ردي.
ثانيا مفروض نعمل ايه؟؟؟ أمامك موضوعات متنوعة للقراءة واثراء ثقافتك اللغوية الي جانب الكتب الدراسية نفسها...و اجبت حضرتك قبل كده وقلت اقرأ وأي سؤال انا حاضرة بصرف النظر جرامر او اي شيئ .

ولمعلوماتك كلنا مرينا برهبة المقابلة الشخصية ولكن اخذنا بالاسباب وربنا وفقنا...مكنش فيه حد يديلنا مذكرات ولا منار من أصله ولا روح فريق توفر علي من يخلفنا عناء البحث...يعني حضرتك قطعت شوط كبير جدا.

السؤال:
بما انه حضرتك قاهري ليه مترحش الكلية وتسال بنفسك وتطمئن؟؟؟؟
هل المقيمين خارج مصر اقرب ام انت؟؟؟

ثالثا

اذا كان الموضوع جدل لمجرد الجدل بلا طائل ...اعتبره مغلق من الان.
دمت بخير.

[mohammad 0]

السلام عليكم ورحمة الله وبركاته
اختي رانيا انا شايف حضرتك متحاملة جدا على اي سؤال اسأله او اي كلمة على عكس ما كنت تماما
وبالرغم اني سألت سؤال اخير وتمت الاجابة عليه وحضرتك فتحت الموضوع مرة اخرى انا لا انكر افادتك في الموضوع والعياذ بالله ولكن لا اعلم ماذا حدث لاولا وثانيا وثالثا والموضوع اغلق
معذرة ان كان الموضوع اكتر من حقه بس انا شايف ان ده مش جدل لان بكده بنكون ذكرنا كل سؤال او استفسار بيدور حول المقابلة الشخصية حتى وان لم يقدر لي الله الالتحاق بالكلية اكون قد افدت غيري
انا عن نفسي متنازل عن الموضوع اذا كنت انا العقبة
وجزاك الله وجزى كل من افادني وساهم في الموضوع كل خير

[Honey Bunny 0]

السلام عليكم ورحمة الله وبركاته

اولا يا اخ محمد انا لا اتحامل علي أحد اطلاقا...
قصدت بردي هذا ان تنحي مخاوفك جانبا لئلا يكون فرط خوفك هذا عقبة في طريقك

نعم التوتر له بعض الجوانب الايجابية ولكن الافراط فيه يأتي بنتائج عكسية واعلم ان من سيعقد تلك المقابلة بصرف النظر حديثة\قديمة هم علي دراية ووعي كافي بما يجول بخاطرك "منقطع عن الدراسة منذ سنوات-ملم بجوانب اللغة بعضها-جميعها..الخ-انا لست مترجما محترفا" وهكذا
اضف الي ذلك ان مستوي استيعاب الاشخاص لشئ واحد متفاوت بمعني انه من الممكن ان يحضر بعض الزملاء محاضرة ما احدهما استوعبها تماما واخر لم يحصل بعض النقاط واخر لم يفهم شيئا اطلاااااقا واذا سألت ايهم ماذا فهمت كل سيبدأ الشرح باستفاضة ولكن من منظوره هو وبقدراته هو
بمعني من استوعب المحاضرة مثلا علي تمامها سيوفيك حقك في شرح جميع النقاط التي تناولتها المحاضرة -الاخر ذو المقدرة الاقل سيوضح لك ما فهمه فقط وما تبقي لن تستطيع ان تبلغه منه لانه هو نفسه لم يستطع فهمه
والاخير الذي لم يفهم شيئا هذا لن تعلم منه شيئا لانه هو نفسه لا يعلم شيئا

الي جانب ذلك كل سيضفي انطباعه الشخصي عن ما جري ...انت في غني عن ذلك !

وتلخيصا لما ذكرت :

اذا أردت شيئا خذ بالأسباب و توكل علي الله يكفيك.

