حلقة دراسية ترم رابع دور سبتمبر 2013

[mor 0]

ربنا يرزقك الفرودس الاعلى من الجنة يا اخت / مريم بما تقدميه من عمل خير ينفع زملائك 

[medhate 0]

ربنا يبارك ف حضرتك يا استاذة مريم لتعبك ومجهودك ؟؟
أنا ليه سؤال ف المادة 221 قراءة وتعبير ايه ال اخدتوه وشكرا لحضرتك

[سما سيف 0]

شكرا حبيبتى مريم انا اليومين دول تايهة فى بحر الفوناتكس اللى موش عارفة هاطلع منه ازاى بحاول احفظ التعريفات بس الموضوع بايظ تماما كل ما اخلص واستعين بالله واخد نفس واقول خلاص انا تمام واجى احل اعك الدنيا وادخل كله فى بعضه هوا انتى تعرفى سؤال التعريفات دا عليه كام درجة يحسن انا حاسة انى هافضل اذاكر فوناتكس لغاية الامتحان وموش هاافتح اى مادة تانية  الحقينى يحسن انا حاسة ان نداهة الفوناتكس نادتنى هههههههههههه

[سما سيف 0]

اه نسيت صحيح اقولك الف سلامة موش قلتلك انا فى التوهان هههههههههههههه

[Hamdy Tawfik-manar9 0]

*maryam كتب:

معلش يا جماعة عالتاأخير كنت تعبانة شوية هكتبلكم المحاضرات حالا

ألف سلامة أ / مريم

أدام الله عليك نعمة الصحة والعافية

[rania ammar 0]

 
 

[حواس 0]

*maryam كتب:

معلش يا جماعة عالتاأخير كنت تعبانة شوية هكتبلكم المحاضرات حالا

[*maryam 0]

mor كتب:

ربنا يرزقك الفرودس الاعلى من الجنة يا اخت / مريم بما تقدميه من عمل خير ينفع زملائك 

اللهم امين ولك بمثله ياااااارب  

[*maryam 0]

medhate كتب:

ربنا يبارك ف حضرتك يا استاذة مريم لتعبك ومجهودك ؟؟
أنا ليه سؤال ف المادة 221 قراءة وتعبير ايه ال اخدتوه وشكرا لحضرتك

الله يخليك يا استاذ مدحت وكله من فضل ربنا والشكر لله

خدنا درس لماذا هويت القراءة للعقاد وخدنا صفحة ونص من درس الادب العربي ل طه حسين وان شاء الله هنكمله الجمعة الجاية

[*maryam 0]

سما سيف كتب:

شكرا حبيبتى مريم انا اليومين دول تايهة فى بحر الفوناتكس اللى موش عارفة هاطلع منه ازاى بحاول احفظ التعريفات بس الموضوع بايظ تماما كل ما اخلص واستعين بالله واخد نفس واقول خلاص انا تمام واجى احل اعك الدنيا وادخل كله فى بعضه هوا انتى تعرفى سؤال التعريفات دا عليه كام درجة يحسن انا حاسة انى هافضل اذاكر فوناتكس لغاية الامتحان وموش هاافتح اى مادة تانية  الحقينى يحسن انا حاسة ان نداهة الفوناتكس نادتنى هههههههههههه

هههههههههههههههههههه حبيبتي ياسما في ناس كتير تايهة ومش عارفة تبدأ ازاي وانا كنت زيكم بس الحمد الله لما اتعرفت على المادة هي في الاول مكنتش عايزاني اتعرف عليها  وكانت قافلة خالص من ناحيتي مكنتش ضيقاني من الاخر قلتلها لا والله ابدا لازم اتعرف عليكي غصب عنك وعني وبدأنا نتصالح ونبوس راس بعض بعد معركة   

بصراحة مش عارفة عليه كام درجة مش موزعين الدرجات في ورق الامتحانات بس لو عرفت هقولك وبالنسبة للتعريفات كان في ملف ورد اسمه تعريفات الفوناتكس مش عارفة انتي حملتيه ولا لا فيه 50 تعريف تقريبا وكان من ضمن الملفات اللي رفعتهالك في الصفحة اللي قبل دي بس عايزة اقولك لو قريتي التعريفات دي كويس وفهمتيها كويس قوي هتلاقيهم حلوين مش صعب بالصورة اللي احنا كنا متخيلنها وعايزة اقولك كمان شرح الدكتورة سلوي في الاربع فيديوهات بتوعها جميل جدااا اسمعيهم وهتفرق معاكي
طيب عملتي ايه في الجداول تمام فيها ؟؟؟؟؟؟؟؟؟؟