أما بخصوص ما ذكرت في تعليقك السابق " لا تنكر افادتي و انت عقبة و انت متنازل عن الموضوع"

أنت مدين لي بالاعتذار
1- انا معملتش حاجة أستحق عليها الثناء.
2-أنا أختك في الله ومينفعش تشكرني علي واجبي.
3- أنا بتصرف علي سجيتي تماما والكل هنا اخوة واخوات لي ويعلمون ذلك تماما وانت واحد منا الان.
4- بعد اذنك مسمعش تاني انك ممكن متكنش معانا في الكلية لاني مبحبش الروح الانهزامية دي
ودي هعاقبك عليها بعدين " بعد الالتحاق بالكلية ان شاء الله" .
5- لا أحد يمثل لي أي عقبة لاني ببساطة لو شايفة كده هشيله ...وانت لحد الان معانا ...تبقي عقبة ازاي؟؟؟

واخيرا بكررلك ان شاء الله هتكون معانا واي استفسار انا موجودة.

[hend nga 3]

اخى الكريم اعلم انك مهتم بالتسجيل والأستفسار عن المقابلة الشخصية وعلمت بأنك قاهرى

فأتمنى ان تخبرنا اذا علمت عن موعد المقابلة الشخصية واذا كان تم تغير الموعد لأن

لأن وكيل الجامعة هنا قال اسبوعين وعدى اكثر من اسبوعين ولم يحدد الموعد وذلك لأنى

مضطرة للسفر فى الأيام القادمة واريد ان اتأكد فأذا كانت هناك اى معلومات لديك ارجوك ان

تخبرنى بها على هذه الصفحة تحياتى لك

[mohammad 0]

نجمة هند كتب:

اخى الكريم اعلم انك مهتم بالتسجيل والأستفسار عن المقابلة الشخصية وعلمت بأنك قاهرى

فأتمنى ان تخبرنا اذا علمت عن موعد المقابلة الشخصية واذا كان تم تغير الموعد لأن

لأن وكيل الجامعة هنا قال اسبوعين وعدى اكثر من اسبوعين ولم يحدد الموعد وذلك لأنى

مضطرة للسفر فى الأيام القادمة واريد ان اتأكد فأذا كانت هناك اى معلومات لديك ارجوك ان

تخبرنى بها على هذه الصفحة تحياتى لك

السلام عليكم
انا ارى ان مركز التسجيل التي تتبعينه السعودية فما علاقة مركز القاهرة بمركز السعودية؟ اعتقد ان المواعيد مختلفة وذكرتي بأني قاهري فهل اردتِ مواعيد مركز القاهرة؟
عامة : ميعاد الاختبارات لمركز جامعة القاهرة : يومي( 20 ، 27) /3/2010 تحريري / شفوي
اي السبت القادم تحريري وما بعده شفوي
واذا لم يكن هذا ما قصدتي ارجو التوضيح بمعلومات اكثر للافادة او تحديد السؤال

[a.h.issmail 0]

محمد باشا ياراجل هنستناك يوم السبت تقولنا عملت ايه

محضرلك كام قطعة ترجمة تترجمهم ان شاء الله

[hend nga 3]

اخى الكريم اتمنى لك التوفيق والنجاح واشكر ردك اما بخصوص المكان انا هامتحن فى السعودية

صحيح لكن موعد جميع الأمتحانات واحدة واذا لم يكن امتحانى هذا الأسبوع فأظن ان يكون

الأسبوع القادم اى بعد 27/ 3 لأن بداية الدراسة كما علمت من الوكيل 9/ 4 ويسمح بالتقديم الى

9/5 اتمنى ان تخبرنا لاحقا عن الأمتحانات وتكون معلوماتك هى احدث معلومات فى المنتدى

هو انت مش كانت امنتيك دى ان يكون فيه معلومات عن الموضوع حديثة

[hend nga 3]

اخيراااااااااااا الحمد لله عرفت موعد المقابلة الشخصية ...........

الموعد يوم الثلاثاء القادم 23/ 3 الساعة 11 ص لكن الغريب ان الوكيل قال لى بأن المقابلة

شفوية فقط عن طريق مكالمة تليفون ولا يوجد امتحان تحريرى اظن هذا يختلف عن المقابلة فى

القاهرة اتمنى النجاح والتوفيق للجميع

واشكر كل من رد على استفساراتى فى هذا الموضوع

[mohammad 0]