[*maryam 0]

الله يسلمك استاذ حمدي وشكرا لحضرتك استاذ حواس تسلموا يا رب 

وجزاكي  الله بمثله يا رانيا  

[محبة نور الإيمان 0]

اللي تايه في الفونكس انا اخدت الفونكس واحب اقولكم نصيحه ماده الفونكس تعتمد اعتماد كبير على الفهم اول حاجة لازم تفهموا ولو فهمتوا هيسهل عليكم الحفظ خالص

[abo nooh 0]

تسلمين  يا  مريم  


وشكرا على النصيحه  يا نور الإيمان


بارك الله بالجميع

[سما سيف 0]

شكرا يا محبة جزاكى الله خيرا هاحاول افهم
انا نزلت يا مريم الفايلات كلها وشرحها مبسط بس انتى عارفة بيبقى فى حاجات كدة بتقفل مع الواحد حتى لو كانت سهلة والا شكل العيب منى عشان ضغط مذاكرة الولاد والله انا ما بقتش عارفة ربنا يسر لينا كلنا ان شاء الله

[*maryam 0]

ربنا يعينك يا سما وان شاء الله خير ياحبيبتى وخلينا نتفائل خير وكله هيبقى تمام بإذن الله

[سما سيف 0]

طول ما انتى فى الجروب يا مريومة يا جميلة هافضل متفائلة ربنا يخليكى

[سحر عبد الحق 0]

ربنا يكرمك ويصلح حالك
 

[*maryam 0]

تسلمي يا سما يا حبيبتي واللهم امين يا سحر  

[*maryam 0]

السلام عليكم ورحمة الله وبركاته 


حصلت النهاردة حادثة قدام المركز صعبة قوي- واحد كان سايب مفتاح عربيته مع زميلته عقبال ما يصلي راحت فا مشيت بيها وطيرت ناس وفي اتصابو وبيقولوا في بنت جالها ارتجاج وفي العناية المركزة ادعولها  وكانوا عايزين يطلعو البنت اللي كانت في العربية عشان يضربوها  بس هربوها بصوا المنظر   ربنا يرحمنا برحمته يارب - اخر استهتار 

[*maryam 0]

محاضرات 27/ 12

العربي كملنا درس الأدب العربي لـ طه حسين وكروتنا اخر كروتة عشان يخلص منه النهاردة بأي طريقة 


الترجمة
خدنا اجزاء من قطعة ص 153 بالكتاب بعنوان ( الناس مرعوبة من انفلونزا الخنازير)

والقطعة ص 162 بالكتاب 
رؤية مصرية من اجل مصر ومن اجل الجزائر ومن اجل العروبة 

واستعرض معانا مواضيع من جريدة القاهرة 

نتنياهو يتعهد ببناء مستعمرات في الضفة 
Netanyahu vows to build settlements in the West Bank

وقالنا المفروض لما نيجي نترجم ناخد بالنا من النقط دي

1- Core meaning

2- Details

3- Tone of voice

واتكلم عن كلمة suspects مشتبه فيهم وممكن لما نيجي نترجمها نشرحها ونقول ( من الممكن ان يكونوا مجرمين ) يعني مش لازم نكتب كل كلمة بترجمتها بالظبط عشان متكونش ترجمة حرفية الافضل اننا نشرح للتوضيح اكتر 

وقال القراءة مهمة جدا وبالذات العربي عشان هتفيدنا في الترجمة وقال الترجمة الالكترونية زي جوجل المفروض نبعد عنها لانها ترجمة مش مظبوطة وممكن يحصل تغيير في المعنى

* اذا جمعنا كلمة people اصبحت شعوب / deaths نترجمها حالات وفاة وقال ان مفيش حاجة اسمها وفيات بكسر الفاء لكن هي وفيات بفتح الفاء بمعنى ( متوفى وليس متوفي )

[سما سيف 0]