السلام عليكم
اشكرك يا احمد على رفع الروح المعنوية كما فعل بعض الاعضاء آنفا جزاهم وجزاك الله كل خير
وان شاء الله اترجملك القطع بس استناني اد سنة ع الاقل
بخصوص موضوع مقابلة السعودية انا بتغبطك على النعمة دي وربنا يوفقنا جميعا
ودعواتنا لبعض ياجماعة ماتنسوش

[hend nga 3]

ممنوع الحسد احسن اللى تفتكروه سهل ممكن يكون اصعب ما يمكن واللى تخاف منه

ما يجى اسهل منه ان شاء الله نطمن علىك وعلى جميع المستجدين وان شاء الله نكون زملاء فى هذا الترم

روح زاكرلك كلمة تنفعك

احسن يوم الأمتحان ......... يكرم المرؤ او يهان

وهى فين القطعى اللى قال عليها احمد

[a.h.issmail 0]

انت لسه هاتستني سنة ياراجل دانا من اول يوم ليا في الجامعة كنت مترجملي بتاع كتابين

قريب ان شاء الله يانجمة بس انا عندي ظروف كدة اليومين دول مش بتخليني اقدر اقعد قدام الجهاز

القادم احلي ان شاء الله

[mohammad 0]

مانا مش عايز انافقك واقولك اديني القطعتين اترجمهم واترجمهملك ترجمة مرسي ولا ترجمة جوجل ترجمة كفتجية يعني
انا بقولك استناني سنة اترجمهم ترجمة بأسلوب علمي
وان شاء الله هاترجم .........؟
دعواتكم

[a.h.issmail 0]

لا وحتي لو ترجمت نصها باسلوبك وبمساعدة جوجل او ترجمة كفتجية هايبقي اسمك حاولت

انا مش بقول كدة والله علشان حاجة بس انت ادخل لمواضيع الترجمة وفي موضوع اسمه ترجمة حرة ادخل وشوف الترجمات عاملة ازاي ترجمات عادية جدا بس زي مانت عارف
ينفع دكتور يعمل عملية من غير مايتدرب نفس الموضوع مينفعش المترجم يترجم من غير مايتدرب
ومش عايز احطمك واقولك انت اكيد عارف نظام التعليم في مصر محدش بيتعلم منه حاجة

[hend nga 3]

ادينا فى انتظار فرج ربنا وحد يقولنا ايه اللى حصل فى المقابلة الشخصية اليوم

[mohammad 0]

السلام عليكم ورحمة الله وبركاته
لسة راجع حالا من امتحان المقابلة وفي الاول والاخر الحمد لله
كل اللي حصل انه التشتت في المنهج كما ذكرت لعب دورا كبيرا في الاحباط

[hend nga 3]

على كل حال ان شاء الله خير لا تقلق اخى الكريم ولكن لم افهم ماذا قصدت بالتشتت

ماذا حدث معك ؟ فلم افهم معنى كلامك

لكن المهم اخى الكريم ان تتوكل على الله وتنتظر فعسى الله يوفقك بالنجاح ........

فلا داعى للأحباط او القلق اقولك شئ عن تجربة مع الدكتور فى امتحانات الشفوى

كان فى امتحان القرأن الأخير فى السنة النهائية فى جامعة الأزهر المفترض ان امتحان الشفوى بعد نهاية التحريى باسبوعين وهذا الأمر بالنسبة لى كان صعب

لأنى حصلت على التأشيرة للسفر الى زوجى بعد الأمتحانات التحريرة ولذلك فبكل شجاعة المغفلين

ذهبت للعميد وتقدمت بطلب لجنة خاصة بسبب ظروف السفر ولقد وافق العميد .......ويا ريته ما وافق ولا كنت شفت

اللى شفته فلق\د جعل اللجنة الخاصة .............. فى نفس اليوم اللى طلبت فيه اللجنة اما هذا او لا وانتظر

فوافقت ......... ويا ريت ما وافقت ............لأنه جعل اللجنة من اثنين من الدكاترة احدهم صعب ومتزمت جدا

وكمان اللجنة جعلها فى مكتبه .......اى مكتب العميد وخد عندك يا عم بسمع قرأن كريم لدكتور صعب فى مكتب العميد

الذى لم ادخله فى حياتى من قبل وسط مجموعة كبيرة من الدكاترة ......لن.تتخيل ابدا مدى الرعب الذى كنت فيه

وبعد انتهاء عصر الليمون اللى كنت فيه وانا فى طريقى الى الباب قال لى الدكتور اعملى حسابك انتى هتشرفينا

السنة الجاية

طبعا عرفت انى خلاص رسبت ولكن الغريب انهم نجحونى بتقدير جيد فى القرأن

فى نهاية هذه القصة المحرجة اقول لك لا تقلق على الأطلاق

[mohammad 0]

السلام عليكم اخواني واخواتي وكل الاعضاء الكرام
النهارده انا كنت رايح امتحان المقابلة النهاردة (بايعها) لاني لما جيت اذاكر كنت افتح شوية جرامر شوية واقول يمكن يجيب محادثة افتح محادثة شوية برده واقول يمكن يجيب براجراف اسيب المحادثة واذاكر براجراف طب شوية ترجمة يعني ما شاء الله الاسباب كانت حاضرة خصوصا اني اساسا غير متفرغ يعني وقتي ضيق جدا جدا (وده معنى التشتت اللي حصلي ) المهم انا رايح وقلت ع الاقل لو محلتش اعرف النظام واحل في مقابلة غيرها .
وفوجئت بأن الامتحان اتفه من اتفه امتحان ولا يصح ان اقول عليه امتحان لغة انجليزية .
السؤال الاول كان اكتب قطعة paragraph عن اضرار التدخين .
والسؤال التاني : ترجم من انجليزي لعربي :
واداني قطعة برده في منتهى التفاهة بتحكي عن طالب التعليم المفتوح والفرق بينه وبين طلاب الجامعات الاخرى (النظامية) وان طلاب التعليم المفتوح معظمهم كان بعيد عن الدراسة وانهم بيعملوا الى جانب الدراسة .......الى اخره يعني من الاخر تفاهة في تفاهة .
طبعا بقى انا عكيت وده هو اللى اختنا رانيا ما كانتش عارفة تفهمه اني كنت عايز اعرف محتوى الامتحان فقط وحكاية المستوى كانت هتحدد لوحدها
لاني لما اعرف منهج او شكل الامتحان بكده يبقى عرفت اقصى حاجة ممكن تيجي ف الامتحان اما اني اخش مش عارف هايجيلي ايه ماينفعش كان لازم اعرف الحدود مش تبقى الحكاية مفتوحة .

وف الاول والاخر هو نصيب قدر الله وما شاء فعل واحتمال النجاح يكاد يكون بعيد كل البعد ولكن الثقة في الله تجعله اقرب مما يكون .
وفقني الله واياكم ورزقنا الزيادة في العلم وزيادة في الايمان وبركة في الرزق ودمتم بكل خير







فيا عجبا لمن يعصى المحسن بعد معرفته بإحسانه ويطيع اللعين بعد معرفته بطغيانه‏.
ادَّخر راحتك لقبرك، وقِّلل من لهوك ونومك، فإنَّ من ورائك نومةً صبحها يوم القيامة
إذا لم تستطع أن تكون خادماً لدين الله .. فكن خادماً لخادمى دين الله

[Hamdy Tawfik-manar9 0]

تفائلوا بالخير تجدوه

ان شاء الله تلقي القبول وتنجح في الامتحان

[Honey Bunny 0]

اقتباس :

طبعا بقى انا عكيت وده هو اللى اختنا رانيا ما كانتش عارفة تفهمه
اني كنت عايز اعرف محتوى الامتحان فقط وحكاية المستوى كانت هتحدد لوحدها

الترجمة والبراجرف وجهان لعملة واحدة يا أخ محمد وكلاهما يشتمل علي قواعد اللغة. المذكرة اللي رفعها الاخوة هنا مفادها انه في قطع للترجمة أما البراجراف أنا لا أعلم انه قد يأتي في الامتحان أصلا
ونصيحة مخلصة لك لا داعي للافراط في القلق والتوتر والا حضرتك قبل كل امتحان ترجمة لا قدر الله هيجليك انهيار عصبي لانه وفي معظم الاحوال يترك دكتور المادة الكتاب والمحاضرات و يأتي بمواضيع أخري....القراءة ثم القراءة ثم القراءة أخي.

واهلا بيك زميل جديد في دفعة جديدة للكلية وأخ قبل أي شيئ.