لا حول ولاقوة الا بالله ايه الجنان دا خلاص مابقاش فيه اى احترام لادمية البشر موش كفاية الاحداث اللى مالية البلد ربنا يشفى البنت اللى فى العناية وتقوم بالسلامة وربنا يستر على البلد الايام اللى جاية وجزاكى الله يا مريم كل خير دا انتى عاملة زى الجندى اللى فى المعركة كل مرواحة  ليكى الكلية تيجى بحكاية جديدة ربنا يعدى سنين الكلية دى على خير

[*maryam 0]

في اخبار ان البنت دي ماتت والله اعلم يارب تكون اشاعة يارب ربنا يسترها يا سما انا بجد خلاص اعصابي باظت من اللي بيحصل ده بس بحمد ربنا ان انا مشيت قبل الحادثة دي انا مشيت من هنا واللي حصل حصل لاني لو كنت شفت المنظر ده مكنتش هستحمل وبحمد ربنا كمان ان مفيش حد من صحابي جراله حاجة الحمد الله رب العالمين   مش عارفة اقول ايه بجد وحسبي الله ونعم الوكيل

[سما سيف 0]

ربنا يحفظك من كل شر انا ما بقتش انزل من البيت الا لما اعمل استخارة لان بجد الشارع ما بقاش امان انا مرة وانا سايقة ولد جرى قدام العربية وعشان اتفاداه دخلت فى الرصيف ونزلت اشوفه مرعوبة انى اشوفه تحت العجل والحمد لله ما حصلوش حاجة بس انا اللى اتدمرت نفسيا وفين وفين لما عرفت اسوق تانى

[سما سيف 0]

بقولك يا مريم هيا محاضرات العربى التلفزيونية مفيدة انزلها والا كفاية ورق المحاضرات وايه المواد اللى تنصحينى انزلها فيديو لانها بتاخد وقت وموش عاوزة اضيع وقت لان خلاص الوقت ازف

[*maryam 0]

بصي ياحبيبتي انا شغلت محاضرة من محاضرات العربي التليفزيونية مستفدتش حاجة لانه بيقرا وخلاص بس اقري المواضيع من الكتاب وبعد كل درس في الكتاب فيه ملخص وفي اسئلة وتابعي اسئلة الامتحانات 

الاربع محاضرات التليفزيونية للفوناتكس نزليها مفيدة جداا والمحاضرات والتطبيقات التليفزيونية للمقال مهمة ومفيدة  أما المعاجم انا بقول مش لازم لاني سمعت الفيديو الاولاني مستفدتش شئ   اما الترجمة انا مسمعتش منها حاجة فا مش هقدر افيدك فيها - يعني كدا المقال والفوناتكس بس اللي تنزليه وربنا يوفقك ياجميل

[سما سيف 0]

شكرا يا مريم كتير ريحتينى من التحميل اللى من غير فايدة اما الترجمة فانا اول ما لقيت ان الفيديو لدكتورة هدى قلت مستحيل احملهم هوا انا مستغنية عن دماغى موش ناقصة لخبطة انا استكفيت بصراحة من دكتورة الترم اللى فات فعلا اسستنى جدا فى الترجمة ومكتفية بقراءة الاهرام ويكلى

[Ahmed Elwardany 0]

هو يا جماعة بالنسبة لمادة العربي
3 دروس بس المقريين الترم ده صح؟ 
حد يقولي اية المقرر في العربي بالظبط او اية اللي يتذاكر عشان انا عايز اظبط نفسي في مادة مادة لاني ابيض
بس خلينا دلوقتي في العربي

[Ahmed Elwardany 0]

و هل حد معاه ملق مراجعة او ملخص للمادة؟

[*maryam 0]

سما سيف كتب:

شكرا يا مريم كتير ريحتينى من التحميل اللى من غير فايدة اما الترجمة فانا اول ما لقيت ان الفيديو لدكتورة هدى قلت مستحيل احملهم هوا انا مستغنية عن دماغى موش ناقصة لخبطة انا استكفيت بصراحة من دكتورة الترم اللى فات فعلا اسستنى جدا فى الترجمة ومكتفية بقراءة الاهرام ويكلى

هههههههههههههههههههه بس انتي عارفة ياسما دكتور الترجمة الترم ده احسن بكتير من دكتورة امااني ياريته كان بيدينا من اول ترم كنا هنبقى حاجة تانية وياريت كان يبقى ليه فيديوهات بس للأسف

[*maryam 0]

Ahmed Elwardany كتب:

هو يا جماعة بالنسبة لمادة العربي
3 دروس بس المقريين الترم ده صح؟ 
حد يقولي اية المقرر في العربي بالظبط او اية اللي يتذاكر عشان انا عايز اظبط نفسي في مادة مادة لاني ابيض
بس خلينا دلوقتي في العربي

السلام عليكم استاذ احمد احنا خدنا درس لماذا هويت القراءة ودرس الادب العربي وهناخد بإذن الله المحاضرة الجاية درس الجمال واعتقد هما دول ال3 دروس المقررة بس  لان محاضرة العربي الجاية اخر محاضرة  وهنزل لحضرتك ملخصات للـ 3 دروس ان شاء الله

[medhate 0]

السلام عليكم ؟؟ الف شكر لحضرتك وربنا يجازيك خير ع مجهودك وتعبك

[*maryam 0]

الشكر لله استاذ مدحت

[*maryam 0]

Ahmed Elwardany كتب:

و هل حد معاه ملق مراجعة او ملخص للمادة؟

ده ملخص لمادة العربي

http://www.1filesharing.com/redirect/KMN0YSXR/11

[Ahmed Elwardany 0]

متشكر جدا يا مريم على تعبك معايا دايما
انا معاكو ان شاء الله متابعة من النهاردة لاني اخدت اجازة عشان الحق الم الفونتيكس و العربي و بقيت المواد التانية من الترم اللي فات و اللي جاي و ربنا معانا كلنا يارب

[محبة نور الإيمان 0]

مريم يعني اللي بيدرس مادة الترجمة مش الدكتورة هدى طيب اعطيني معلومات عن دكتور المادة دي عشان انا واخده معاكم ترجمة معاجم

[*maryam 0]

الشكر لله يا استاذ احمد ومفيش تعب ولا حاجة وربنا معانا كلنا

[*maryam 0]

محبة نور الإيمان كتب:

مريم يعني اللي بيدرس مادة الترجمة مش الدكتورة هدى طيب اعطيني معلومات عن دكتور المادة دي عشان انا واخده معاكم ترجمة معاجم

لا يا محبة مش الدكتور هدي اللي بيدينا ترجمة 4 دكتور اسمه علي عبد العزيز الغفاري وهو بيدي من الاهرام ويكلي ومن الكتاب ساعات وقالنا ركزوا على الاحداث اللي بتحصل في مصر في الفترة من يوم ما بدأنا الدراسة لحد الان ونتابع دايما الاخبار اللي فيها ونترجمها اما عن القطع العربي كان بيدينا من جريدة اسمها القاهرة هي جريدة اسبوعية برضه زي الاهرام ويكلي

[*maryam 0]

 
محاضرات بتاريخ 3/ 1/ 2014


القراءة والفهم والمقال
 
في اول المحاضرة الدكتورة اتكلمت عن العام الجديد كل سنة وانتم طيبين وقالت المفروض مع بداية السنة الجديدة اننا نفكر ونشوف احنا ممكن نحقق ايه من اهدافنا السنة دي ونكتب موضوع عنه المهم منحلمش لحاجات تكاد تكون مستحيلة انها تتحقق في خلال سنة ونفكر بعقل ايه اللي ممكن يتحقق في الفترة دي  وفي طالب قام وقال انه مع بداية كل سنة بيعمل خريطة ويكتب فيها هدفه ويكتب ايه الخطوات اللي ممكن يعملها عشان يوصل وينجح في تحقيقه على سبيل المثال عايز ينمي نفسه في المحادثة باللغة الانجليزية ممكن يعمل ايه – ياخد كورس في المكان الفلاني ويشتري كتب يستفاد منها وممكن يبحث عالنت على فيديوهات تساعده على ده لو مش هنقدر نعمل ده في خلال سنة ممكن نحدد ليه وقت مثلا في خلال عامين او 3 يعني مضحكش على نفسي واقول اني هحققه في سنة وانا عارفة انه صعب يتحقق في الفترة دي والدكتورة اتبسطت قوي من الطالب ده وسقفتله كمان 
 
وحلينا امتحان بتاريخ 2/ 6/ 2013 خارج مصر دورت عليه عندي مش لقيته بس هدور عليه عالسايت يمكن يكون موجود – هو الموضوع بيتكلم عن زيادة الدخل وان كل اما يزيد دخلنا بنشتري حاجات كتير احنا مش محتاجنها وممكن نستغنى عنها
 
 -------------------------------------------------------


الفوناتكس
 
خدنا short and long vowels واماكنهم في الجريد ونطقهم وامثلة عليهم واهم حاجة ناخد بالنا من مكان النقطة فين بالظبط في الجريد وقالت ان كل الرموزالموجودة في  front ا  ---- spread  بمعنى ان نطقهم بيكون شكل الفم ممدود ------ وان كل  رموزالموجودة في ال back --- rounded بمعنى نطفهم بيكون شكل الفم مدور وطبعا لازم نحفظ الرموز دي واماكنهم ونطقهم كويس جدااااااااااا
 
 
ملحوظات:
 
* اذا جاء كلمة اخرها حرف ال s وقبلها حرف voiced  بيكون نطق ال s ---z  مثال:
 
goods  ------- نطقها goodz  لان حرف ال d voiced/
 
* اذا جاء كلمة اخرها s وقبلها حرف voiceless ينطق حرف الs  --- s زي ما هو مثال
 
Students حرف t / voiceless  ينطق  s دون أي تغيير لازم ناخد بالنا من الموضوع ده في الكلمات اللي هتيجي في الامتحان ونعملها  ترانسكربشن
 
--------------------------------------------------------------------
 
المعاجم


خدنا المحاضرة الخامسة ( اجزاء العين ) بس مش هييجي منها حاجة واتكلمت عن القواميس اللي موجودة في المحاضرة ال 6 وبرضه مش هييجي منها حاجة - المحاضرة الخامسة والسادسة ملغيين لكن تطبيقاتهم مقررة واتكلمت عن الامتحان نفس نظام الامتحانات السابقة وسؤال واحد بس هييجي فيه نقطتين برة المنهج اللي هو اكمل الجمل من عندك وقالت الجمل اللي في الابلكيشن 6 مش بالضروري تيجي تشوز ممكن تيجي جمل كاملة واحنا نترجمها من عربي لانجليزي او العكس وممكن الترجمة تيجي من أي محاضرة  وسؤال correct the error متجمع كله في المحاضرة الرابعة
 

 

يارب اكون افدتكم وربنا يوفقنا لا تنسوني من صالح دعائكم   

[محبة نور الإيمان 0]

تسلمي على التوضيح يا مريم بصراحه انا ولا مسكت ترجمة ولا معاجم الله يستر بس إن شاء الله  يمديني اخلص ولو نص المنهج معليش هتعبك معايا مادة المعاجم ايه الحاجات اللي مطلوب اركز عليها

[*maryam 0]

كل محاضرات المعاجم مقررة ما عدا محاضرة 5 و6 والتطبيقات كلها مقرر بس متركزيش على الشرح والرغي الكتير اللي فيه ركزي بس على الجمل المترجمة والمصطلحات هي مادة سهلة بس عايزة حفظ وربنا معانا وان شاء الله خير

[Ahmed Elwardany 0]

هو بالنسبة لإمتحان الفونيتكس ؟ بيجي ازاي؟

عبارة عن ايه شكل الامتحان حد عارف؟

[محبة نور الإيمان 0]

شوف يا احمد امتحان الفوناتكس بيجيك سؤال تحول الكلمات لرموز والعكس الجدول بتاع الحروف الساكنة مهم ورسومات الvowels لإن راح يجيك كلمات وتحط اول حرف فيها في الجدول طبعا الحرف هتحطه على حسب الصوت بتاعه كمان بتجيب تعريفات بس بتكون على هيئة فرغات ده كان امتحاني السنة اللي فاتت وانصحك تسمع محاضرات الدكتورة سلوى هتستفيد منها خالص

[rania ammar 0]

الف شكر                                                             وربنا يجازيك خير ع مجهودك وتعبك

[سما سيف 0]

  شكرا يا حبيبتى بس ممكن اسالك سؤال وياريت تردى على الخاص لانى موش عارفة اكلمك على الخاص موش عارفة بيقولولى لسة ما وصلتش رسايلى موش عارفة لرقم كام المهم السؤال هوا ايه انتماءات دكتور الترجمة السياسية عشان اقدر اتوقع القطع اللى ممكن يجيب منها الامتحان والاجابة فى الخاص عشان ما نعملوش مشاكل    

[*maryam 0]

هههههههههههههههههههههه حاضر يا سما هرد عليكي في الخاص

[*maryam 0]

محاضرات 10 / 1

 
العربي


خدنا درس الجمال واتكلم عن الامتحان نفس نظام الامتحانات السابقة بس الاختلاف انه هيجيب موضوعين من ال3 (لماذا هويت القراءة – الادب العربي – الجمال )ونكتب واحد منهم على فكرة قاصد  انه يعمل كدا لانه عارف ايه اللي في دماغنا انه لو جاب ال3 مواضيع هنركز على واحد والباقي هنقراه كدا وخلاص عشان سؤال صح وغلط  كنا عايزين بقى نعرف ايه هما الموضوعين هههههههه قالنا لو قاطعتوا الدستور هقولكم  كله سكت اللي هو بقى مش عايزين نعرف حاجة بس عن نفسي هذاكر موضوعين والتالت هقراه كدا والموضوع اللي هنكتب عنه المقدمة تكون نبذة عن الكاتب 3 – 4سطور وبعدا كدا ندخل في الموضوع وفي الاخر نقول رأينا ومش بطول المقال اهم حاجة يكون فيه المفيد من غير رغي ولغة عربية سليمة  والحمد الله دي كانت اخر محاضرة للعربي  
 
 
الترجمة :
 
المواضيع اللي خدناها من الاهرام ويكلي
 
Make or break
 
http://weekly.ahram.org.eg/News/5108/17/Make-or-break.aspx
 
Return of the mudslingers
والدكتور ترجمها ( هناك اشخاص يقوموا بتشويه سمعتهم / الإشهار بهم )
 
Defamation / mudslingers --- تشويه السمعة
 
Mobarak regime  members of the ------ فلول
 
Expects have their say
المصريون يصوتون بالخارج
 
http://weekly.ahram.org.eg/News/5095/17/Expats-have-their-say.aspx
 
No water deal
اتفاق على المياه
 
http://weekly.ahram.org.eg/Nwes/5093/17/No-water-deal.aspx
 
وخدنا جزء من مقال في جريدة القاهرة معرفتش اوصل للمقال لاني مكتبتش عنوانه هو بيتكلم عن العنف الطائفي وده لينك الجريدة لو عرفتو تجيبوه
 
http://www.alqaheranews.com/index.php
 
 
chaos – disorder ---- فوضى
 
sect or sectarian ---- مذهب من المذاهب الدينية
 
Exploited or used------- استغلت
 
وخدنا القطعة ص 162 في الكتاب
 
 
واتكلم عن الامتحان قطعتين انجليزي وقطعة عربي وقال مش من الضروري نحفظ كلمات المهم اننا نقرا كتير عربي وانجليزي ونترجم كتير والكلمات الصعبة نخمنها او ممكن نسقطها من القطعة ونقرا القطعة على بعضها ونكتب اللي احنا فهمناه بأسلوبنا وبلغة عربية سليمة وبعد كدا نرجع للقطعة ونشوف اذا كان في تفاصيل وقعت مننا نضيفها واهم حاجة نعمل مسودة منترجمش على طول


كانوا اخر محاضرتين العربي والترجمة بالتوفيق

لا تنسوني من صالح دعائكم  

[سحر عبد الحق 0]

بجد تعبانه معانا وربنا يصلح حالك   

[Ahmed Elwardany 0]

الله يبارلك يا مريم والله الواحد محرج من تعبك معانا دايما

[bataelmghraby 0]

[noha awad 0]

السلام عليكم جميعا
في البداية احب اشكرك شكرا جزيلا يا مريم على مجهودك الاكثر من رائع بجد مش عارفه أقولك ايه ربنا يجازيكي خير ويجعله في ميزان حسناتك .  
ثانيا انا  كان عندي ظروف و لسه دلوقتي هبدأ أذاكر وبحاول ألم المواد فهل من وجهة نظرك هلحق في الوقت الضايع دة ؟ وخاصة مادة الفوناتيكس شايفة من كلامكم انها مادة تقيلة وعايزة وقت للفهم .
مش عارفه اعمل ايه ؟ انا قرأت كل اللي انتي كتباه في الحلقة الدراسية ونزلت المحاضرات والتطبيقات من صفحتي لو عايزة اطبع ورق المحاضرات اطبع لحد  المحاضرة الكام في كل مادة ؟ يعني  هل كل المحاضرلت مقررة في كل المواد ؟